އެމްޕީއެލް ގެ ޑިރެކްޓަރުންގެ ބޯޑުގެ އެގްޒެކްޓިވް މެންބަރުކަމަށް ލަމްއާން އައްޔަންކޮށްފި
މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ބޯޑަށް ގެނައި ބަދަލާއެކު، ސަރުކާރުގެ އެކި ކުންފުނިތަކުގެ އިސް މަގާމުތަކަށް އައު ބޭފުޅުން އައްޔަންކުރުމުގެ މަސައްކަތް ދަނީ ބާރު ސްޕީޑުގައި ކުރިއަށް. މިގޮތުން މިފްކޯ އާއި ޕީސީބީގެ އިސްވެރިންނަށް ވެސް ބަދަލުތަކެއް ގެނެސްފައިވާއިރު، މިއީ ޚަރަދު ކުޑަކޮށް ހިންގުން ހަރުދަނާކުރުމަށް ރައީސުލްޖުމްހޫރިއްޔާ ގެންގުޅުއްވާ ސިޔާސަތުގެ ދަށުން ކުރެވޭ ކަމެއް. ނަމަވެސް، މި ބަދަލުތަކުގެ ސަބަބުން ޚިދުމަތްތަކަށް ކުރާނެ އަސަރާ މެދު އާންމު ރައްޔިތުންގެ މެދުގައި ވަނީ ސުވާލު އުފެދިފަ.
އެމްޕީއެލް ގެ ބޯޑަށް އައްޔަންކުރި ލަމްޢާން | ޕީސީބީ
މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ޑިރެކްޓަރުންގެ ބޯޑުގެ އެގްޒެކްޓިވް މެންބަރުކަމުގެ މަގާމަށް މ. ހަޒާރީވިލާ، މުޙައްމަދު ލަމްޢާން ހުކުރު ދުވަހު އައްޔަންކޮށްފި އެވެ.
މި އައްޔަންކުރުމާ އެކު އެ މަގާމުގައި ހުންނެވި ހ. އާހަމަ، އިބްރާހިމް ޒިޔަތު ވަނީ އެ މަގާމުން ވަކިކޮށްފަ އެވެ.
މި މަގާމާ ހަވާލުވުމަށްޓަކައި ބުރާސްފަތި ދުވަހު ލަމްޢާން ވަނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑެޕިއުޓީ މެނޭޖިން ޑިރެކްޓަރުކަމުގެ މަގާމުން އިސްތިއުފާ ދެއްވާފަ އެވެ. ލަމްޢާން އަކީ ސަރުކާރު ކުންފުނިތަކުގެ މަތީ މަގާމުތަކުގައި ތަޖުރިބާކާރު ބޭފުޅެކެވެ. މީގެ ކުރިން އޭނާ ވަނީ ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމު ފުރުއްވާފަ އެވެ. އަދި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީގެ ޗީފް ހިއުމަން ރިސޯސް އޮފިސަރުގެ މަގާމާއި ޗީފް ޕްރޮކިއުމަންޓް އޮފިސަރުގެ މަގާމު ވެސް ފުރުއްވާފައިވެ އެވެ.
އެމްޕީއެލްގެ ޑެޕިއުޓީ ސީއީއޯ އަކަށް އިބްރާހީމް ޒިޔަތު އައްޔަންކޮށްފައިވަނީ މާރިޗު 6 ވަނަ ދުވަހު އެވެ. ޒިޔަތު އަކީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީގެ ކުރީގެ ސީއީއޯ އެވެ. ނަމަވެސް ހުކުރު ދުވަހު އޭނާ އެ މަގާމުން ވަކިކޮށްފައިވާއިރު، ވަކިކުރި ސީދާ ސަބަބެއް ސަރުކާރުން ހާމަކޮށްފައެއް ނުވެ އެވެ.
މި ބަދަލުތައް ގެނެސްފައި މި ވަނީ އެޕްރީލް 4 ވަނަ ދުވަހު ބ ޭއްވި އިންތިހާބު ތަކުން ސަރުކާރަށް ލިބުނު ބޮޑު ނާކާމިޔާބީ އާއެކު ސަރުކާރުގެ ހިންގުމަށް ބޮޑެތި ބަދަލު ތަކެއް ގެންނަމުންދާ ދަނޑިވަޅެއްގަ އެވެ.
އެ ގޮތުން، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) ގެ މެނޭޖިން ޑިރެކްޓަރު އަދި ޗީފް އެގްޒެކްޓިވް އޮފިސަރުގެ މަގާމަށް، ޕީސީބީގެ ރައީސްކަން ކުރެއްވި މުޙައްމަދު އަނަސް ބުރާސްފަތި ދުވަހު ވަނީ އައްޔަންކޮށްފަ އެވެ. އަދި، ޕީސީބީގެ ރައީސް ކަމަށް 2015 އިން 2019 އަށް އެ މަގާމު އަދާކުރެއްވި މުޙައްމަދު ނިޒާރު ވަނީ އަލުން އައްޔަންކުރައްވާފަ އެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުއިއްޒު ވަނީ ސަރުކާރު ހިންގުމުގެ ޚަރަދު ކުޑަކުރުމަށް ކުންފުނިތަކުގެ ހިންގުމަށް ގިނަ ބަދަލުތަކެއް ގެންނާނެކަން އިއުލާނުކޮށްފަ އެވެ. ނަމަވެސް ސަރުކާރުގެ ހިންގުމަށް ގެނެވޭ ބަދަލުތަކުގެ ސަބަބުން ރައްޔިތުންގެ ދިރިއުޅުމަށް އެއްވެސް ކަހަލަ ހެޔޮ އަސަރެއް ނުކުރާތީ ގިނަ ބަޔަކު ދަނީ ސަރުކާރަށް ފާޑު ކިޔަމުންނެވެ.
