އީރާނުން ކުވެއިތަށް ވަރުގަދަ ހަމަލާތަކެއް ދީފި
ކުވެއިތުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް އީރާނުން ދެމުންދާ ޑްރޯން އަދި މިސައިލް ހަމަލާތަކެއް އެ ގައުމުގެ ދިފާއީ ބާރުތަކުން ހުއްޓުވަން ފަށައިފި. މި ހަމަލާތަކާ ގުޅިގެން ކުވެއިތުގެ ބޯޑަރު ސަރަހައްދަށް ރޮކެޓެއް ވެއްޓި ބޮޑު އަލިފާންގަނޑެއް އުފެދިފައިވާއިރު، ރައްކާތެރިކަމުގެ ފިޔަވަޅެއްގެ ގޮތުން ކަމާބެހޭ އިދާރާތަކުގެ އިރުޝާދުތަކަށް ބޯލެނބުމަށް އާންމުންނަށް ވަނީ އިލްތިމާސްކޮށްފައި.
އީރާނުން ދިން މިސައިލް އަދި ޑްރޯން ހަމަލާތަކަކާ ގުޅިގެން، ކުވެއިތުގައި ހުންނަ އެމެރިކާގެ އަސްކަރީ މަރުކަޒެއްގައި އަލިފާނުގެ ހާދިސާއެއް ހިނގާފައިވާ ކަމަށް ރިޕޯޓްތައް ވަނީ ބުނެފައި | ސްކްރީން އިމޭޖް
އީރާނަށް އެމެރިކާ އިން ދެމުންދާ ނުރައްކާތެރި ހަމަލާތަކަށް ބަދަލު ހިފުމުގެ ގޮތުން ހުކުރު ދުވަހުގެ ފަތިހުގެ ވަގުތެއްގައި އީރާނުން ވަރުގަދަ ހަމަލާތަކެއް ކުވެއިތައް ދޭން ފެށުމާއެކު، މިސައިލް އަދި ޑްރޯން ހަމަލާތައް ހުއްޓުވަމުންދާ ކަމަށް އެ ގައުމުން ބުނެފި އެވެ.
މި ހަމަލާތަކާ ގުޅިގެން ކުވެއިތުގައި ވަނީ ނުރައްކަލުގެ ސައިރަން އަޅާފަ އެވެ.
ކުވެއިތާއި އިރާގު ގުޅޭ ބޯޑަރު ސަރަހައްދަށް މިސައިލެއް ނުވަތަ ރޮކެޓެއް ވެއްޓި، އެ ސަރަހައްދުގައި ބޮޑު އަލިފާންގަނޑެއް އުފެދި ދުންތައް މައްޗަށް އަރަމުންދާ މަންޒަރުތައް ވަނީ އަލް ޖަޒީރާ އިން ހާމަކޮށްފަ އެވެ. މި ހާދިސާ ހިނގާފައިވަނީ، ހުކުރު ދުވަހު ފަތިހުން ފެށިގެން ކުވެއިތަށް އަމާޒުވި ދުޝްމަނުންގެ 32 ޑްރޯން ހަމަލާއެއް އެ ގައުމުގެ ދިފާއީ ބާރުތަކުން ހުއްޓުވާފައިވާ ކަމަށް ބުނެފައިވަނިކޮށެވެ. ހަމައެއާއެކު، ކުވެއިތުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ހަމަލާދެމުންދާ ކަމަށް އީރާނުން ވެސް ވަނީ އިއުލާންކޮށްފަ އެވެ.
ކުވެއިތުގެ މިނިސްޓްރީ އޮފް އިންފޮމޭޝަނުން އެކްސްގައި އާންމުކުރި މައުލޫމާތެއްގައި ބުނެފައިވަނީ، އެ ގައުމުގެ އެއާ ޑިފެންސް ސިސްޓަމްތަކުން ހަމަލާތައް ހުއްޓުވަމުންދާތީ ގޮވުމުގެ އަޑުތައް އިވިދާނެ ކަމަށެވެ. އަދި ކަމާބެހޭ އިދާރާތަކުން ދޭ އިރުޝާދުތަކަށް އަމަލުކުރުމަށް އެ ގައުމުގެ ރައްޔިތުންނަށް ވަނީ އިލްތިމާސްކޮށްފަ އެވެ.
