އެމެރިކާއިން މެދުނުކެނޑި ނުވަވަނަ ރޭ ވެސް އީރާނަށް ވަރުގަދަ ހަމަލާތަކެއް ދީފި
އެމެރިކާގެ ތިން ސިފައިން މަރުވެފައިވާއިރު، އީރާނުގެ އަސްކަރީ ގާބިލުކަން ނައްތާލުމަށް އެމެރިކާއިން އީރާނުގެ އެކި ސިޓީތަކަށް ވަރުގަދަ ހަމަލާތަކެއް ދީފި. މި ހަމަލާތަކާއެކު ދެ ގައުމުގެ ދެމެދުގައި އޮތް ހަނގުރާމަ ހުއްޓާލުމުގެ އެއްބަސްވުން އުވި، ހުރްމުޒް ކަނޑުއޮޅީގެ ކޮންޓްރޯލް ހޯދުމުގެ ކުރިމަތިލުންތައް ވަނީ އިތުރަށް ވަރުގަދަވެފައި. މި ހަމަނުޖެހުންތަކުގެ ސަބަބުން ދުނިޔޭގެ ހަކަތައިގެ ބާޒާރަށް ބޮޑެތި ނުރައްކާތަކެއް ކުރިމަތިވަމުންދާކަމަށް ރިޕޯޓުތައް ބުނޭ.
އީރާނަށް އަމާޒުކޮށް އެމެރިކާއިން ދެމުންދާ ހަމަލާތަކުގެ ތެރެއިން، އެމެރިކާގެ ހަނގުރާމަމަތީ މަނަވަރަކުން މިސައިލެއް ފޮނުވާލާ މަންޒަރު ފެންނަ މި ފޮޓޯއަކީ 2026 ވަނަ އަހަރުގެ ޖުލައި މަހުގެ 18 ވަނަ ދުވަހު އާންމުކޮށްފައިވާ ވީޑިއޯއަކުން ނަގާފައިވާ ފޮޓޯއެއް | ސްކްރީން އިމޭޖް
އެމެރިކާއިން މެދުނުކެނޑި ނުވަވަނަ ރޭ ވެސް އީރާނަށް ވަރުގަދަ ހަމަލާތަކެއް ދީފި އެވެ. އީރާނުގެ މީޑިއާތަކުން ރިޕޯޓްކޮށްފައިވާ ގޮތުގައި ސިރިކް، ޖާސްކް، ތަބްރީޒް އަދި ޗަބަހާރު ހިމެނޭހެން އެ ގައުމުގެ އެކި ސިޓީތަކުން ބާރުގަދަ ގޮވުންތަކުގެ އަޑު ވަނީ އިވިފަ އެވެ.
ހޯމަ ދުވަހު އެމެރިކާއިން މި ހަމަލާތައް ދީފައިވަނީ، ފާއިތުވި ދުވަސްތަކުގައި އެމެރިކާގެ ތިންވަނަ ސިފައިންގެ މީހަކު މަރުވިކަން އެ ގައުމުގެ އަސްކަރިއްޔާއިން އިއުލާންކޮށްފައިވާ ދަނޑިވަޅެއްގަ އެވެ. މީގެ އިތުރުން، ހުރްމުޒް ކަނޑުއޮޅީގެ ކޮންޓްރޯލް ހޯދުމަށް ކުރަމުންދާ ހަނގުރާމައިގެ ތެރެއިން، ތެހެރާނާއި ވޮޝިންޓަނާ ދެމެދު ވެފައިވާ މަސް ދުވަސްވީ ހަނގުރާމަ ހުއްޓާލުމުގެ އެއްބަސްވުން ވެސް މިހާރު ވަނީ އުވިފަ އެވެ. އެމެރިކާގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، އެންމެ ފަހުން ދިން މި ހަމަލާތަކުގެ މަގްސަދަކީ ހޮރްމުޒް ކަނޑުއޮޅިން ދަތުރުކުރާ އާންމު އުޅަނދުފަހަރަށާއި ފަޅުވެރިންނަށް ހަމަލާދިނުމަށް އީރާނުން ބޭނުންކުރާ އަސްކަރީ ގާބިލުކަން ކުޑަކޮށް، އެ ވަސީލަތްތައް ނައްތާލުން ކަމަށެވެ.
އީރާނުގެ ދައުލަތުގެ މީޑިއާ، އައި.އާރު.އައި.ބީ އިން ބުނި ގޮތުގައި އެ ގައުމުގެ ހުޅަނގު ދެކުނު ޚޫޒިސްތާން ޕްރޮވިންސްގެ ބަނދަރު ސިޓީތަކެއް ކަމަށްވާ މަހްޝަހްރު އަދި އިމާމް ޚުމައިނީން ބާރުގަދަ ގޮވުންތަކެއްގެ އަޑު ވަނީ އިވިފަ އެވެ. މީގެ އިތުރުން އީރާނުގެ ދެކުނު އައްސޭރީގެ ހުރްމުޒްގާން ޕްރޮވިންސްގެ ސިރިކް އަދި ޖާސްކް ސިޓީ ކައިރިންނާއި، ބުޝެހްރު ޕްރޮވިންސްގެ ޚޯރްމޫޖް ސިޓީ ކައިރިން ވެސް ގޮވުންތަކެއް ރިޕޯޓްކޮށްފައިވެ އެވެ.
އައި.އާރު.އައި.ބީ އިން އިތުރަށް ބުނި ގޮތުގައި އީރާނުގެ ހުޅަނގު އުތުރުގެ ސިޓީއެއް ކަމަށްވާ ތަބްރީޒް ކައިރިން ތިން ގޮވުމެއްގެ އަޑު އިވިފައިވެ އެވެ. ހަމައެއާއެކު، އީރާނުގެ ފާރްސް ނިއުސް އެޖެންސީން ރިޕޯޓްކޮށްފައިވާ ގޮތުގައި، އެ ގައުމުގެ އިރުދެކުނު ސިސްތާން އަދި ބަލޫޗިސްތާން ޕްރޮވިންސްގެ ކޮނަރަކް އަދި ޗަބަހާރު ސިޓީގައި ވަނީ އެއާ ޑިފެންސް ސިސްޓަމްތައް އެކްޓިވޭޓްކޮށްފަ އެވެ.
އީރާނުގެ ވެރިރަށް ތެހެރާނުން އަލްޖަޒީރާއިން ރިޕޯޓްކުރި ގޮތުގައި، އެމެރިކާގެ އެންމެ ފަހުގެ ހަމަލާތައް އަމާޒުވެފައިވަނީ އީރާނުގެ ދެކުނު އައްސޭރިފަށަށެވެ. އޭނާ އިތުރަށް ފާހަގަކުރި ގޮތުގައި، ތަބްރީޒަށް ދިން ހަމަލާތައް ކަށަވަރުވެއްޖެނަމަ، މިއީ މި ފަހަކަށް އައިސް މަސްރަހު ގޯސްވި ފަހުން އެ ގައުމުގެ ހުޅަނގު އުތުރުގެ ސިޓީއަކަށް ހަމަލާދިން ފުރަތަމަ ފަހަރެވެ. އޭނާ ބުނީ ދެ ފަރާތުގެ މެދުގައި ހަމަލާ ބަދަލުކުރުން މިހާރު އާންމުވެފައިވާ ކަމަށާއި، އީރާނުން ވެސް ބަދަލުހިފުމުގެ ހަމަލާތަކެއް ދޭނެ ކަމަށް ބުނަމުންދާ ކަމަށެވެ. އެގޮތުން ލޮރެސްތާން ޕްރޮވިންސުން ފޮނުވާލި މިސައިލްތަކެއް ސަރަހައްދުގައިވާ އެމެރިކާގެ އަސްކަރީ މަރުކަޒުތަކަށް އަމާޒުވަމުންދާ ކަމަށް އީރާނުގެ މީޑިއާތަކުން ދަނީ ރިޕޯޓްކުރަމުންނެވެ.
މީގެ ކުރިން ކުވެއިތުން ވަނީ އެ ގައުމަށް ކުރިމަތިވި "ދުޝްމަނުންގެ ޑްރޯން ހަމަލާތަކަކަށް" ހުރަސްއަޅާފައިވާ ކަމަށް ބުނެފައެވެ. އަދި އާދިއްތަ ދުވަހު ބަހްރޭންގައި ދެވަނަ ފަހަރަށް ވައިގެ ހަމަލާގެ އިންޒާރުދޭ ސައިރަންގެ އަޑު ވަނީ އިވިފަ އެވެ. އުރުދުންގައި ވެސް ސައިރަންގެ އަޑު އިވިފައިވާއިރު، އެ ގައުމުގެ އަސްކަރިއްޔާއިން ބުނީ އީރާނުން ފޮނުވާލި ތިން މިސައިލެއް ވައްޓާލާފައިވާ ކަމަށެވެ. ކުވެއިތު ސަރުކާރުން ބުނި ގޮތުގައި އާދިއްތަ ދުވަހު އެ ގައުމުގެ ފެން އުފައްދާ ޕްލާންޓަކަށް ޖެހިޖެހިގެން ދެވަނަ ދުވަހު ހަމަލާދިނުމުގެ ސަބަބުން އަލިފާނުގެ ހާދިސާއެއް ހިނގާފައިވެ އެވެ. މިއީ އާންމުންގެ ޒަރޫރީ ޚިދުމަތްތަކަށް އަމާޒުކޮށް ދިން ސީދާ ހަމަލާއެއް ކަމަށް ކުވެއިތުން ސިފަކުރެ އެވެ.
އީރާނާއި އެމެރިކާއިން ވެސް ދަނީ ކަނޑުދަތުރުފަތުރު ކުރާ އުޅަނދުތަކަށް އަމާޒުކޮށް ފިޔަވަޅުތައް އަޅަމުންނެވެ. އެގޮތުން އީރާނުގެ ބަނދަރުތައް ބަންދުކޮށް "ނޭވަލް ބްލޮކޭޑް" އެއް ތަންފީޒު ކުރަމުންދާ ކަމަށް ވޮޝިންޓަނުން ބުނާއިރު، ހުރްމުޒް ކަނޑުއޮޅިން ދަތުރުކުރުމުގައި އީރާނުން ކަނޑައަޅާފައިވާ އުސޫލުތަކާ ޚިލާފުވާ އުޅަނދުތަކަށް ހަމަލާދޭނެ ކަމަށް ތެހެރާނުން ބުނެ އެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން އާދިއްތަ ދުވަހު ބުނި ގޮތުގައި، އެމެރިކާގެ އެހީތެރިކަމާއެކު "ނުރައްކާތެރި މަގަކުން" ކަނޑުއޮޅި ހުރަސްކުރަން އުޅުނު ހަތަރު އުޅަނދަކަށް އިންޒާރު ދިނުމުން، އޭގެ ތެރެއިން ދެ އުޅަނދެއް ވަނީ އެނބުރި ގޮސްފައެވެ. އަދި އަނެއް ދެ އުޅަނދަށް "ހާދިސާއެއް" ކުރިމަތިވި ކަމަށް ބުނި ނަމަވެސް، އެކަމުގެ އިތުރު ތަފްސީލެއް ދީފައެއް ނުވެ އެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނީ، އެމެރިކާއިން އަޅާފައިވާ ބަންދުކުރުމުގެ ފިޔަވަޅުތަކަށް ފުރިހަމައަށް ބޯލެނބުމަށްޓަކައި، ވިޔަފާރި ކުރާ ހަ އުޅަނދެއްގެ މިސްރާބު ބަދަލުކޮށް، އިތުރު އެއް އުޅަނދު ބޭނުންނުކުރެވޭ ވަރަށް ހަލާކުކޮށްލާފައިވާ ކަމަށެވެ.
މީގެ އިތުރުން، ހޮނިހިރު ދުވަހު އިރާގުގެ އުތުރުގައި އީރާނުގެ ވައްޓާލާފައިވާ ޑްރޯންއެއްގެ ގޮވާތަކެތި ނައްތާލުމުގެ މަސައްކަތުގެ ތެރޭގައި އެމެރިކާ ސިފައިންގެ މީހަކު މަރުވެފައިވާ ކަމަށް ސެންޓްކޮމް އިން ވަނީ ބުނެފަ އެވެ. އަދި ހުކުރު ދުވަހު އުރުދުންގައި އީރާނުން ދިން ނުރައްކާތެރި ހަމަލާގެ ސަރަހައްދުން "ވަކިނުކުރެވޭ އިންސާނީ ހަށިގަނޑުގެ ބައިތަކެއް" ފެނިފައިވާ ކަމަށާއި، އެއީ ކާކުތޯ ބެލުމުގެ ތަހުގީގު ކުރިއަށްދާ ކަމަށް ވެސް ބުނެފައިވެ އެވެ.
ހުކުރު ދުވަހުގެ ހަމަލާގައި އެމެރިކާގެ ދެ ސިފައިން މަރުވެފައިވާއިރު، ތިންވަނަ މީހަކު ވަނީ ގެއްލިފަ އެވެ.
މި ހަނގުރާމަ ފެށުނު ފަހުން މިހާތަނަށް އެމެރިކާގެ 17 ސިފައިން މަރުވެފައިވާއިރު، 420 އަށްވުރެ ގިނަ މީހުން ވަނީ ޒަޚަމްވެފަ އެވެ.
ފެބްރުއަރީ 28 ވަނަ ދުވަހު އެމެރިކާއާއި އިސްރާއީލުން އީރާނަށް ހަމަލާދިނުމާއެކު ފެށުނު މި ހަނގުރާމައިގައި މިހާތަނަށް އެތައް ހާސް ބަޔަކު ވަނީ މަރުވެފަ އެވެ. މީގެ ތެރޭގައި ގިނައީ އީރާނާއި ލުބުނާނުގެ ރައްޔިތުންނެވެ. މި ހަމަނުޖެހުންތަކުގެ ސަބަބުން ދުނިޔޭގެ ހަކަތައިގެ ސަޕްލައިއަށް ބޮޑެތި ބުރޫ އަރާފައިވާއިރު، ދުނިޔޭގެ ބާޒާރުގައި ތަކެތީގެ އަގު އުފުލިދާނެ ކަމުގެ ބިރުވެރިކަން ވަނީ އުފެދިފަ އެވެ.
