އަމިއްލަ ޤައުމުގައި ހުންނަވައިގެން މެޗު ބައްލަވަން ބޭނުންފުޅު ނުވާތީ، އާޖެންޓީނާގެ ރައީސް ފައިނަލް މެޗު ބައްލަވަން އެމެރިކާ އަށް ވަޑައިނުގަންނަވާނެ
17 ޖުލައި 2026 | ހުކުރު 10:38މިލޭ ވިދާޅުވީ މުބާރާތުގައި މިހާތަނަށް އާޖެންޓީނާ އިން ކުޅުނު ހަތް މެޗު ވެސް ބައްލަވާފައި ވަނީ އަމިއްލަފުޅު ޤައުމުގައި ހުންނަވައިގެން ކަމަށް. އެ ހަތް މެޗުން ވެސް އާޖެންޓީނާ މޮޅުވެފައިވާއިރު، މިލޭ ވިދާޅުވީ ޓީމަށް ތަރުހީބު ދިނުމުގައި ބައިވެރިވެވަޑައިގަންނަވާނެ ކަމަށާއި، އަމިއްލަފުޅު ޤައުމުގެ ރައްޔިތުންނާ އެކު މެޗު ބެއްލެވުމަށް އިޚްތިޔާރު ކުރެއްވީ ކަމަށް
އާޖެންޓީނާގެ ރައީސް ހަވިއާ މިލޭ | ގެޓީ އިމޭޖަސް
ފީފާ ވޯލްޑް ކަޕްގެ ފައިނަލްގައި ސްޕެއިން އާއި އާޖެންޓީނާ ބައްދަލު ކުރާ މެޗު ބައްލަވާނީ އަމިއްލަފުޅު ޤައުމުގައި ހުންނަވައިގެން ކަމަށާއި، މުބާރާތުގެ ފައިނަލް މެޗު ބައްލަވަން އެމެރިކާ އަށް ވަޑައިނުގަންނަވާނެ ކަމަށް އާޖެންޓީނާގެ ރައީސް ހަވިއާ މިލޭ ވިދާޅުވެއްޖެ އެވެ.
މިލޭ ވިދާޅުވީ މުބާރާތުގައި މިހާތަނަށް އާޖެންޓީނާ އިން ކުޅުނު ހަތް މެޗު ވެސް ބައްލަވާފައި ވަނީ އަމިއްލަ ޤައުމުގައި ހުންނަވައިގެން ކަމަށެވެ. އެ ހަތް މެޗުން ވެސް އާޖެންޓީނާ މޮޅުވެފައިވާއިރު، މިލޭ ވިދާޅުވީ ޓީމަށް ތަރުހީބު ދިނުމުގައި ބައިވެރިވެވަޑައިގަންނަވާނެ ކަމަށާއި، އަމިއްލަފުޅު ޤައުމުގެ ރައްޔިތުންނާ އެކު މެޗު ބެއްލެވުމަށް އިޚްތިޔާރު ކުރެއްވީ ކަމަށެވެ.
ބުރާސްފަތި ދުވަހު މިލޭ އެހެން ވިދާޅުވެފައި ވަނީ ނޫސްވެރިޔަކު ދެންނެވި ސުވާލަކަށް ޖަވާބު ދެއްވަމުންނެވެ. އެގޮތުން ނޫސްވެރިޔާ ސުވާލު ދަންނަވާފައި ވަނީ އާދީއްތަ ދުވަހު އެމެރިކާގެ ނިއު ޖާސީ އަށް ވަޑައިގެން، މިލޭގެ ގާތް އެކުވެރިޔާ އެމެރިކާގެ ރައީސް ޑޮނަލްޑް ޓްރަމްޕް އާއި ފީފާގެ ޖިއާނީ އިންފަންޓީނޯ އާ އެކު މެޗު ބައްލަވާނެތޯ އެވެ. އެ ސުވާލަށް ޖަވާބު ދެއްވަމުން މިލޭ ވިދާޅުވީ، އެއްގޮތަކަށް ވެސް އެހެން ނޫން ކަމަށެވެ.
އާޖެންޓީނާގެ ރޭޑިއޯ ސްޓޭޝަނެއް ކަމަށް އެލް އޮބްޒާވަޑޯ އަށް ދެއްވި ބަސްދީގަތުމެއްގައި މިލޭ ވިދާޅުވީ، އޮލިވޯސްގައި ހުންނަ ރައީސްގެ ގެކޮޅުގައި ހުންނަވައިގެން މެޗު ބައްލަވާނެ ކަމަށެވެ. މިލޭ ވިދާޅުވީ އާޖެންޓީނާގެ ޓީމަށް ފުރިހަމަ ކާމިޔާބަށް އެދިވަޑައިގަންނަވާ ކަމަށާއި، އާޖެންޓީނާ އިން މުބާރާތުގެ ތަށި ހަތަރު ވަނަ ފަަހަރަށް އުފުލާލާނެ ކަމުގެ އުންމީދު ވަރަށް ބޮޑު ކަމަށެވެ.
ވޯލްޑް ކަޕްގެ ފައިނަލް މެޗު ބަައްލަވަން މިލޭ ވަޑައިނުގަންނަވާއިރު، އާޖެންޓީނާގެ ރައީސުން ވަނީ ދިގު މުއްދަތެއް ވަންދެން އެކަން ކުރައްވައިފަ އެވެ. މީގެ ކުރިން 1990 ވަނަ އަހަރު އޮތް ވޯލްޑް ކަޕްގައި އާޖެންޓީނާގެ ރައީސް ކާލޯސް މެނެމް ޓީމާ ބައްދަލު ކުރެއްވި އެވެ. އޭގެ ފަހުން މުބާރާތުގައި ކުޅުނު ފުރަތަމަ މެޗުގައި ކެމަރޫން އަތުން ބަލިވުމާ އެކު، އޭގެ ފަހުން އާޖެންޓީނާގެ ރައީސުން ވޯލްޑް ކަޕްގެ މެޗު ބައްލަވަން ވަޑައިގެންނެވި ކަމެއް އެނގިފައި ނުވެ އެވެ.
އާޖެންޓީނާ އިން ވަނީ އެންމެ ފަހުން 2022 ވަނަ އަހަރު ޤަތަރުގައި އޮތް ވޯލްޑް ކަޕް ކާމިޔާބު ކޮށްފައި އެވެ. މިފަހަރުގެ މުބާރާތުގެ ފައިނަލް އިން އާޖެންޓީނާ ޖާގަ ހޯދާފައިވާއިރު، އާޖެންޓީނާ އިން މުބާރާތުގެ ތަށި ދިފާއު ކުރުމަށް ގިނަ މަސައްކަތް ތަކެއް ކުރާނެ އެވެ.
