އީރާނުން އެމެރިކާގެ އެމްކިއު-9 ރީޕަރ ޑްރޯނެއް ވައްޓާލާ ވީޑިއޯ އެއް ހާމަކޮށްފި

އީރާނާ ދެކޮޅަށް އެމެރިކާއިން ފަށާފައިވާ އުދުވާނީ ހަމަލާތަކާ ދެކޮޅަށް ކުރިއަށްގެންދާ ދިފާއީ އޮޕަރޭޝަންތަކުގެ ތެރެއިން، އެމެރިކާގެ އެމްކިއު-9 ރީޕަރ މަރުކާގެ ޑްރޯނެއް އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ހުއްޓުވައި ބަޑިޖަހައި ވައްޓާލައިފި އެވެ.

އައިއާރުޖީސީގެ ޕަބްލިކް ރިލޭޝަންސް ޑިޕާޓްމަންޓުން އާދިއްތަ ދުވަހު ނެރުނު ބަޔާނެއްގައި ބުނެފައިވަނީ، އީރާނުގެ ހުޅަނގު ދެކުނުގެ ސިޓީއެއް ކަމަށްވާ އަހްވާޒްގެ ވައިގެ ސަރަހައްދުން މި ޑްރޯން ވައްޓާލާފައިވަނީ އައިއާރުޖީސީ އެއަރޯސްޕޭސް ފޯސްގެ އެންމެ ފަހުގެ ކުރިއަރާފައިވާ ވައިގެ ދިފާއީ ނިޒާމެއް ބޭނުންކޮށްގެން ކަމަށެވެ. މި ނިޒާމަކީ ގައުމުގެ އިންޓަގްރޭޓެޑް އެއަރ ޑިފެންސް ނެޓްވޯކްގެ ދަށުން ހިންގާ ނިޒާމެކެވެ.

މި ހާދިސާ ހިނގާފައިވަނީ އީރާނުގެ އާންމުން ދިރިއުޅޭ ސަރަހައްދުތަކަށާއި އުމްރާނީ ވަސީލަތްތަކަށް އަމާޒުކޮށް އެމެރިކާއިން ދެމުންދާ ހަމަލާތަކަށް ދެ ހަފުތާ ވެފައިވަނިކޮށެވެ.

އެތައް ބަޔަކު މަރުވި އެމެރިކާގެ މި ހަނގުރާމަވެރި ޖަރީމާތަކަށް ރައްދު ދިނުމުގެ ގޮތުން، އީރާނުގެ ސަލާމަތީ ބާރުތަކުން ވަނީ އެ ސަރަހައްދުގައި ހުރި އެމެރިކާގެ އިސްތިރާތީޖީ އަމާޒުތަކަށް ވަރުގަދަ ރައްދު ހަމަލާތަކެއް ދީފަ އެވެ.

އެމެރިކާއާއި އިސްރާއީލުން ގުޅިގެން އީރާނާ ދެކޮޅަށް ޣައިރު ގާނޫނީ އުދުވާނީ ހަނގުރާމައެއް ފެށީ ފެބްރުއަރީ މަހުގެ 28 ވަނަ ދުވަހު އެވެ. ނަމަވެސް، އީރާނުން ދެއްކި ހިތްވަރުގަދަ ދިފާއާއި، ކާމިޔާބު ރައްދު ހަމަލާތަކުގެ އިތުރުން ހުރްމުޒް ކަނޑުއޮޅީގެ މައްޗަށް އޮތް ބާރުވެރިކަމުގެ ސަބަބުން، 40 ދުވަސް ފަހުން އޭޕްރިލް މަހުގެ 8 ވަނަ ދުވަހު ހަނގުރާމަ ހުއްޓާލުމަށް ދުޝްމަނުންނަށް މަޖުބޫރުވި އެވެ.

މިދިޔަ ޖޫން މަހުގެ 17 ވަނަ ދުވަހު، ޕާކިސްތާނުން މެދުވެރިއެއްގެ ދައުރު އަދާކޮށްގެން ތެހެރާނާއި ވޮޝިންޓަނާ ދެމެދު ވަނީ ފަހުމުނާމާއެއްގައި ސޮއިކޮށްފަ އެވެ. މި އެއްބަސްވުމުގައި ހުރިހާ ދިމާލަކުން ހަނގުރާމަވެރި އަމަލުތައް ދާއިމީކޮށް ހުއްޓާލުމަށާއި، ކުރިއަށް އޮތް 60 ދުވަހުގެ ތެރޭގައި ފަހުގެ އެއްބަސްވުމަކަށް ދިއުމަށް ދެ ފަރާތުން މަޝްވަރާ ކުރުމަށް ކަނޑައަޅާފައިވެ އެވެ.

އެހެންނަމަވެސް، ވޮޝިންޓަނުން ވަނީ މި ފަހުމުނާމާގެ ހުރިހާ މާއްދާތަކާ ޚިލާފުވެފަ އެވެ. މިއާއެކު އީރާނުން ވަނީ އެމެރިކާއަށް ވަރުގަދަ ރައްދެއް ދީ، "މި ސަރަހައްދަށް އެމެރިކާއިން ނުފޫޒު ފޯރުވުން ހުއްޓާލަންދެން" ހުރްމުޒް ކަނޑުއޮޅި ބަންދުކޮށްފައި އޮންނާނެ ކަމަށް އިއުލާންކޮށްފަ އެވެ.