ކުރިއަށް އޮތް ތަނުގައި ހައިޑްރޭޝަން ބްރޭކް ބޭނުން ކުރާނެ ކަމުގެ ޔަޤީން ކަމެއް ފީފާ އަކަށް ނެތް!

މިހާރު ކުރިއަށްދާ ފީފާ ވޯލްޑް ކަޕްގައި އަލަށް ތައާރަފުކުރި "ހައިޑްރޭޝަން ބްރޭކް" ނުވަތަ ފެން ބުއިމަށް މެޗު މެދު ކަނޑާލުމާ މެދު ސަޕޯޓަރުންގެ މެދުގައި ހިތްހަމަ ނުޖެހުން އޮތުމުން، ކުރިއަށް އޮތް ތަނުގައި އެ އުސޫލު ދަމަހައްޓާނެ ކަމުގެ ޔަގީން ކަމެއް ނެތް ކަމަށް ފީފާގެ ޗީފް އޮފް ފުޓުބޯޅަ ޑިވެލޮޕްމަންޓް އާސެން ވެންގާ ވިދާޅުވެއްޖެ އެވެ.

އާދިއްތަ ދުވަހު އާޖެންޓީނާ އާއި ސްޕެއިން ބައްދަލުކުރާ ފައިނަލް މެޗު ކުޅުމަށް ހަމަޖެހިފައިވާ ނިއު ޔޯކް ނިއު ޖާޒީ ސްޓޭޑިއަމްގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ވެންގާ ވިދާޅުވީ، ކޮންމެ ހާފެއްގެ މެދު ތެރެއިން މަޖުބޫރު ކޮށްފައިވާ ތިން މިނެޓުގެ މި މެދު ކަނޑާލުމުގެ ސަބަބުން ކުޅުންތެރިންގެ ހުނަރަށް ނުވަތަ، މެޗުގެ އޮއޮވަރަށް އެދެވޭ ބަދަލެއް އައިކަން އެނގޭނެ އެއްވެސް ތަފާސް ހިސާބެއް މިހާތަނަށް ލިބިފައި ނުވާ ކަމަށެވެ.

ބައެއް ސަޕޯޓަރުން މި ބަދަލާ މެދު ހިތްހަމަ ނުޖެހޭކަން ފާހަގަ ކުރައްވައި، މުބާރާތަށް ފަހު މީގެ އަސަރުތައް ދިރާސާ ކުރައްވާނެ ކަމަށް އާސެނަލްގެ ކުރީގެ ކޯޗު ވިދާޅުވި އެވެ.

ވެންގާ ވިދާޅުވި ގޮތުގައި މި ބްރޭކްގެ ސަބަބުން މެޗު ތަކުގެ ނަތީޖާ އަށް ބަދަލެއް އައި ކަމަކަށް ގަބޫލެއް ނުކުރެވެ އެވެ. ނަމަވެސް، ފީފާގެ މަގުސަދަކީ ފުޓުބޯޅަ ބަލާ މީހުންނަށް ޚިދުމަތް ކުރުން ކަމަށް ވާތީ، މުބާރާތް ނިމުމުން މިކަމާ މެދު ވަކި ގޮތެއް ނިންމާނެ ކަމަށް އޭނާ ވިދާޅުވި އެވެ. މީގެ އިތުރުން، ފުރާޅު އަޅާފައިވާ ސްޓޭޑިއަމް ތަކުގައި ކުޅުނު މެޗު ތަކުގައި މި ބްރޭކް ދިނުމުން ގިނަ ބައެއްގެ ފާޑު ކިޔުން އަމާޒުވި ނަމަވެސް، މުބާރާތް ފެށިއިރު މިއީ ހުރިހާ މެޗަކަށް އަމަލު ކުރަން ނިންމާފައިވާ އުސޫލެއް ކަމަށް އޭނާ ފާހަގަ ކުރެއްވި އެވެ.

މި މުބާރާތުގައި ފީފާ އިން ތައާރަފުކުރި އެހެން ބައެއް ބަދަލު ތަކަށް ވެންގާ ވަނީ ތައުރީފު ކުރައްވާފައި އެވެ. އެގޮތުން، ކުޅުންތެރިއަކު ފަރުވާ އަށް އެދިއްޖެ ނަމަ އެއް މިނެޓަށް ދަނޑުން ބޭރަށް ދާންޖެހޭ ގޮތަށް ހެދި ގަވާއިދުގެ ސަބަބުން، މެޗު ތަކުގައި ފަރުވާ ދޭންޖެހޭ މިންވަރު 2022 ވަނަ އަހަރުގެ މުބާރާތުގައި ހުރި 2.3 އިން މި މުބާރާތުގައި 1.6 އަށް ދަށްވެފައިވާ ކަމަށް ފީފާގެ ތަފާސް ހިސާބު ތަކުން ދައްކަ އެވެ. އަނިޔާއެއް ނުވެ ކުޅުންތެރިން ދަނޑު މަތީގައި އޮށޯވެގެން ތިބޭ ތިބުމަށް މި އުސޫލުގެ ސަބަބުން ހައްލެއް ލިބިފައިވާ ކަމަށް ވެންގާ ވިދާޅުވި އެވެ.

މީގެ ކުރިން މެޗު ތަކުގައި ހައިޑްރޭޝަން ބްރޭކް ދިނުމަކީ ރެފްރީންގެ އިޚުތިޔާރުގައި އޮންނަ ކަމެކެވެ. އަދި އެއީ ހޫނު ގަދަ ހާލަތް ތަކުގައި ގާތް ގަނޑަކަށް 90 ސިކުންތަށް ދޭ ވަގުތު ކޮޅެކެެވެ. ނަމަވެސް، މި މުބާރާތުގައި އޭސީ ކޮށްފައިވާ ސްޓޭޑިއަމްތަކާއި، ފިނި މޫސުމުގައި ކުޅުނު މެޗު ތަކުގައި ވެސް ތިން މިނެޓުގެ ބްރޭކެއް ދޭން ޖެހުމުން ސަޕޯޓަރުން ވަނީ މަލާމާތް ކޮށްފައި އެވެ. މިސާލަކަށް ސިއެޓްލްގައި މިސްރާއި އީރާން ބައްދަލުކުރި މެޗުގައި ފިނި ހޫނުމިން 16 ޑިގްރީ ސެލްސިއަސްގައި ހުރިއިރު ވެސް، މި ބްރޭކް ދީފައިވެ އެވެ.

ގިނަ ސަޕޯޓަރުން ތުހުމަތުކުރާ ގޮތުގައި ފީފާ އިން މި ބަދަލު ގެނައީ ބްރޯޑްކާސްޓަރުންނަށް އިޝްތިހާރު ދެއްކުމުގެ ފުރުސަތު ދިނުމަށެވެ. އަދި މީގެ ސަބަބުން މެޗުގެ ފޯރި ކެނޑި، މޮޅަށް ކުޅެމުންދާ ޓީމުގެ ރިދަމް ގެއްލޭ ކަމަށް ވެސް ސަޕޯޓަރުން ބުނެ އެވެ.

ބައެއް މެޗު ތަކުގައި ހައިޑްރޭޝަން ބްރޭކަށް ފަހު ވަގުތުން ލަނޑު ވަދެފައިވާކަން ފާހަގަކޮށް، މިއީ ފާއިތުވި 200 އެއްހާ އަހަރު ފުޓުބޯޅަ ކުޅެމުން އައި ގޮތް ނޫން ކަމަށް ބުނެ ސަޕޯޓަރުން ދަނީ ކަންބޮޑުވުން ފާޅު ކުރަމުންނެވެ.