ޓްރަމްޕް ހުންނެވީ އީރާން އާއެކު ސިޔާސީ މަޝްވަރާތަކަށް ތައްޔާރަށް

އީރާން އާއެކު އުފެދިފައިވާ ނުތަނަވަސްކަން ބޮޑުވެފައި ވީ ނަމަވެސް، އެ ޤައުމުގެ ސިޔާސީ މަޝްވަރާތައް ކުރިއަށް ގެންދިޔުމުގެ ފުރުސަތު އެމެރިކާގެ ރައީސް ޑޮނަލްޑް ޓްރަމްޕް އަދިވެސް ބަންދު ނުކުރައްވާ ކަމަށް ވައިޓް ހައުސް އިން ބުނެފި އެވެ.

ވައިޓް ހައުސް އިން މިހެން ބުނެފައި ވަނީ، ދެ ޤައުމުގެ ދެމެދުގައި އަސްކަރީ ކުރިމަތިލުންތަކެއް ހިނގަމުންދާ ދަނޑިވަޅެއްގައި އެވެ. 

ވައިޓް ހައުސްގެ ޕްރެސް ސެކްރެޓަރީ ކެރޮލިން ލެވިޓް ބުރާސްފަތި ދުވަހު ނޫސްވެރިންނަށް މައުލޫމާތު ދެއްވަމުން ވިދާޅުވީ، އެމެރިކާ އަށް ދޭ ބަހުގެ ޔަޤީންކަމާ ދެކޮޅަށް އީރާން އިން އަމަލުކޮށްފި ނަމަ، އެކަމުގެ ޒިންމާ ޓްރަމްޕް އެ ގައުމު ލައްވާ އުފުއްލަވާނެ ކަމަށެވެ. ނަމަވެސް ހަމަ އެއާ އެކު، ޑިޕްލޮމެޓިކް އުސޫލުން މައްސަލަތައް ހައްލު ކުރުމަށް ޓްރަމްޕް އަބަދުވެސް ހުންނެވީ ތައްޔާރަށް ކަމަށް އޭނާ ވިދާޅުވި އެވެ.

މިދިޔަ ޑިސެމްބަރު މަހުން ފެށިގެން އީރާން އިން ހައްޔަރުކޮށްފައި ހުރި އެމެރިކާގެ ރައްޔިތަކު މިދިޔަ ބުދަ ދުވަހު މިނިވަން ކުރުމާ ގުޅިގެން، ޓްރަމްޕް ވަނީ އެ ޤައުމަށް ޝުކުރު އަދާ ކުރައްވައިފަ އެވެ. މިއީ ދެ ޤައުމުގެ ދެ މެދުގައި އޮތް ގުޅުން ރަނގަޅު ވުމަށް ހުޅުވިގެން ދިޔަ ދޮރެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ދެކެ އެވެ. 

ލެވިޓް އިތުރަށް ވިދާޅުވީ، އީރާން އިން އަބަދު ވެސް ބޭނުން ވަނީ ޓްރަމްޕް އާއެކު އެއްބަސްވުމަކަށް އައުމަށް ކަމަށް އެ ޤައުމުން ހާމަކޮށްފައިވާ ކަމަށެވެ. އަދި މިހާރު ވެސް އެމެރިކާ އިން އަންނަނީ އީރާން އާއެކު ވާހަކަ ދައްކަމުން ކަމަށް އޭނާ ފާހަގަ ކުރެއްވި އެވެ. އެހެން ނަމަވެސް، ހުރްމުޒް ކަނޑު އޮޅިން ދަތުރު ކުރާ އުޅަނދު ފަހަރަށް އީރާން އިން ހަމަލާ ދޭ ނަމަ، އޭގެ ނަތީޖާ ހިތިވާނެ ކަމުގެ އިންޒާރު ވެސް ވައިޓް ހައުސް އިން ވަނީ ދީފައި އެވެ. 

މިދިޔަ ޖޫން މަހުގެ ތެރޭގައި ދެ ޤައުމުގެ ދެ މެދުގައި އެކުލަވާލި ނާޒުކު ހަނގުރާމަ ހުއްޓާލުމުގެ އެއްބަސްވުން މިހާރު އޮތީ ނުރައްކަލެއްގެ ތެރޭގައި އެވެ. ސަބަބަކީ، ހުރްމުޒް ކަނޑު އޮޅީގައި ދަތުރު ކުރާ އުޅަނދު ފަހަރަށް އީރާން އިން ހަމަލާ ދެމުންދާ ކަމަށް ބުނެ، އެކަމުގެ ނުރައްކާ ހުއްޓުވުމަށް އެމެރިކާ އިން ފާއިތުވި ދުވަސް ތަކުގައި އީރާން އަށް އަމާޒުކޮށް ވަރުގަދަ ހަމަލާތަކެެއް ދީފައިވާތީ އެެވެ. 

މީގެ އިތުރުން އީރާން އިން އަލުން މަޝްވަރާގެ މޭޒަށް ނައިސްފި ނަމަ، އެ ޤައުމުގެ އިންޖީނުގެތަކާއި، ފާލަންތަކަށް އަމާޒުކޮށް ދޭ ހަމަލާތައް ވަރުގަދަކޮށް ފުޅާ ކުރާނެ ކަމުގެ އިންޒާރު ވެސް ޓްރަމްޕް ވަނީ ދެއްވައިފަ އެވެ.