އީރާނުން ކުވެއިތުގެ ކަރަންޓާއި ފެން އުފައްދާ އިތުރު ޕްލާންޓަކަށް ހަމަލާދީ ސުންނާފަތި ކޮށްލައިފި

ކުރިން ދިން ހަމަލާއަށް 24 ގަޑިއިރުވެސް ނުވަނީސް، އީރާނުން ކުވެއިތުގެ ކަރަންޓާއި ފެން އުފައްދާ އިތުރު ޕްލާންޓަކަށް ހަމަލާދީ، އޭގެ ބައެއް ޔުނިޓްތައް މަސައްކަތް ނުކުރާ މިންވަރަށް ހަލާކުކޮށްލާފައިވާ ކަމަށް އެ ގައުމުން ހޮނިހިރު ދުވަހު ބުނެފި އެވެ.

ކުވެއިތުގެ މިނިސްޓްރީ އޮފް އިލެކްޓްރިސިޓީ އެންޑް ވޯޓާ އިން ނެރުނު ބަޔާނެއްގައި ބުނެފައިވަނީ، ދިން މި ހަމަލާގެ ސަބަބުން ކަރަންޓާއި ފެން ސާފުކުރާ ޕްލާންޓުގެ ބައެއް ބައިތަކުގައި އަލިފާން ރޯވެ، ކަރަންޓު އުފައްދާ ބައެއް ޔުނިޓްތަކުގެ މަސައްކަތް މެދުކަނޑާލަން ޖެހިފައިވާ ކަމަށެވެ.

އެމެރިކާގެ ސިފައިން ހުކުރު ދުވަހުގެ ރޭ ވެސް އީރާނަށް ހަމަލާދީފައިވާއިރު، މިއީ ޖެހިޖެހިގެން އެމެރިކާއިން އީރާނަށް ހަމަލާދިން ހަތްވަނަ ރެއެވެ. ޑޮނަލްޑް ޓްރަމްޕްގެ ސަރުކާރުން އީރާނުގެ ފެނުގެ ނިޒާމަށާއި އާންމުން ބޭނުންކުރާ ބްރިޖުތަކަށް އަމާޒުކޮށް ވަނީ ހަމަލާދީފަ އެވެ.

މި ހަމަލާތަކާ ގުޅިގެން، އީރާނުގެ ދެކުނުގެ ސަރަހައްދުތައް ކަމަށްވާ ބަންދަރު އައްބާސް ފަދަ ރަށްތަކުގެ ރައްޔިތުންނަށް މި ހޫނު މޫސުމުގައި ކަރަންޓާއި ބޯފެން ލިބުމުގެ ދަތިކަމާ ކުރިމަތިލާން ޖެހިފައިވާ ކަމަށް އީރާނުން ރިޕޯޓުކޮށްފައިވެ އެވެ.

އީރާނުން މި ހަމަލާތައް ދީފައިވަނީ، ގަލްފުގެ ގައުމުތަކުގައި ހުރި އެމެރިކާގެ މަރުކަޒުތަކަށް އަމާޒުކޮށް ބަދަލުހިފުމުގެ ގޮތުންނެވެ.

އީރާނުގެ ހަމަލާތަކާ ގުޅިގެން ކުވެއިތުގެ އިންޓަނޭޝަނަލް އެއާޕޯޓުގެ އޮޕަރޭޝަންތައް ވަގުތީ ގޮތުން މެދުކަނޑާލުމަށްފަހު، ގިނަ ފްލައިޓްތަކެއްގެ ގަޑިތަކަށް ބަދަލު ގެނެސްފައިވާ ކަމަށް ކުވެއިތު އެއާވޭސްއިން ހޮނިހިރު ދުވަހު ވަނީ ބުނެފަ އެވެ.