ބުރާސްފަތި ދުވަހު ހުރްމުޒް ކަނޑުއޮޅި ހުރަސްކޮށްފައިވަނީ މުދާ އުފުލާ އެންމެ ތިން އުޅަނދު

އީރާނުން އުޅަނދުފަހަރަށް ދޭން ފެށި ހަމަލާތަކާއި، އީރާނާ ގުޅުންހުރި މުދާ އުފުލާ އުޅަނދުތަކަށް އެމެރިކާއިން އަލުން ހުރަސްތަކެއް ކުރިމަތިކުރުވުމާ ގުޅިގެން، ގިނަ އުޅަނދުތަކެއް ދަތުރު ހުއްޓާލާފައި ވަނިކޮށް ބުރާސްފަތި ދުވަހު ހުރްމުޒް ކަނޑުއޮޅި ހުރަސްކޮށްފައިވަނީ އެންމެ ތިން މުދާ އުފުލާ އުޅަނދުކަން ޝިޕިންގް ޑޭޓާތަކުން ހާމަވެއްޖެ އެވެ.

މިއީ މިދިޔަ މޭ މަހަށްފަހު އެއް ދުވަހެއްގެ ތެރޭގައި އެންމެ މަދު އުޅަނދު އެ ސަރަހައްދު ހުރަސްކުރި ދުވަހެވެ.

އެމެރިކާއާއި އީރާނާ ދެމެދު ކުރިމަތިލުންތައް އަލުން ވަރުގަދަވުމާ ގުޅިގެން، ދުނިޔޭގެ ތެލާއި ގޭސް އުފުލާ އެންމެ މުހިންމު މަގު ކަމަށްވާ ހުރްމުޒް ކަނޑުއޮޅީގެ ދަތުރުފަތުރުތައް ވަނީ ގާތްގަނޑަކަށް ހުއްޓުމަކަށް އައިސްފައެވެ. މީގެ ސަބަބުން ދުނިޔޭގެ ބާޒާރުގައި ހަކަތައިގެ އަގުތައް ވަނީ އުފުލިފަ އެވެ.

ކެޕްލަރ (Kpler) ގެ ތަފާސްހިސާބުތަކުން ހުކުރު ދުވަހުގެ ޖީ.އެމް.ޓީ ގަޑިން 05:13 އާ ހަމައަށް ދައްކާ ގޮތުގައި، ދަތިކުރުމުގެ ފިޔަވަޅު އަޅާފައިވާ ތެޔޮ އުފުލާ އުޅަނދެއް ކަމަށްވާ "މީރާން" އާއި، އެލް.ޕީ.ޖީ އުފުލާ ކުޑަ އުޅަނދެއް ކަމަށްވާ "ނޮރީޓާ" ބުރާސްފަތި ދުވަހު އީރާނުގެ މަގުން ކަނޑުއޮޅިން ބޭރުވި ނަމަވެސް، އެމެރިކާގެ ބްލޮކޭޑް އޮތް ގަލްފް އޮފް އޮމާން ސަރަހައްދަށް ވަނީ މަޑުކޮށްފަ އެވެ.

އެލް.އެސް.އީ.ޖީ (LSEG) ގެ ތަފާސްހިސާބުތަކުން ދައްކާ ގޮތުގައި، ކަނޑުމަތީގައި އުޅަނދުފަހަރަށް ތެޔޮ އެޅުމަށް ބޭނުންކުރާ އިރާގުގެ ތެޔޮ ބަރުކޮށްފައިވާ "އެރޯލިއާ" ނަމަކަށް ކިޔާ ޓޭންކަރު، ހުކުރު ދުވަހުގެ ކުރީކޮޅު ކަނޑުއޮޅިން ބޭރުވިތާ މަދު ގަޑިއިރުތަކެއްގެ ތެރޭގައި އަނބުރާލުމަށްފަހު އަލުން ގަލްފް ސަރަހައްދަށް ވަނީ ވަދެފަ އެވެ.

ހަނގުރާމަ ފެށުމުގެ ކުރިން ދުވާލަކު އެވްރެޖްކޮށް 125 އުޅަނދު އެ ސަރަހައްދު ހުރަސްކުރި ނަމަވެސް، މިދިޔަ ބުދަ ދުވަހު އެ ކަނޑުއޮޅި ހުރަސްކޮށްފައިވަނީ އެންމެ 11 އުޅަނދެވެ.

ބުރާސްފަތި ދުވަހަކީ ވަރަށް ގިނަ އަދަދަކަށް ސާފުނުކުރާ ތެޔޮ އުފުލާ ބޮޑެތި އުޅަނދުތައް ނުވަތަ އެލް.އެން.ޖީ ޓޭންކަރުތައް އެ ކަނޑުއޮޅި ހުރަސްނުކޮށް ދިޔަ ޖެހިޖެހިގެން ދެވަނަ ދުވަހެވެ.

އެހެންނަމަވެސް، ބުރާސްފަތި ދުވަހު ކަނޑުއޮޅިން ބޭރުން އޭ.އައި.އެސް ޓްރެކިންގް ސިސްޓަމުން ދެ ބޮޮޑު ދެ އުޅަނދެއް ވަނީ ފެނިފައެވެ. މިއިން ކޮންމެ އުޅަނދެއްގައި ދެ މިލިއަން ފީފާގެ ސާފުނުކުރާ ތެޔޮ ހުއްޓެވެ.

ތަފާސްހިސާބުތަކުން ދައްކާ ގޮތުގައި، ސައުދީ އަރަބިއްޔާގެ ތެޔޮ ބަރުކޮށްފައިވާ "ކޮލަމްބިއާ ޕްރޮސްޕެރިޓީ" ދަތުރުކުރަމުންދަނީ ޖަޕާނުގެ އޮކިނާވާއަށެވެ. އަދި އިރާގުގެ ބަސްރާ މީޑިއަމް ތެޔޮ ބަރުކޮށްފައިވާ "ކޮސްޓާ ރިކާ ޕްރޮސްޕެރިޓީ" މިސްރާބު ޖަހާފައިވަނީ ތުރުކީއަށެވެ.

ޑޭޓާބޭސްއިން ދައްކާ ގޮތުގައި މި ޓޭންކަރުތައް ކަނޑުއޮޅި ހުރަސްކުރީ ޖުލައި 13 ގައެވެ. ނަމަވެސް އެސް އެންޑް ޕީ ގްލޯބަލް އެނާޖީން އަންދާޒާކުރާ ގޮތުގައި އެ އުޅަނދުތައް ބޭރުވީ ޖުލައި 14 ގައެވެ.

އިރާގުގެ ބަސްރާ ޓާމިނަލްގައި އޮތް ތެޔޮ ޓޭންކަރަކަށް ޑްރޯން ހަމަލާއެއް އަމާޒުވުމާ ގުޅިގެން، ބުރާސްފަތި ދުވަހު އިރާގުން ތެޔޮ ބަރުކުރުން ވަގުތީ ގޮތުން މެދުކަނޑާލި ކަމަށް އެ ގައުމުގެ ތެލާއި ސަލާމަތީ ދާއިރާގެ ހަތަރު މަސްދަރަކުން ރޮއިޓާސްއަށް މައުލޫމާތު ދީފައިވެ އެވެ. ނަމަވެސް ފަހުން ވަނީ އަލުން ތެޔޮ ބަރުކުރަން ފަށާފަ އެވެ.

އީރާނުގެ ތަސްނީމް ނިއުސް އެޖެންސީން ރިޕޯޓްކޮށްފައިވާ ގޮތުގައި، އެމެރިކާގެ ހަމަލާތައް ކުރިއަށްދާހާ ހިނދަކު، ހޮރްމުޒް ކަނޑުއޮޅި މެދުވެރިކޮށް އެއްވެސް ތެލެއް ނުވަތަ ގޭހެއް އެކްސްޕޯޓް ނުކުރެވޭނެ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުރާސްފަތި ދުވަހު ވަނީ ބުނެފަ އެވެ.

ހަކަތަ ފޯރުކޮށްދިނުމަށް އޮތް ނުރައްކާ އިތުރުވަމުންދާއިރު، އެމެރިކާއިން އީރާނުގެ އިންފްރާސްޓްރަކްޗަރަށް ހަމަލާދީފިނަމަ، ރަތް ކަނޑުގެ ދޮރުމަތީގައި އޮންނަ މުހިންމު އަނެއް މަގު ކަމަށްވާ ބާބުލް މަންދަބު ކަނޑުއޮޅި ބަންދުކުރުމަށް ޔަމަނުގެ ހޫތީންނަށް އީރާނުން ބާރުއަޅާފާނެ ކަމުގެ އިޝާރާތެއް ދީފައިވާ ކަމަށް މަސްދަރުތަކުން ރޮއިޓާސްއަށް މައުލޫމާތު ދެއެވެ.