އެމެރިކާގެ ހަމަލާތަކާ ގުޅިގެން އީރާންގެ ހޮސްޕިޓަލުން 211 ބަލި މީހުން ބަދަލު ކޮށްފި

އެމެރިކާ އިން އީރާނުގެ އަހްވާޒް އަށް ދިން ވަރުގަދަ ހަމަލާތަކާ ގުޅިގެން އެ ސިޓީގެ ހޮސްޕިޓަލެއްގައި ތިބި 200 އަށް ވުރެ ގިނަ ބަލި މީހުން ރައްކާތެރި ސަރަހައްދު ތަކަށް ބަދަލު ކޮށްފި އެވެ.

އީރާންގެ ދައުލަތުގެ މީޑިއާ، އައިއާރުއައިބީ އިން ރިޕޯޓު ކޮށްފައިވާ ގޮތުގައި އެމެރިކާގެ ހަމަލާތަކާ ގުޅިގެން ހުސްކުރަން ޖެހުނީ އަހްވާޒްގައި ހުންނަ "ޝަހީދު ބަޣާއީ ހޮސްޕިޓަލް" އެވެ. މި ހޮސްޕިޓަލް އަށް ދިން ހަމަލާ ތަކުގެ ސަބަބުންނާއި، ސަލާމަތީ ފިޔަވަޅެއްގެ ގޮތުން އެތަނުގައި ފަރުވާ ހޯދަމުން ދިޔަ 211 ބަލި މީހަކު ވަނީ އެހެން ސިއްހީ މަރުކަޒު ތަކަށް ވަގުތުން ބަދަލު ކޮށްފައި އެވެ.

މި ހަމަލާ ތަކަކީ އެމެރިކާ ސަރުކާރުން އެ ސަރަހައްދުގައި ހިންގަމުންދާ އަސްކަރީ އޮޕަރޭޝަން ތަކުގެ ތެރެއިން ދީފައިވާ ހަމަލާ ތަކެކެވެ. އައިއާރުއައިބީ އިން ބުނި ގޮތުގައި ބަލި މީހުން ބަދަލު ކުރުމުގެ މަސައްކަތް ކުރިއަށް ގެންގޮސްފައި ވަނީ ވަރަށް ކުއްލި ގޮތަކަށެވެ. އެހެން ނަމަވެސް، މި ހާދިސާގައި ބަލި މީހަކަށް ނުވަތަ ހޮސްޕިޓަލްގެ މުވައްޒަފަކަށް ލިބުނު އަނިޔާއެއްގެ ތަފްސީލު އެ މީޑިއާ އިން ހާމަ ކޮށްފައި ނުވެ އެވެ.

އެމެރިކާ އިން އީރާންގެ އެކި ސަރަހައްދު ތަކަށް އަމާޒުކޮށް ދެމުންދާ ހަމަލާ ތަކުގެ ސަބަބުން އެ ގައުމުގެ އާންމު ޚިދުމަތް ތަކަށް ބޮޑެތި ބުރޫ ތަކެއް އަރަމުންދާކަން ފާހަގަ ކުރެވެ އެވެ. ޚާއްސަކޮށް ސިއްހީ ޚިދުމަތްދޭ ތަންތަނަށް މިފަދަ ހަމަލާ ތަކުގެ އަސަރު ކުރުމަކީ އާންމު ރައްޔިތުންގެ މެދުގައި ބޮޑު ކަންބޮޑުވުމެއް އުފެދިފައިވާ ކަމެކެވެ.

ޝަހީދު ބަޣާއީ ހޮސްޕިޓަލް އިން ބަދަލުކުރި ބަލި މީހުންނަށް މިހާރު އެހެން ހޮސްޕިޓަލް ތަކުން ފަރުވާ ދެމުންދާ ކަމަށާއި، އެމީހުންގެ ހާލަތު ކައިރިން ބަލަމުންދާ ކަމަށް އީރާންގެ ސިއްހީ އިދާރާ ތަކުން މައުލޫމާތު ދީފައިވެ އެވެ. މި ހަމަލާތަކާ ގުޅިގެން އެމެރިކާގެ ދިފާއީ ވުޒާރާ އިން ވަކި އެއްޗެއް ބުނެފައި ނުވެ އެވެ.