ވައިޓް ހައުސްގެ ޓެލެޕްރޮމްޕްޓަރ އޮޕަރޭޓަރަކު ޓްރަމްޕްގެ ސްޕީޗްތަކުގެ ސިއްރު މަޢުލޫމާތު ބެޓް ކުރަން ބޭނުންކޮށްގެން ލައްކަ އެއްހާ ޑޮލަރު ހޯދި މައްސަލަ ފަޅާ އަރައފި

ވައިޓް ހައުސްގެ ޓެލެޕްރޮމްޕްޓަރ އޮޕަރޭޓަރެއްގެ ގޮތުގައި މަސައްކަތްކުރާ މުވައްޒަފަކު، އެމެރިކާގެ ރައީސް ޑޮނަލްޑް ޓްރަމްޕް ދެއްވާ ތަޤުރީރުތަކާ ގުޅޭގޮތުން އިންސައިޑަރ އިންފޮމޭޝަން ނުވަތަ އެތެރޭގެ ސިއްރު މަޢުލޫމާތު ބޭނުންކޮށްގެން ބޮޑެތި ބެޓްތަކެއް ނުވަތަ މުޢާމަލާތްތަކެއް ހިންގައި، ގާތްގަނޑަކަށް 100,000 ޑޮލަރު ހޯދި ކަމަށް ތުހުމަތުކުރެވޭ މައްސަލައެއް ތަޙުޤީޤު ކުރަން ފަށައިފި އެވެ.

2016 ވަނަ އަހަރުން ފެށިގެން ވައިޓް ހައުސްގައި މަސައްކަތް ކުރަމުން އަންނަ ގޭބްރިއަލް ޕެރޭޒްގެ މައްޗަށް ތުހުމަތު ކުރެވެނީ، ރައީސް ޓްރަމްޕް ދެއްވާ "ސްޓޭޓް އޮފް ދަ ޔޫނިއަން" ފަދަ މުހިންމު ތަޤުރީރުތަކުގައި ބޭނުންކުރައްވާނެ ވަކި ޚާއްޞަ ބަސްތަކަކަށް އަމާޒުކޮށް ބެޓް ކުރި ކަމަށެވެ.

މި މުޢާމަލާތްތައް ހިންގާފައިވަނީ ދުނިޔޭގައި ހިނގާ އެކި ހާދިސާތަކާ ގުޅޭގޮތުން ކުރިއާލައި ގޮތް ނިންމައި ބެޓް ކުރެވޭ "ކަލްޝީ" ނަމަކަށް ކިޔާ ޕްލެޓްފޯމެއްގަ އެވެ. އެ ކުންފުނިން ކަށަވަރުކޮށްދީފައިވާ ގޮތުގައި، މި މައްސަލަ މިހާރު ވަނީ އެ ޕްލެޓްފޯމް ރެގިއުލޭޓްކުރާ އިދާރާ ކަމަށްވާ ކޮމޮޑިޓީ ފިއުޗާސް ޓްރޭޑިންގ ކޮމިޝަން (ސީ.އެފް.ޓީ.ސީ) އަށް ރިޕޯޓްކޮށްފަ އެވެ.

ޚަބަރުތައް ބުނާގޮތުން، މި މުޢާމަލާތްތަކުން ލިބުނު އެއްވެސް ފައިސާއެއް ނެގުމުގެ ކުރިން، ކަލްޝީން ވަނީ ޕެރޭޒްގެ އެކައުންޓް ފްރީޒްކޮށްފަ އެވެ.

ބީ.ބީ.ސީ އަށް މަޢުލޫމާތު ދެމުން އެ ޕްލެޓްފޯމުން ބުނީ، މިދިޔަ މާރިޗު މަހުގެ ތެރޭގައި "މެންޝަން މާކެޓްސް" ނުވަތަ ތަޤުރީރު ދޭ ފަރާތަކުން ވަކި ޤައުމުތަކެއްގެ ނަން، އިޤްތިޞާދީ ބަސްތައް ނުވަތަ ކެމްޕޭން ޝިއާރުތައް ބޭނުންކުރާނެތޯ ކުރީބައިގައި ލަފާކޮށް ކުރާ ބެޓްތަކުގައި އާދަޔާ ޚިލާފު ކަންތައްތަކެއް އެ ކުންފުނީގެ އެނަލިސްޓުންނަށް ފާހަގަކުރެވުނު ކަމަށެވެ.

ކަލްޝީން ހާމަކުރި ގޮތުގައި، ރައީސުންނާއި ފެޑަރަލް ރިޒާވްގެ ޗެއަރމަނުން ފަދަ ސިޔާސީ ލީޑަރުން ބޭނުންކުރައްވާ ބަސްތަކުގެ ސަބަބުން، ބޭރު ފައިސާގެ ބާޒާރާއި، ތެލުގެ އަގާއި، އަދި ހިއްސާގެ ބާޒާރަށް ބިލިއަނުން ޑޮލަރުގެ ބަދަލުތައް އާދެ އެވެ.

އެކައުންޓްގެ މަޢުލޫމާތުތައް ބޭނުންކޮށްގެން އެ ކުންފުނިން ކުރި ތަޙުޤީޤުން އެނގުނު ގޮތުގައި، މި މުޢާމަލާތްތައް ހިންގާފައިވަނީ ވައިޓް ހައުސްގެ ޓެލެޕްރޮމްޕްޓަރުތައް އޮޕަރޭޓްކުރާ ފެޑަރަލް މުވައްޒަފެކެވެ.

މި މުޢާމަލާތްތަކުން ލިބުނު 90,000 އަށްވުރެ ގިނަ ޑޮލަރު އެކައުންޓުން ނެގުމުގެ ކުރިން އެކްސްޗޭންޖުން ވަނީ އެ ފައިސާ ހިފަހައްޓާފަ އެވެ. ކަލްޝީގެ ހެޑް އޮފް އެންފޯސްމަންޓް ރޮބަޓް ޑިނޯލްޓް ވިދާޅުވީ، އެ ކުންފުނިން މި މުޢާމަލާތްތައް ފާހަގަކޮށް، އޭގެ ހެކިތައް ރެގިއުލޭޓަރުންނާ ހަވާލުކޮށްފައިވާ ކަމަށެވެ.

ވައިޓް ހައުސްގެ ޕްރެސް ސެކްރެޓަރީ ކެރޮލިން ލީވިޓް ވިދާޅުވީ، ޓެލެޕްރޮމްޕްޓަރ އޮޕަރޭޓަރުގެ މި މައްސަލަ ރައީސް ޓްރަމްޕަށް އެނގިވަޑައިގަންނަވާ ކަމަށާއި، އެ މުވައްޒަފު މިހާރު ހުރީ މުސާރަ ނުލިބޭ ގޮތަށް ސަސްޕެންޝަނެއްގައި ކަމަށެވެ. އަދި މިއީ ވަރަށް ދެރަކޮށް ހިނގި ކަމެއް ކަމަށާއި މީގެ ފަހުން ޕެރޭޒް ވައިޓް ހައުސްގައި މަސައްކަތް ނުކުރާނެ ކަމަށްވެސް އޭނާ ވިދާޅުވި އެވެ.