ޔަމަން އާއި ސައުދީގެ މަޝްރަހު ހޫނުވެ ހޫޘީން ސައުދީ އަށް މިސައިލް ހަމަލާ ދީފި

ޔަމަނުގެ ހޫޘީން ސައުދީ އަރަބިއްޔާގެ ދެކުނުގެ ސަރަހައްދުތަކަށް އަމާޒުކޮށް ފޮނުވާލި ބެލިސްޓިކް މިސައިލްތަކެއް އެ ގައުމުގެ ވައިގެ ދިފާއީ ނިޒާމުން ނައްތާލާފައިވާ ކަމަށް ސައުދީގެ މިނިސްޓްރީ އޮފް ޑިފެންސުން ހޯމަ ދުވަހު ބުނެފި ކަމަށް އަލް އަރަބިއްޔާ އިން ރިޕޯޓު ކޮށްފި އެވެ.

ހަމައެއާއެކު، ހޯމަ ދުވަހު ޔަމަނުގެ ސަންޢާ އިންޓަނޭޝަނަލް އެއާޕޯޓަށް ދިން ހަމަލާ އަކީ ސައުދީ އަރަބިއްޔާ އިން ދިން ހަމަލާ އެއް ކަމަށް ބުނެ، ސަންޢާގައި ހުންނަ ޔަމަނުގެ ފޮރިން މިނިސްޓްރީން ވަނީ އެކަން ކުށްވެރިކޮށްފަ އެވެ. އެ މިނިސްޓްރީން ބުނި ގޮތުގައި މި ހަމަލާއަކީ ދެ ގައުމުގެ ދެމެދުގައި އޮތް ހަމަލާބަދަލުކުރުން ހުއްޓާލުމުގެ އެއްބަސްވުމަށް ނިމުން އައިސް، ހަނގުރާމައިގެ އާ މަރުހަލާއެއް ފެށުނު ކަމުގެ ނިޝާނެކެވެ.

ހޯމަ ދުވަހު ނެރުނު ބަޔާނެއްގައި އެ މިނިސްޓްރީން ބުނީ، ޔަމަނުގެ ހައްގުތައް ފުރިހަމައަށް ހޯދުމަށްޓަކައި އެ ގައުމުން އާ މަރުހަލާއަކަށް ފަސްޖެހުމެއް ނެތި ވަންނާނެ ކަމަށެވެ. އަދި ސައުދީ އަރަބިއްޔާއިން ދެމުންދާ އުދުވާނީ ހަމަލާތަކުގެ ސަބަބުން އެ ގައުމު އިސްތިރާތީޖީ ގޮތުން ބޮޑު ތާށިކަމެއްގެ ތެރެއަށް ވެއްޓި، އޭގެ ބަދަލުގައި ބޮޑު އަގެއް ދެއްކުމަށް ކުރިމަތިލާން ޖެހޭނެ ކަމަށް ވެސް އެ ބަޔާނުގައި އިންޒާރު ދީފައިވެ އެވެ.

ސަންއާ އެއަރޕޯޓަށް ދިން ހަމަލާ އަކީ ސައުދީ އަރަބިއްޔާ އިން ދިން ހަމަލާ އެއް ކަމަށް ހޫޘީން ބުނި ނަމަވެސް އެކަމުގެ ހެއްކެއް ދައްކާފަ އެއް ނުވެ އެވެ.

މީގެ އިތުރުން، ޔަމަނުގެ ހަތިޔާރު އެޅި ބާރުތަކުގެ ތަރުޖަމާނު ބްރިގޭޑިއާ ޖެނެރަލް ޔަހްޔާ ސާރީ ވިދާޅުވީ، ސައުދީގެ އުދުވާނަށް އަދަބު ނުދީ ދޫކޮށްނުލާނެ ކަމަށެވެ. އަދި ސައުދީން މިވަނީ މަސްލަހަތު ފިނިކުރުމުގެ މަރުހަލާ ނިމުމަކަށް ގެނެސްފައި ކަމަށާއި، މީގެ ސަބަބުން ކުރިމަތިވެދާނެ ހުރިހާ ނަތީޖާއެއްގެ ޒިންމާ އެ ގައުމުން އުފުލަން ޖެހޭނެ ކަމަށް ވެސް އޭނާ ވިދާޅުވި އެވެ.

ޔަމަނުގެ މިނިސްޓްރީ އޮފް ޓްރާންސްޕޯޓުން ނެރުނު ބަޔާނެއްގައި ބުނެފައިވަނީ، ސައުދީން ސަންޢާ އެއާޕޯޓަށް ބޮން އެޅުމާއި ޔަމަނުގެ ވައިގެ ސަރަހައްދަށް ވަނުމަކީ، އެމެރިކާއާއި ޒަޔަނިސްޓުންގެ ބާރުއެޅުމާއެކު ސައުދީ ސަރުކާރުން ޔަމަން ބަންދުކޮށްގެން ގެންގުޅޭ ގެންގުޅުން ދެމެހެއްޓުމަށް ބޭނުންވާ ކަމުގެ ހެއްކެއް ކަމަށެވެ. މީގެ އިތުރުން، ޔަމަނުގެ މަތީ ފަންތީގެ މަސްދަރަކުން "އަލް މަޔާދީން" އަށް މައުލޫމާތު ދެމުން ބުނީ، ސަންޢާ އެއާޕޯޓަށް އަޅާފައިވާ ހުރަސްތައް ނައްތާލުމަށް ނިންމާފައިވާ ނިންމުމަކީ ބަދަލުކުރެވޭނެ ނިންމުމެއް ނޫން ކަމަށެވެ. އަދި ޔަމަނުގެ ސިފައިން ތިބީ ކޮންމެ ފަދަ ހާލަތަކަށްވެސް ފުރިހަމައަށް ތައްޔާރުވެގެން ކަމަށް އެ މަސްދަރުން ފާހަގަކުރި އެވެ.

އެ މަސްދަރުން އިތުރަށް ބުނީ، މަސްލަހަތު ގޯސްވާ ފަދަ އެއްވެސް އަމަލެއް ސައުދީން ހިންގައިފިނަމަ، އޭގެ ފުރިހަމަ ނަތީޖާއާ އެ ގައުމުން ކުރިމަތިލާން ޖެހޭނެ ކަމަށެވެ.

ޔަމަނުގެ އެކި ސަރަހައްދުތަކުގައި ސުލްހައާއި ހަމަޖެހުން ގާއިމުކުރުމަށް ހުރަސްއަޅަނީ ސައުދީ އަރަބިއްޔާ ކަމަށް އެ މަސްދަރުން ތުހުމަތުކުރި އެވެ. އަދި ސައުދީގެ އިސްވެރިންނަށް މިހާރުގެ ހާލަތު ރަނގަޅަށް ވަޒަންކުރަން ނޭނގޭ ކަމަށާއި، އެމީހުން ކުއްލި ނިންމުންތައް ނިންމުމުގައި ބަރޯސާވަނީ އެ ގައުމުން ކުއްޔަށް ހިފާފައިވާ ހަނގުރާމަވެރިންގެ މައްޗަށް ކަމަށް ވެސް ބުންޏެވެ.

ސައުދީ ސަރުކާރާއި އެ ގައުމުން ކުއްޔަށް ހިފާފައިވާ މީހުންނަށް ހެދޭ ކޮންމެ ގޯހެއްގެ ސަބަބުން މަސްލަހަތު އާ ހަރުފަތަކަށް ބަދަލުވެގެންދާނެ ކަމަށާއި، ސައުދީގެ އިސްވެރިންނަށް އެމީހުންގެ އެޖެންޓުންގެ ފަހަތުގައި ފިލައި ނުތިބެވޭނެ ކަމަށް ވެސް އިންޒާރު ދިނެވެ.

އަދި ސައުދީން ކުރާ ކޮންމެ މޮޔަ ކަމެއްގެ ނަތީޖާ، އެ ގައުމުގެ އިގްތިސާދާއި، އެއާޕޯޓުތަކާއި ބަނދަރުތަކަށް އުފުލަން ޖެހޭނެ ކަމަށް ވެސް އެ މަސްދަރުން އިންޒާރު ދީފައިވެ އެވެ.

މީގެ އިތުރުން، އަންސާރުﷲ ހަރަކާތުގެ ސިޔާސީ ގޮފިން ނެރުނު ބަޔާނެއްގައި ބުނީ، ސައުދީ ސަރުކާރުން ނުރައްކާތެރި ފިޔަވަޅެއް އަޅައި، ސަންޢާ އިންޓަނޭޝަނަލް އެއާޕޯޓަށް ބޮން އެޅީ ސަންޢާ ސަރުކާރުގެ ވަފުދު އެނބުރި ގައުމަށް އައުން ހުއްޓުވުމަށް ކަމަށާއި، ނަމަވެސް އެ މަސައްކަތް ނާކާމިޔާބުވެފައިވާ ކަމަށެވެ. އެ ބަޔާނުގައި ބުނެފައިވަނީ، ސަންޢާ އެއާޕޯޓަށް ހަމަލާދިނުމަކީ ޔަމަނުގެ ރައްޔިތުންނާ ދެކޮޅަށް ހިންގި ވަރަށް ބޮޑު އުދުވާނެއް ކަމަށާއި، އެއީ ގައުމުގެ އިސްތިގުލާލަށް އަރައިގަނެ، ބައިނަލްއަގުވާމީ ގާނޫނުތަކާއި މުއާހަދާތަކާ ކަނޑައެޅިގެން ޚިލާފަށް ހިންގި އަމަލެއް ކަމަށެވެ. އަދި މި ހަމަލާއިން ހާމަވަނީ އެމެރިކާގެ އެހީތެރިކަމާއެކު ސައުދީން ޔަމަނާ މެދު ބާއްވާ ނަފުރަތާއި ޖަރީމާގެ މިންވަރު ކަމަށް ވެސް ބުނެފައިވެ އެވެ.

އެ ބަޔާނުގައި އިތުރަށް ބުނެފައިވަނީ، މި ވައިގެ ހަމަލާއަކީ ވޮޝިންޓަނުން ބޭނުންވާ ގޮތަށް، ވޭތުވެދިޔަ 11 އަހަރު ވަންދެން ޔަމަނަށް އަޅާފައިވާ ބޭއިންސާފު ހިސާރުކުރުން ދެމެހެއްޓުމަށް ދިން ހަމަލާއެއް ކަމަށެވެ.

އަންސާރުﷲ ގެ ސިޔާސީ ގޮފިން ބުނި ގޮތުގައި، ސަންޢާ އިންޓަނޭޝަނަލް އެއާޕޯޓަށް ސައުދީން ދިން އުދުވާނީ ހަމަލާއަށް ރައްދު ދިނުމުގެ ހައްގު ޔަމަނުގެ ރައްޔިތުންނަށް ލިބިގެންވެ އެވެ.