ޔަމަނުގެ ވެރިރަށް ސަންޢާ އަށް އީރާނުގެ މަތިންދާބޯޓެއް ޖެއްސުން ހުއްޓުވަން އެ ގައުމުގެ ސަރުކާރުގެ ފައުޖުތަކުން އެއަރޕޯޓަށް ހަމަލާ ދީފި

އީރާނުގެ މަތިންދާބޯޓެއް ޖެއްސުން ހުއްޓުވުމަށްޓަކައި، ޔަމަނުގެ ވެރިރަށް ސަންޢާގެ އެއާޕޯޓަށް އެ ގައުމުގެ ބައިނަލްއަގުވާމީ ގޮތުން ބަލައިގަންނަ ސަރުކާރުގެ ފައުޖުތަކުން ހަމަލާއެއް ދީފި ކަމަށް އެ ސަރުކާރުން ބުނެފި އެވެ.

ޔަމަނުގެ ވެރިރަށް ސަންޢާގެ އިތުރުން، ރަތްކަނޑުގެ އައްސޭރީގައި އޮންނަ ހުދައިދާ ބަނދަރު ހިމެނޭހެން އެ ގައުމުގެ އުތުރުގެ ބޮޑު ބައެއް ކޮންޓްރޯލް ކުރަނީ އީރާނަށް ތާއީދުކުރާ ހޫޘީ ހަނގުރާމަވެރިންނެވެ. ސައުދީ އަރަބިއްޔާ އާއި ގަލްފުގެ އެހެން ގައުމުތަކުގެ އެހީތެރިކަން ލިބޭ ޔަމަނުގެ ރަސްމީ ސަރުކާރު ގާއިމުވެފައިވަނީ ދެކުނު އައްސޭރީގައި އޮންނަ އަދަންގަ އެވެ.

ހޯމަ ދުވަހު ޔަމަނުގެ ސަރުކާރުން ނެރުނު ބަޔާނެއްގައި ބުނެފައިވަނީ، އީރާނުގެ މަދަދުލިބޭ ހޫޘީ ޓެރަރިސްޓް ޖަމާއަތުން ޔަމަނުގެ ގައުމީ އެއާލައިންގެ ބޯޓުތައް ސަންޢާ އެއާޕޯޓަށް ޖެއްސުން ހުއްޓުވާފައިވާ ކަމަށެވެ. އަދި އޭގެ ބަދަލުގައި އީރާނުގެ މަތިންދާބޯޓުތައް ޔަމަނުގެ ވައިގެ ސަރަހައްދަށް ވަނުމަށް ހޫޘީން ބާރުއަޅަމުންދާތީ، އެކަން ހުއްޓުވުމަށްޓަކައި އެއާޕޯޓުގެ ރަންވޭއަށް އަމާޒުކޮށް ހަމަލާދީފައިވާ ކަމަށް އެ ބަޔާނުގައިވެ އެވެ.

މި ހަމަލާގެ ކުރިން، ޔަމަނުގެ ޑިފެންސް މިނިސްޓްރީން ވަނީ އާންމު ރައްޔިތުންނާއި، މުވައްޒަފުންނާއި، ޑިޕްލޮމެޓިކް މިޝަންތަކުގެ އިތުރުން އިންސާނީ އެހީ ފޯރުކޮށްދޭ ޖަމާއަތްތަކުން ވަގުތުން އެއާޕޯޓާއި އެ ސަރަހައްދު ދޫކޮށް ދިއުމަށް އަންގާފަ އެވެ.

ހޫޘީން ވަނީ މި ހަމަލާއަށް ރައްދުދޭނެ ކަމަށް ބުނެފަ އެވެ. އަދި އެއްވެސް ހެއްކެއް ދެއްކުމެއްނެތި، މި ހަމަލާގެ ޒިންމާ ހޫޘީން އެޅުވީ ސައުދީ އަރަބިއްޔާގެ ބޮލުގަ އެވެ.

ހޫޘީންގެ އަސްކަރީ ތަރުޖަމާނު ޔަހްޔާ ސާރީ އިންޒާރު ދެއްވި ގޮތުގައި، މި އުދުވާނަށް ރައްދު ނުދީ އަދި އަދަބު ނުދީ އެ ޖަމާއަތުން ދޫކޮށްނުލާނެ އެވެ.

މި ހާދިސާއާ ގުޅިގެން ސައުދީ އަރަބިއްޔާގެ ކަމާބެހޭ ފަރާތްތަކުން އަދި އެއްވެސް އެއްޗެއް ބުނެފައެއް ނުވެ އެވެ.

ދުވަހުގެ ފަހުގެ ވަގުތެއްގައި ހޫޘީން ރިޕޯޓުކޮށްފައިވާ ގޮތުގައި، އީރާނުގެ ތެހެރާނުން ވަފުދެއް ގޮވައިގެން ދަތުރުކުރި އެ ބޯޓު މިހާރު ވަނީ ރަތްކަނޑުގެ އައްސޭރީގައި އޮންނަ ހުދައިދާ އެއާޕޯޓަށް ޖައްސާފަ އެވެ.

ހޫޘީން ހިންގާ އަލް-މަސީރާ ޓީވީން އެ ޖަމާއަތުގެ ޓްރާންސްޕޯޓް މިނިސްޓަރާ ހަވާލާދީ ބުނެފައިވަނީ، އީރާނުގެ ބޯޓު ގައުމުގެ ފަސްގަނޑަށް ޖައްސާފައިވާ ކަމަށާއި، އެ ބޯޓުގައި ބަލިމީހުންނާއި ތާށިވެފައި ތިބި ރައްޔިތުންގެ އިތުރުން ޔަމަނުގެ ރަސްމީ ވަފުދެއް ތިބި ކަމަށެވެ.

މި މަހުގެ ކުރީކޮޅު ސަންޢާއަށް ޖެއްސި އީރާނުގެ ބޯޓަކަށް ސައުދީން ހަމަލާދިން ކަމަށް ބުނެ ހޫޘީން ކުރި ތުހުމަތުތަކާ ގުޅިގެން ދެފަރާތުގެ މެދުގައި ވަނީ ނުތަނަވަސްކަން އިތުރުވެފަ އެވެ. އެ ބޯޓު ސަންޢާއިން ފުރީ ހޫޘީންގެ ވަފުދެއް ގޮވައިގެންނެވެ.

އެ ދުވަސްވަރު ހޫޘީން ވަނީ، ސައުދީން ޔަމަނުގެ ވައިގެ ސަރަހައްދަށް ވަދެ ނުވަތަ އަލުން ހަމަލާއެއް ދީފިނަމަ، ސައުދީގެ އެއާޕޯޓުތަކާއި މުހިންމު ތަންތަނަށް ހަމަލާދޭނެ ކަމުގެ އިންޒާރު ދީފަ އެވެ.

އދ. މެދުވެރިވެގެން ގާއިމުކޮށްފައިވާ ހަނގުރާމަ ހުއްޓާލުމުގެ އެއްބަސްވުމާއެކު މެދުކެނޑިފައި އޮތް ހަމަލާ ބަދަލުކުރުންތައް، މި ފަހުގެ ކުރިމަތިލުންތަކާއެކު އަލުން ފެށިދާނެ ކަމުގެ ބިރު މިހާރު ވަނީ ބޮޑުވެފަ އެވެ.

ޔަމަނުގެ ބައިނަލްއަގުވާމީ ގޮތުން ބަލައިގަންނަ ސަރުކާރުގެ އިންފޮމޭޝަން މިނިސްޓަރު މުޢައްމަރު ބިން މުތަހަރު އަލް-އިރްޔާނީ ވިދާޅުވީ، ރެޑް ކްރޮސް (އައި.ސީ.އާރު.ސީ) އަށް ނިސްބަތްވާ މަތިންދާބޯޓެއް ހޫޘީން ސަންޢާ އެއާޕޯޓުގައި ހިފަހައްޓާފައިވާ ކަމަށާއި، އެ ބޯޓުގެ ޕައިލެޓާއި ކޯ-ޕައިލެޓް ވެސް ހައްޔަރުކޮށްފައިވާ ކަމަށެވެ.

ހޯމަ ދުވަހުގެ ހެނދުނު ޔަމަނުގެ ޑިފެންސް މިނިސްޓަރު ވިދާޅުވީ، އީރާނުގެ ބޯޓުތަކުން ޔަމަނުގެ ވައިގެ ސަރަހައްދުގައި ޚިލާފުވަމުންދާ ދިއުން ހުއްޓުވުމަށް އީރާނާއި ހޫޘީންނާއެކު ކުރި ޚާރިޖީ މަސައްކަތްތައް ނާކާމިޔާބުވެފައިވާ ކަމަށެވެ. އަދި ޔަމަނުގެ ވައިގެ ސަރަހައްދަށް ވަންނަ ކޮންމެ ދުޝްމަން ބޯޓަކަށް ލިބެންހުރި ހުރިހާ ވަސީލަތެއް ބޭނުންކޮށްގެން ސަރުކާރުގެ ފައުޖުތަކުން ރައްދުދޭނެ ކަމަށާއި، މީގެ ހުރިހާ ޒިންމާއެއް އުފުލަންޖެހޭނީ އީރާނުން ކަމަށް އޭނާ ވިދާޅުވި އެވެ.

ހޫޘީން ސަންޢާ ހިފައި، ޔަމަނުގެ ސަރުކާރު ބޭރުކޮށްލުމާ ގުޅިގެން، ސައުދީ އިސްވެ އޮންނަ ކޯލިޝަނުން ޔަމަނުގެ ދާޚިލީ ހަނގުރާމައިގެ ތެރެއަށް ވަނީ 2015 ވަނަ އަހަރު އެވެ. މި ހަނގުރާމައިގެ ސަބަބުން ގިނަ ބަޔަކު ހާލުގައި ޖެހި، ގައުމަށް ބޮޑެތި ގެއްލުންތަކެއް ލިބި، ބޮޑު ބަޑުހައިހޫނުކަމެއް ވަނީ ކުރިމަތިވެފައެވެ. އދ. އިން ސިފަކުރާ ގޮތުގައި ޔަމަނުގެ ހާލަތަކީ ދުނިޔޭގައި މިހާތަނަށް ކުރިމަތިވި އެންމެ ނުރައްކާތެރި އިންސާނީ ކާރިސާ އެވެ.