ޔަމަނުގެ ހޫޘީން ގެ ހަމަލާ އާ ގުޅިގެން ސައުދީގެ ސަލާމަތާއި ރައްކާތެރިކަން ކަށަވަރުކުރަން ދެމިއޮންނާނެ ކަމަށް އެމެރިކާ އިން ބުނެފި

ސައުދީ އަރަބިއްޔާގެ ސަލާމަތާއި ރައްކާތެރިކަން ކަށަވަރުކުރުމުގައި އެމެރިކާ ދެމިއޮންނާނެ ކަމަށް ހޯމަ ދުވަހުގެ ރޭ އެމެރިކާ ސަރުކާރުން ބުނެފިއެވެ. އެމެރިކާއިން މިހެން ބުނެފައިވަނީ އީރާނުގެ މަދަދުލިބޭ ހޫޘީ ހަނގުރާމަވެރިން ސައުދީއަށް ދެމުންދާ ހަމަލާތަކާ ދެކޮޅަށް ވޮޝިންޓަނުން އެ ގައުމަށް ފުރިހަމަ އެއްބާރުލުން ދޭނެކަން ހާމަކުރަމުންނެވެ.

އަލް އަރަބިއްޔާ އިނގިރޭސި އެޑިޝަނަށް މައުލޫމާތު ދެއްވަމުން އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނަކު ވިދާޅުވީ، އީރާނުގެ އެހީތެރިކަމާއެކު ހޫޘީން ދޭ ހަމަލާތަކާއި، އީރާނުގެ އުދުވާންތަކާ ދެކޮޅަށް އެމެރިކާ އޮތީ ސައުދީ އަރަބިއްޔާއާއެކު ސާބިތުކަމާއެކު ކަމަށެވެ. އަދި ސައުދީގެ ސަލާމަތާއި މުޅި ސަރަހައްދުގެ ހަމަޖެހުން ގާއިމުކުރުމަށް އެމެރިކާއިން އިސްކަންދޭނެ ކަމަށްވެސް އޭނާ ވިދާޅުވި އެވެ.

އެމެރިކާ އާއި ސައުދީ އަރަބިއްޔާގެ ގުޅުމަކީ މެދުއިރުމަތީގައި ވޮޝިންޓަނުން ގެންގުޅޭ ސިޔާސަތުގެ މައިގަނޑު އަސާސް ކަމަށް އެ އޮފިޝަލް ވިދާޅުވި އެވެ. މީގެއިތުރުން، ރައީސް ޑޮނަލްޑް ޓްރަމްޕްގެ ސަރުކާރުގައި ދެ ގައުމުގެ ދެމެދުގައި އޮތް އިސްތިރާތީޖީ ގުޅުން ކުރިއަށްވުރެ ބަދަހިވެފައިވާކަންވެސް އޭނާ ފާހަގަކުރެއްވި އެވެ.

ޔަމަނުގެ ހޫޘީންނާ ދެކޮޅަށް ކުރާ މަސައްކަތްތަކަށް އިސްކަންދީ، އެ ޖަމާއަތަށް އެހީތެރިކަން ފޯރުކޮށްދޭތީ އީރާނު ޒިންމާދާރުކުރުވުމުގެ މަސައްކަތް އެމެރިކާއިން މެދުކަނޑާނުލައި ކުރިއަށް ގެންދާނެ ކަމަށްވެސް ތަރުޖަމާނު ވިދާޅުވި އެވެ.

ރައީސް ޑޮނަލްޑް ޓްރަމްޕްގެ ސަރުކާރުން ވެރިކަމާ ހަވާލުވިތާ މާގިނަ ދުވަސްތަކެއް ނުވަނީސް، ހޫޘީންނަކީ ބޭރުގެ ޓެރަރިސްޓް ޖަމާއަތެއްގެ ގޮތުގައި ވަނީ އަލުން ކަނޑައަޅާފަ އެވެ.

ރަތްކަނޑުގެ ދަތުރުފަތުރުގެ މިނިވަންކަން ކަށަވަރުކުރުމަކީ އެމެރިކާގެ ގައުމީ ސަލާމަތާ ގުޅިފައިވާ މުހިންމު މަސްލަހަތެއް ކަމަށް ސްޓޭޓް ޑިޕާޓްމަންޓުގެ ތަރުޖަމާނު ވިދާޅުވި އެވެ.

އެމެރިކާގެ މި މަސްލަހަތުތަކަށް ނުރައްކާކުރާ، އީރާނުގެ މަދަދުލިބޭ ހޫޘީންނާއި ޔަމަނުގައި ހަރަކާތްތެރިވާ އެހެނިހެން ޓެރަރިސްޓް ޖަމާއަތްތަކާ ދެކޮޅަށް ކުރާ މަސައްކަތްތައް ވަރުގަދަކުރުމަކީ ކޮންމެހެން ކުރަންޖެހޭ ކަމެއް ކަމަށްވެސް ތަރުޖަމާނު ވިދާޅުވި އެވެ.