ވ.ތިނަދޫގައި ސިއްހީ ޚިދުމަތެއް ދެވޭނެ ގޮތެއް ނެތި މަރުކަޒު ހުންނަތާ އެއް މަހަށްވުރެ ގިނަ ދުވަސްވެއްޖެ

ވ. ތިނަދޫގައި ސިއްހީ ފަރުވާ ދެވޭނެ އެއްވެސް ގޮތެއް ނެތި އެރަށުގެ ސިއްހީ ޚިދުމަތް މެދުކެނޑިފައި އޮންނަތާ މަހަކަށްވުރެ ގިނަ ދުވަސްވެއްޖެ އެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި، އެރަށުގެ ސިއްހީ މަރުކަޒުގައި މިވަގުތު އެއްވެސް ޑޮކްޓަރެއް އަދި ނަރުހެއް ވެސް ނެތްއިރު، މިއީ ފަތުރުވެރިކަން ފުޅާދާއިރާއެއްގައި ކުރިއަށްދާ ރަށަކަށް ވުމުން އާންމުންނާއި ވިޔަފާރިވެރިންގެ ކަންބޮޑުވުން ވަނީ ވަރަށް ބޮޑަށް އިތުރުވެފަ އެވެ.

މި މައްސަލައާ ގުޅިގެން ފަށާއިރު ޕްރޮގްރާމްގެ ތެރެއިން ތިނަދޫ ކައުންސިލަށް ގުޅުމުން ކައުންސިލްގެ މުވައްޒަފެއް ބުނީ، ސިއްހީ މަރުކަޒުން ފޯނު ނުނަގާނެ ކަމަށާއި، އެތަނުގައި އެއްވެސް ޑޮކްޓަރެއް އަދި ނަރުހެއް ނެތް ކަމަށެވެ. އަދި މިހާރު މަހަކަށް ވުރެ ގިނަ ދުވަސްފައިވާ ކަމަށް އެމުވައްޒަފު ބުންޏެވެ.

މީގެ އިތުރުން މިމައްސަލައާ ގުޅިގެން ތަކުރާރުކޮށް ހެލްތު މިނިސްޓްރީ އަށް އަދި ހެލްތު މިނިސްޓްރީގެ މީޑީއާ އޮފިޝަލަށް ގުޅި ނަމަވެސް ފޯނު ނަގާފައެއް ނުވެ އެވެ.  

އެރަށަކީ ގެސްޓްހައުސް ވިޔަފާރި ފުޅާ ދާއިރާއެއްގައި ހިންގާ ރަކަށްވާތީ، މިމައްސަލައާ ގުޅިގެން މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑްއަށް ގުޅުމުން އޮފިޝަލް ވިދާޅުވީ ގެސްޓްހައުސް ވިޔަފާރި ހިންގުމުގެ ހުއްދަ ދޫކުރަނީ އެރަށެއްގައި ސިއްހީ މަރުކަޒެއް ހުރެ، އެ ތަނުން ސިއްހީ ފަރުވާ ދެވޭނެ އިންތިޒާމު ހަމަޖެހިފައިވާނަމަ ކަމަށެވެ. ނަމަވެސް ތިނަދޫގައި ޑޮކްޓަރުންނާއި ނަރުހުން ނެތިގެން ޚިދުމަތް މެދުކެނޑިފައިވާކަން މިހާތަނަށް އެނގިފައިނުވާ ކަމަށާއި، ހެލްތު މިނިސްޓްރީއާ ގުޅިގެން މި މައްސަލަ ބަލައި ހައްލު ހޯދުމަށް މަސައްކަތް ކުރާނެ ކަމަށް އޮފިޝަލް ވިދާޅުވި އެވެ.

ތިނަދޫ އަކީ އާންމުކޮށް 300 އަށްވުރެ ގިނަ ފަތުރުވެރިން އަދި ސީޒަން ދުވަސްވަރު 500 އާއި 600 އާ ދެމެދުގެ އަދަދަކަށް ފަތުރުވެރިން އުޅޭ ރަށެކެވެ. ދައުލަތަށް ބޮޑު ޓެކުހެއް ދައްކަމުންދާ މިފަދަ ރަށެއްގައި ސިއްހީ ފަރުވާ ދެވޭނެ ގޮތެއް ނެތި މަހަކަށްވުރެ ގިނަ ދުވަސް ވެގެންދިއުމަކީ ސަރުކާރުގެ ބޮޑު އިހުމާލެއްގެ ގޮތުގައި އެ ރަށު މީހުން ދަނީ ސިފަ ކުރަމުންނެވެ. 

ރަށުގެ އިދާރީ ހިންގުމަށް ބަލާއިރު، ތިނަދޫ ކައުންސިލްގެ މަސައްކަތްތައް ވެސް ވަނީ ހުއްޓުމަކަށް އައިސްފަ އެވެ. ކައުންސިލްގެ ރައީސް ޝުޖާއު އަލީގެ ގޮނޑި ގެއްލިފައިވާ ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ކަނޑައެޅުމާ ގުޅިގެން، މިހާރު ކައުންސިލްގައި ތިއްބެވީ އެންމެ ދެ މެންބަރުންނެވެ. އަދި މިހާރު އޮތް ހާލަތުގެ ސަބަބުން ރަށުގެ މުހިންމު ކަންކަމުގައި ގޮތް ނިންމުމަށް ވަނީ ދަތިތަކެއް ކުރިމަތިވެފަ އެވެ.

ސިއްހީ ޚިދުމަތް މެދުކެނޑިފައިވާ މި ދަނޑިވަޅުގައި، ކުއްލި ހާލަތެއް ދިމާވެއްޖެނަމަ އަމަލުކުރާނެ ގޮތެއް ނެތުމަކީ ރަށުގެ ރައްޔިތުންނާއި ފަތުރުވެރިންގެ ސަލާމަތަށް އޮތް ބޮޑު ނުރައްކަލެއްގެ ގޮތުގައި ފާހަގަކުރެވެ އެވެ. މިކަމަށް އަވަސް ހައްލެއް ބޭނުންވާ ކަމަށް ރަށުގެ ރައްޔިތުން ދަނީ ގޮވާލަމުންނެވެ.