އިސްރާއީލާ ގުޅުން ވަރުގަދަކުރުމުގެ ގޮތުން ގުދުސްގައި އެމްބަސީއެއް ހުޅުވަން ކޮލަމްބިއާގެ އިންތިޚާބީ ރައީސް ނިންމަވައިފި

ކޮލަމްބިއާގެ އެމްބަސީ އެއް ގުދުސްގައި ހުޅުވާނެ ކަމަށާއި، އިސްރާއީލާ ދެކޮޅަށް ބައިނަލްއަގުވާމީ އަދުލު އިންސާފާ ބެހޭ ކޯޓު (އައިސީޖޭ) އަށް ހުށަހަޅާފައިވާ މައްސަލައިން ވަކިވާނެ ކަމަށް ކޮލަމްބިއާގެ އިންތިޚާބީ ރައީސް އަބެލާޑޯ ޑި ލާ އެސްޕްރިއޭލާ ވިދާޅުވެއްޖެ އެވެ.

އިންތިޚާބީ ރައީސްގެ އޮފީހުން ނެރުނު ބަޔާނެއްގައި ބުނެފައިވަނީ، ގުދުސްގައި އެމްބަސީއެއް ހުޅުވަން ނިންމެވީ އިސްރާއީލާ އޮތް "ތާރީޚީ އިއްތިހާދު" އަލުން އިއާދަކުރުމަށް ކުރައްވާ މަސައްކަތުގެ ދަށުން ކަމަށެވެ.

މީގެ އިތުރުން، ދެކުނު އެފްރިކާއިން އިސްރާއީލާ ދެކޮޅަށް އައިސީޖޭއަށް ހުށަހަޅާފައިވާ މައްސަލައިގެ ތެރެއަށް ކޮލަމްބިއާއިން ތަދައްޚުލު ވެފައި އޮތް އޮތުން އަނބުރާ ގެންދާނެ ކަމަށްވެސް އެ ބަޔާނުގައި ބުނެފައިވެ އެވެ.

ދެކުނު އެފްރިކާއިން ހުށަހެޅި މި ތާރީޚީ މައްސަލައިގައި ތުހުމަތުކޮށްފައިވަނީ، އިސްރާއީލުން ޣައްޒާގައި ހިންގަމުންދާ ހަނގުރާމައިގައި ފަލަސްތީނުގެ ރައްޔިތުންނާ ދެކޮޅަށް ނަސްލު ނައްތާލުމުގެ ގަތުލުއާންމެއް ހިންގަމުންދާ ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕްގެ ތާއީދާ އެކު އިންތިޚާބުވި ކޮލަމްބިއާގެ "ޑިފެންޑާސް އޮފް ދަ ހޯމްލޭންޑް" ޕާޓީގެ ކަނާތު ފިޔައިގެ ލީޑަރު، އެސްޕްރިއޭލާ އިސްރާއީލާ މެދު ގެންގުޅުއްވާ މި ސިޔާސަތަކީ، އިސްރާއީލަށް ވަރަށް ބޮޑަށް ފާޑުވިދާޅުވި އެ ގައުމުގެ ކުރީގެ ރައީސް، ވާތު ފިޔައިގެ ގުސްތާވޯ ޕެޓްރޯގެ ސިޔާސަތާ މުޅިން އިދިކޮޅު ސިޔާސަތެކެވެ.