ޔަމަނުގެ އައްސޭރިފަށުން ރަތްކަނޑުގައި މުދާ އުފުލާ ބޯޓަކަށް ހަމަލާދީފި
ޔަމަނުގެ އައްސޭރިފަށުން ދަތުރުކުރި މުދާ އުފުލާ ބޯޓަކަށް ހަތިޔާރު އެޅި ބަޔަކު ހަމަލާދީފައިވާތީ، ޔޫ.ކޭ.އެމް.ޓީ.އޯ އިން އެ މައްސަލަ ތަހުގީގު ކުރަން ފަށައިފި. މި ހަމަލާގެ ޒިންމާ އަދި އެއްވެސް ޖަމާއަތަކުން އުފުލާފައި ނުވާއިރު، މީގެ ކުރިން ހޫޘީންނާއި ސޯމާލިއާގެ ކަނޑުފޭރޭ މީހުން އެ ސަރަހައްދުގައި މިފަދަ ހަރަކާތްތައް ހިންގާފައިވޭ.
ޔަމަނުގެ ހުޅަނގު އައްސޭރީގައި އޮންނަ މޮކާ ބަނދަރު ސަރަހައްދުން ހޫޘީ ހަނގުރާމަވެރިން ފަހަތަށް ޖެއްސުމަށް ސަރުކާރަށް ތާއީދުކުރާ ފައުޖުތަކުން ކުރިއަށްދާއިރު، އެ ފައުޖުގެ ސިފައިންގެ މީހަކު އޭނާގެ ހަތިޔާރު އުފުލާލައިގެން ހުރި މަންޒަރު. | ގެޓީ އިމޭޖަސް
ޔަމަނުގެ އައްސޭރިފަށުން ރަތްކަނޑުން ދަތުރުކުރަމުންދިޔަ މުދާ އުފުލާ ބޯޓަކަށް އާދީއްތަ ދުވަހު ހަމަލާއެއް ދީފައިވާ ކަމަށް އިނގިރޭސިވިލާތުގެ އަސްކަރިއްޔާއިން ބުނެފި އެވެ.
ޔަމަނުގެ އައްސޭރިފަށުން މި ހަމަލާ ދީފައިވާކަން ރިޕޯޓްކޮށް، ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫ.ކޭ.އެމް.ޓީ.އޯ) އިން ބުނީ، ހަތިޔާރު އެޅި ގޮތް ނޭނގޭ ބަޔަކު އެ ބޯޓަށް ހަމަލާދެމުންދާ ކަމުގެ މައުލޫމާތު ބޯޓުން ރިޕޯޓްކޮށްފައިވާ ކަމަށެވެ.
ޔޫ.ކޭ.އެމް.ޓީ.އޯ އިން ހާމަކުރި ގޮތުގައި ކަމާބެހޭ އިދާރާތަކުން މިހާރު ދަނީ މި ހާދިސާ އިތުރަށް ތަހުގީގު ކުރަމުންނެވެ.
މި ހަމަލާގެ ޒިންމާ މިހާތަނަށް އެއްވެސް ޖަމާއަތަކުން އުފުލާފައެއް ނުވެއެވެ.
ޔަމަނުގެ ހޫޘީ ހަނގުރާމަވެރިން އަލުން ބޯޓުފަހަރަށް ހަމަލާދޭން ފަށާނެ ކަމުގެ އިންޒާރު ދީފައިވީ ނަމަވެސް، ފަހަކަށް އައިސް އެފަދަ ހަމަލާއެއް ދީފައެއް ނުވެ އެވެ. އަދި މި ހާދިސާއާ ގުޅޭގޮތުން ހޫޘީންގެ ތަރުޖަމާނަކު ވަކި އެއްޗެއް ބުނެފައެއް ނުވެ އެވެ.
މީގެ އިތުރުން، ފަހަކަށް އައިސް ސޯމާލިއާގެ ކަނޑުފޭރޭ މީހުންވެސް ދަނީ އަދަން ކަނޑުގެ ސަރަހައްދުގައި ހަރަކާތްތެރިވަމުންނެވެ.
މަސްދަރު: އޭޕީ
