އީރާނުން ބަހްރައިންގައި ހުރި އެމެރިކާގެ އެއަރބޭސް އަކަށް ވަރުގަދަ ހަމަލާތަކެއް ދީފި

އީރާނުގެ އާންމު ރައްޔިތުންނަށާއި މަދަނީ އުމްރާނީ ވަސީލަތްތަކަށް އަމާޒުކޮށް އެމެރިކާއިން ދެމުންދާ ހަމަލާތަކުގެ ބަދަލުހިފުމުގެ ގޮތުން، ބަހްރައިންގައި ހުންނަ އެމެރިކާގެ އަސްކަރީ މަރުކަޒަކަށް އީރާނުގެ އަސްކަރިއްޔާއިން ވަރުގަދަ ހަމަލާތަކެއް ދީފި އެވެ. "އޮޕަރޭޝަން ތަންޑަރ" ގެ 11 ވަނަ ފިޔަވަހީގެ ދަށުން ދިން މި ހަމަލާތައް އަމާޒުކޮށްފައިވަނީ އެމެރިކާގެ އަސްކަރިއްޔާގެ ހެލިކޮޕްޓަރުތަކާއި ޕީ-8 މާކްގެ ޖާސޫސީ މަތިންދާބޯޓުތައް ބޭސްކޮށްފައިވާ މަރުކަޒަށެވެ.

އީރާނުގެ އަސްކަރިއްޔާއިން ހުކުރު ދުވަހު ހާމަކުރި ގޮތުގައި، ބަހްރައިންގެ އަލް-ސަޚީރު އެއާބޭސްއަށް މި ހަމަލާ ދީފައިވަނީ "އަރަޝް" މާކްގެ ގޮވާތަކެތި ހަރުކޮށްފައިވާ ޑްރޯންތައް ބޭނުންކޮށްގެންނެވެ.

އީރާނުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، އިސްލާމީ ޖުމްހޫރިއްޔާގެ އަސްކަރިއްޔާއިން ހިންގާ "އޮޕަރޭޝަން ތަންޑަރ" ގެ 11 ވަނަ ފިޔަވަހީގެ ދަށުން، ބަހްރައިންގެ އަލް-ސަޚީރު ބޭސްގައި ހުރި އެމެރިކާގެ ޓެރަރިސްޓް އަސްކަރިއްޔާގެ ހެލިކޮޕްޓަރުތަކާއި ޕީ-8 މާކްގެ ޖާސޫސީ މަތިންދާބޯޓުތަކަށް ކާމިޔާބު ހަމަލާތަކެއް ދީފައިވާ ކަމަށެވެ.

އީރާނުގެ ސަލާމަތާއި މިނިވަންކަމަކީ އެއްވެސް ދޫދިނުމެއް އޮތް ކަމެއް ނޫންކަން ފާހަގަކޮށް، ދުޝްމަނުންގެ ކޮންމެ ހަމަލާއަކަށް ވަގުތުން ވަރުގަދަ ރައްދު ހަމަލާއެއް ދޭނެ ކަމުގެ އިންޒާރު އަސްކަރިއްޔާއިން ވަނީ ދީފަ އެވެ.

މީގެ އިތުރުން، އީރާނުގެ ރައްޔިތުންގެ ކެތްތެރިކަމާއި އަޒުމް، އަދި އީރާނުގެ އަސްކަރިއްޔާއާއި އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ގާބިލުކަން ވަޒަންކުރުމުގައި ދުޝްމަނުންނަށް ހެދޭ ކޮންމެ ގޯހަކަށް ވަރަށް ބޮޑު އަގަކުން ބަދަލުދޭން ޖެހޭނެ ކަމަށްވެސް އެ ބަޔާނުގައި ބުނެފައިވެ އެވެ.

މި ހަމަލާއަކީ އެމެރިކާއިން ހަނގުރާމަ ހުއްޓާލުމުގެ އެއްބަސްވުންތަކާ ތަކުރާރުކޮށް ޚިލާފުވެ، އީރާނުގެ ސަރަހައްދުތަކަށް ދެމުންދާ ހަމަލާތަކާ ގުޅިގެން، މުޅި ސަރަހައްދުގައި ހުރި އެމެރިކާގެ އަސްކަރީ އަމާޒުތަކަށް ރައްދު ދިނުމަށް އީރާނުން ފަށާފައިވާ ފުޅާ އޮޕަރޭޝަނުގެ ބައެކެވެ.

ވޭތުވެދިޔަ ހަފުތާގެ ތެރޭގައި އެމެރިކާއިން ވަނީ އީރާނަށް އަމާޒުކޮށް އެތައް ފަހަރަކު ހަމަލާދީފަ އެވެ. މި ހަމަލާތައް އަމާޒުކޮށްފައިވަނީ ފާލަންތަކާއި، ރޭލުވޭ ސްޓޭޝަންތަކާއި، އެއާޕޯޓުތަކުގެ އިތުރުން އާންމުން ދިރިއުޅޭ އަވަށްތައް ފަދަ މަދަނީ ތަންތަނަށެވެ.

އީރާނުގެ ހެލްތު މިނިސްޓްރީން ހާމަކޮށްފައިވާ ގޮތުގައި، އެމެރިކާއިން މިހާރު ދެމުންދާ ހަމަލާތަކުގައި މިހާތަނަށް މަދުވެގެން 35 އާންމުން މަރުވެފައިވެ އެވެ. މީގެ ތެރޭގައި އަންހެނުންނާއި ކުޑަކުދިން ހިމެނޭއިރު، 300 އަށްވުރެ ގިނަ މީހުން ވަނީ ޒަޚަމްވެފަ އެވެ.

މި ހަމަލާތަކުގެ ބަދަލުހިފުމުގެ ގޮތުން އީރާނުގެ އަސްކަރީ ބާރުތަކުން ދަނީ އެކި ފިޔަވަހިތަކަށް ބަހާލައިގެން ސިލްސިލާ އޮޕަރޭޝަންތަކެއް ހިންގަމުންނެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އާއި އީރާނުގެ އަސްކަރިއްޔާއިން ވަނީ ޕާޝިއަން ގަލްފް ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީފަ އެވެ. މީގެ ތެރޭގައި ކުވެއިތު، ބަހްރައިން އަދި އުރުދުންގައި ހުރި އެމެރިކާގެ ބޭސްތައް ހިމެނެ އެވެ.