އެމެރިކާއިން އީރާނަށް ޖެހިޖެހިގެން ހަތްވަނަ ރޭގެ ހަމަލާތައް ދީފި

އެމެރިކާގެ ރައީސް ޑޮނަލްޑް ޓްރަމްޕް، ވަގުތީ ގޮތުން ހަމަލާ ބަދަލުކުރުން ހުއްޓާލުމަށް ވެފައިވާ އެއްބަސްވުން ނިމުމަކަށް އައިސްފައިވާކަން އިޢުލާން ކުރެއްވި ފަހުން، ޖެހިޖެހިގެން ހަތްވަނަ ރޭވެސް އެމެރިކާގެ އަސްކަރިއްޔާއިން އީރާނަށް ވަރުގަދަ ހަމަލާތަކެއް ދީފި އެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން އެކްސްގައި އާންމުކުރި ބަޔާނެއްގައި ބުނެފައިވަނީ، އެމެރިކާގެ ސިފައިން އީރާނުގެ ޖާސޫސީ މަރުކަޒުތަކަށާއި، އަސްކަރީ ލޮޖިސްޓިކްސް އިންފްރާސްޓްރަކްޗަރތަކަށާއި، ބިމުގެ އަޑީގައި ހުރި ހަތިޔާރު ގުދަންތަކުގެ އިތުރުން ކަނޑުގެ އަސްކަރީ ގާބިލުކަން ހުރި ތަންތަނަށް ހަމަލާދީފައިވާ ކަމަށެވެ.

އީރާނުން ބުނެފައިވަނީ އެމެރިކާގެ ހަމަލާތަކަށް ރައްދު ދިނުމުގެ ގޮތުން އެ ސަރަހައްދުގައި ތިބި އެމެރިކާގެ ބައިވެރިންނަށް އަމާޒުކޮށް ހަމަލާދީފައިވާ ކަމަށެވެ. މީގެ ތެރޭގައި ކުވެއިތު ހިމެނޭއިރު، ކުވެއިތުގެ އަސްކަރިއްޔާއިން ބުނީ އީރާނުގެ އުދުވާނީ ހަމަލާތަކާ ގުޅިގެން، އެ ގައުމަށް އަމާޒުވި މިސައިލްތަކާއި ޑްރޯން ހަމަލާތަކުން ދިފާއުވުމުގެ މަސައްކަތް ކުރަމުންދާ ކަމަށެވެ.

އުރުދުންގެ ހަތިޔާރު އެޅި ފައުޖުތަކުން ވެސް ވަނީ ރޭގެ ވަގުތެއްގައި އެ ގައުމުގެ ވައިގެ ސަރަހައްދަށް އީރާނުން ފޮނުވާލި 10 މިސައިލެއް ވައްޓާލާފައިވާ ކަމަށް ބުނެފަ އެވެ. ނަމަވެސް މި ހަމަލާތަކުގައި އެއްވެސް ގެއްލުމެއް ލިބުނު ކަމުގެ ރިޕޯޓެއް ލިބިފައެއް ނުވެ އެވެ.

ސެންޓްކޮމް އިން ހާމަކުރި ގޮތުގައި އެތައް ގަޑިއިރަކަށް ދެމިގެންދިޔަ މި ބުރުގެ ހަމަލާތައް މިހާރު ވަނީ ނިންމާލާފަ އެވެ.

އެމެރިކާގެ ބަޔާނުގައި ބުނެފައިވަނީ، މި އޮޕަރޭޝަނުގައި އެމެރިކާގެ ސިފައިން ފައިޓަރ ޖެޓްތަކާއި، ވައިގެ މަގުން ދުއްވާ ޑްރޯންތަކާއި، މަނަވަރުތަކުގެ އިތުރުން އަސްކަރީ އެހެނިހެން ވަސީލަތްތައް ބޭނުންކޮށްފައިވާ ކަމަށެވެ.

އީރާނުގެ ދައުލަތުގެ މީޑިއާ އެޖެންސީ "ފާރްސް" އިން ބުނެފައިވަނީ ހުރްމުޒް ކަނޑުއޮޅީގެ ދެކުނުން މައިން އަޅާފައިވާ މަގަކުން ދަތުރުކުރި ތެޔޮ އުފުލާ ދެ ޓޭންކަރެއް ގޮވައި، އޭގައި އަލިފާން ރޯވެފައިވާ ކަމަށެވެ. ނަމަވެސް ފަހުން ސެންޓްކޮމް އިން އެކްސްގައި ކުރި ޕޯސްޓެއްގައި ބުނީ، އީރާނުގެ ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ބުނެފައިވަނީ ދޮގު ވާހަކައެއް ކަމަށެވެ.

އެމެރިކާ އާއި އީރާނުގެ ސިފައިންގެ މެދުގައި ބަދަލުކުރަމުންދާ ހަމަލާތަކާ ގުޅިގެން، ދުނިޔޭގެ އިގްތިސާދަށް މުހިންމު ހުރްމުޒް ކަނޑުއޮޅީގެ ކަނޑުގެ ދަތުރުފަތުރުތައް މިހާރު ވަނީ ގާތްގަނޑަކަށް ހުއްޓިފަ އެވެ. ދުނިޔޭގައި ބޭނުންކުރާ ތެލާއި ދިޔާ ކުރި ގޭހުގެ (އެލް.އެން.ޖީ) ފަސްބައިކުޅަ އެއްބައި އާންމުކޮށް އުފުލަނީ މި ކަނޑުއޮޅި މެދުވެރިކޮށެވެ.

އީރާނުގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، އެ ގައުމުގެ މެދުތެރޭގެ ރަށެއް ކަމަށްވާ ޔަޒްދުގެ އިތުރުން، ގޭޝްމް ޖަޒީރާ އާއި ކަނޑުއޮޅި ކައިރީގައި އޮންނަ ބަންދަރު އައްބާސް އިން ވެސް ގޮވުންތަކުގެ އަޑު ވަނީ އިވިފަ އެވެ.

ހުކުރު ދުވަހު އީރާނުގެ އަސްކަރިއްޔާއިން ވަނީ ކުވެއިތު، ބަހްރައިން، އުރުދުން އަދި ފުރަތަމަ ފަހަރަށް ސީރިއާގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީފައިވާ ކަމަށް ބުނެފަ އެވެ. ނަމަވެސް އެމެރިކާއިން ވަނީ މި ވާހަކަތައް ދޮގުކޮށްފަ އެވެ.

މީގެ ކުރިން ކުވެއިތުގެ އޮފިޝަލުން ވިދާޅުވެފައިވަނީ، އީރާނުން ދިން ޑްރޯން ހަމަލާތަކެއްގައި އެ ގައުމުގެ ބައެއް ސިފައިން ޒަޚަމްވެ، ކަރަންޓު އުފައްދާ މަރުކަޒަކަށާއި ފެން މީރުކުރާ ޕްލާންޓްތަކަށް ގެއްލުން ލިބިފައިވާ ކަމަށެވެ.

ސީ.ބީ.އެސް ނިއުސްއަށް މަސްދަރުތަކުން މައުލޫމާތު ދީފައިވާ ގޮތުގައި، ވޭތުވެދިޔަ ހަފުތާގައި އުރުދުންގެ ދެ ބޭހަކަށް އީރާނުން ދިން ހަމަލާތަކުގައި އެމެރިކާގެ ބައެއް ސިފައިންނަށް ވަނީ އަނިޔާވެފަ އެވެ.

އީރާނުގެ އާންމު އިންފްރާސްޓްރަކްޗަރތައް ކަމަށްވާ ފާލަންތަކާއި، ރޭލު ސްޓޭޝަނަކާއި، އެއާޕޯޓަކަށް އެމެރިކާގެ ސިފައިން ހަމަލާދިން ކަމަށް ތެހެރާނުން ކުރިން ހާމަކުރި ވާހަކަތައް ވެސް ވޮޝިންގޓަނުން ވަނީ ދޮގުކޮށްފަ އެވެ. ނަމަވެސް ހަމަލާތައް އަމާޒުވި ހުރްމުޒްގާން ޕްރޮވިންސްގެ ކަމާބެހޭ ފަރާތްތަކުން ބުނެފައިވަނީ މި ހަމަލާތަކުގައި ހަތް މީހަކު މަރުވެފައިވާ ކަމަށެވެ.

ބީބީސީ ވެރިފައި އާއި ބީބީސީ ޕާޝިއަން އިން ވަނީ ގަރީވެހް ފާލަމަށް ގެއްލުން ލިބިފައިވާ މަންޒަރު ފެންނަ ވީޑިއޯތަކުގެ ސައްހަކަން ކަށަވަރުކޮށްފަ އެވެ. ރޭގަނޑު ނަގާފައިވާ ވީޑިއޯތަކުން އެ ފާލަން މަތީގައި އަލިފާންގަނޑެއް ރޯވެފައިވާ މަންޒަރު ފެނެ އެވެ.

ދުވާލު ގަޑީގައި ނަގާފައިވާ ފޮޓޯތަކުން ފެންނަނީ ފާލަން ހަލާކުވެ، އޭގެ ވަށައިގެން މަގުގެ ބައެއް ބިމާ ހަމަވެފައިވާ މަންޒަރެވެ.

ވައިޓް ހައުސްގެ ތަރުޖަމާނަކު ބީބީސީއަށް ވިދާޅުވީ، އެމެރިކާއިން ހަމަލާދީފައިވަނީ ހަމައެކަނި އަސްކަރީ އަމާޒުތަކަށް ކަމަށާއި، އޭގެ ތެރޭގައި އަސްކަރީ ލޮޖިސްޓިކްސް އިންފްރާސްޓްރަކްޗަރތައް ހިމެނޭ ކަމަށެވެ.

އީރާނާއެކު ކުރިއަށްދިޔަ ސުލްހައިގެ ވާހަކަތައް ހުއްޓުމަކަށް އައި ފަހުން، އެމެރިކާއިން ކޮންމެ ރެއަކު ދެމުންދާ ހަމަލާތަކަށް ހުކުރު ދުވަހަށް މިވަނީ އެއް ހަފުތާ ވެފަ އެވެ. ހުރްމުޒް ކަނޑުއޮޅީގެ މުސްތަގުބަލާ މެދު އުފެދިފައިވާ ނުތަނަވަސްކަމުގެ ސަބަބުން، ދާއިމީ ގޮތެއްގައި ހަމަލާ ބަދަލުކުރުން ހުއްޓާލުމަށް ކުރަމުންދާ މަސައްކަތްތަކަށް ވަނީ ހުރަސް އެޅިފަ އެވެ.