ގަލްފް ގައުމުތަކަށް އީރާނުގެ ހަމަލާތައް ކުރިއަށްދާއިރު، އެމެރިކާއިން އީރާނުގެ ބަނދަރުތައް އަލުން ބަންދުކޮށްފި: އެންމެ ފަހުގެ މައުލޫމާތަކީ ކޮބައި؟

ސުލްހައަށް އެޅުނު ފިޔަވަޅެއްގެ ގޮތުގައި ބެލެވުނު އެއްބަސްވުމުގައި ސޮއިކުރިތާ މަހެއްވެސް ނުވަނީސް، އެމެރިކާއިން އީރާނުގެ ބަނދަރުތަކަށް ކަނޑުގެ މަގުން އަޅާފައިވާ ހުރަސްތައް (ނޭވަލް ބްލޮކޭޑް) އަލުން އިއާދަކޮށްފި އެވެ.

ހުރްމުޒް ކަނޑުއޮޅިން ދަތުރުކުރާ އުޅަނދުފަހަރަށް އީރާނުން ދެމުންދާ ހަމަލާތަކަށް ރައްދުދިނުމުގެ ގޮތުން، އީރާނަށް އަމާޒުކޮށް ދިން ހަމަލާތަކުގެ އެންމެ ފަހުގެ ބުރު ނިންމާލާފައިވާ ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުދަ ދުވަހު ވަނީ ބުނެފަ އެވެ. އެމެރިކާގެ ސިފައިން މިހާރު ދަނީ އީރާނުގެ ބަނދަރުތަކަށާއި އައްސޭރިފަށުގެ ސަރަހައްދުތަކަށް ވަދެ ނިކުމެވާ އުޅަނދުފަހަރަށް ހުރަސްއަޅަމުންނެވެ. ނަމަވެސް، ހުރްމުޒް ކަނޑުއޮޅީގެ މައްޗަށް އޮތް އީރާނުގެ ބާރުވެރިކަމަށް އެއްވެސް ބަދަލެއް ނާންނާނެ ކަމަށް އެ ގައުމުން ބުނެ އެވެ.

މީގެ އިތުރުން، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ބުނެފައިވަނީ، ރޭގަނޑުގެ ވަގުތެއްގައި ބަހްރައިން، ކުވެއިތު އަދި އުރުދުންގައި ހުރި އެމެރިކާގެ އަސްކަރީ މަރުކަޒުތަކަށް ރައްދުގައި ޑްރޯން އަދި މިސައިލް ހަމަލާތަކެއް ދީފައިވާ ކަމަށެވެ.

އަންގާރަ ދުވަހުގެ ރޭގަނޑާއި ބުދަ ދުވަހު އީރާނާއި އެމެރިކާއާ ދެމެދު ހިނގާދިޔަ ކަންތައްތަކާއި، ދެ ފަރާތުން ދައްކާފައިވާ ވާހަކަތަކުގެ ޚުލާސާއެއް ތިރީގައި އެވަނީ އެވެ.

އެމެރިކާއިން އީރާނަށް ހަމަލާދިނީ ކޮން ތަންތަނަކަށް؟

ސެންޓްކޮމް އިން ހާމަކުރި ގޮތުގައި، ބުދަ ދުވަހުގެ ގްރީނިޗް މީން ޓައިމްއިން 02:00 ހާއިރު، އީރާނަށް އަމާޒުކޮށް އިތުރު ހަމަލާތަކެއް ވަނީ ދީފަ އެވެ. މި ހަމަލާތަކުގައި ހުރްމުޒް ކަނޑުއޮޅި ކައިރީގައިވާ ސަރަހައްދުތަކާއި އީރާނުގެ އައްސޭރިފަށުގެ "އަސްކަރީ އެތައް އަމާޒަކަށް" ހަމަލާދީފައިވާ ކަމަށް އެމެރިކާއިން ބުނެ އެވެ.

މި ހަމަލާތައް ހަތް ގަޑިއިރަށް ދެމިގެންދިޔަ ކަމަށާއި، އެމެރިކާގެ ހަނގުރާމަމަތީ މަތިންދާބޯޓުތަކާއި، ޑްރޯންތަކާއި، ކަނޑުގެ އުޅަނދުފަހަރު ބޭނުންކޮށްގެން އީރާނުގެ މިސައިލް އަދި ޑްރޯން މަރުކަޒުތަކަށާއި، ކަނޑުގެ އަސްކަރީ ގާބިލްކަމާއި، އައްސޭރިފަށުގެ ދިފާއީ ނިޒާމުތަކަށް އަމާޒުކޮށް "ޕްރެސިޝަން މިއުނިޝަންސް" ނުވަތަ އަމާޒަށް ސީދާވާ ގޮވާއެތި ބޭނުންކޮށްގެން ހަމަލާދީފައިވާ ކަމަށް ސެންޓްކޮމް އިން އިތުރަށް ބުންޏެވެ.

އީރާނުގެ މީޑިއާތަކުން ބުދަ ދުވަހު ރިޕޯޓްކޮށްފައިވާ ގޮތުގައި، އެމެރިކާގެ މިސައިލްތައް ވަނީ އީރާނުގެ ޗަބަހާރު ސިޓީގައި ހުރި ކަނޑުގެ ސަރަހައްދު ބަލަހައްޓާ ޓަވަރަކަށް އަރާފަ އެވެ. މި ޓަވަރަކީ ކަނޑުގެ ސަލާމަތީ ކަންކަން ބެލެހެއްޓުމަށާއި މަސްވެރިން ހޯދާ ސަލާމަތްކުރުމުގެ މަސައްކަތްތަކަށް ބޭނުންކުރާ މަދަނީ ވަސީލަތެކެވެ.

އީރާނުގެ ސްޓޫޑަންޓް ނިއުސް ނެޓްވޯކް (އެސްއެންއެން) އިން ބުދަ ދުވަހު ބުނި ގޮތުގައި، އެމެރިކާއިން ވަނީ އީރާނުގެ އިރުދެކުނު ސިސްތާން އަދި ބަލޫޗިސްތާން ޕްރޮވިންސްގެ ބަމްޕޫރުގައި ހުރި އަސްކަރީ މަރުކަޒަކަށްވެސް ހަމަލާދީފަ އެވެ.

އީރާނުގެ ހެލްތު މިނިސްޓްރީގެ ތަރުޖަމާނު ހުސައިން ކަރްމަންޕޫރު ވިދާޅުވި ގޮތުގައި، ރޭގަނޑު އެމެރިކާއިން ދިން ހަމަލާތަކުގައި 260 އަށްވުރެ ގިނަ މީހުން ވަނީ ޒަޚަމްވެފަ އެވެ. މީގެ އިތުރުން، އެންމެ ފަހުން ދިން މި ހަމަލާތަކުގައި 30 އަށްވުރެ ގިނަ އާންމުން މަރުވެފައިވާ ކަމަށް ތެހެރާނުން ބުނެ އެވެ.

ގަލްފް ސަރަހައްދުގައި އީރާނުން ހަމަލާދިނީ ކޮން ތަންތަނަކަށް؟

ކުވެއިތު:

ކުވެއިތުގެ އަސްކަރިއްޔާއިން ބުދަ ދުވަހު ބުނީ، އީރާނުން ދެމުންދާ މިސައިލް އަދި ޑްރޯން ހަމަލާތަކަށް ރައްދުދެމުންދާ ކަމަށާއި، ކަމާބެހޭ ފަރާތްތަކުން ދޭ ސަލާމަތީ އިރުޝާދުތަކަށް ތަބާވުމަށް އާންމުންނަށް އިލްތިމާސްކުރާ ކަމަށެވެ. ކުވެއިތުގެ މިނިސްޓްރީ އޮފް ޑިފެންސްއިން ރިޕޯޓްކޮށްފައިވާ ގޮތުގައި، އީރާނުގެ ހަމަލާއެއް ކުވެއިތުގެ އަސްކަރީ އުޅަނދަކަށް އަރައި، ހަތަރު ސިފައިން ވަނީ ޒަޚަމްވެފަ އެވެ.

ބަހުރައިން:

ބަހުރައިން ގައި ވައިގެ މަގުން ދޭ ހަމަލާތަކުން ރައްކާތެރިވުމުގެ އެލާމްތައް ވަނީ އަޅާފައެވެ. އަދި އެ ގައުމުގެ އިންޓީރިއާ މިނިސްޓްރީން ވަނީ އާންމުން ހަމަޖެހިގެން ތިބުމަށާއި، އެންމެ ކައިރީގައިވާ ރައްކާތެރި ތަނަކަށް ވަނުމަށް އިލްތިމާސްކޮށްފަ އެވެ.

އުރުދުން:

އުރުދުންގެ އަސްކަރިއްޔާއިން ބުނި ގޮތުގައި، އެ ގައުމުގެ ވައިގެ ސަރަހައްދަށް ވަތް އީރާނުގެ ހަތަރު ބެލިސްޓިކް މިސައިލެއް އެ ގައުމުގެ ދިފާއީ ނިޒާމުން ވަނީ ހުއްޓުވައި ވައްޓާލާފަ އެވެ.

ދެ ފަރާތުން ދައްކާފައިވަނީ ކޮން ވާހަކަތަކެއް؟

އީރާނުގެ ޑެޕިއުޓީ ފޮރިން މިނިސްޓަރު ކާޒިމް ޣަރީބްއާބާދީ އަންގާރަ ދުވަހު ވިދާޅުވީ، އެމެރިކާއާއެކު އެއްބަސްވެފައިވާ ފަހުމުނާމާ (އެމް.އޯ.ޔޫ) މިހާރު ބާތިލުވެފައިވާ ކަމަށެވެ.

އެމެރިކާއިން އަލުން ބަނދަރުތައް ބަންދުކުރުމާ ގުޅިގެން، އައިއާރްޖީސީ އިން ވަނީ މެދުއިރުމަތިން ބޭރުކުރާ ހަކަތައިގެ ހުރިހާ ވަސީލަތްތަކެއް ހުއްޓުވާނެ ކަމަށް ބުނެ އިންޒާރު ދީފަ އެވެ. އެ ޖަމާއަތުން ބުނި ގޮތުގައި، "މި ސަރަހައްދުގެ ތެލާއި ގޭސް ބޭރުކުރެވޭނީ އެންމެންނަށް، ނޫނީ އެކަކަށްވެސް ބޭރު ނުކުރެވޭނެ" އެވެ.

އެމެރިކާގެ ޓްރެޜަރީ ޑިޕާޓްމަންޓުން އަންގާރަ ދުވަހު ބުނީ، އީރާނުގެ މަރުކަޒީ ބޭންކާ ގުޅުންހުރި ކްރިޕްޓޯކަރަންސީ ވޮލެޓްތަކަކަށް ދަތިކުރުމުގެ ފިޔަވަޅު އަޅައި، 130 މިލިއަން ޑޮލަރަށްވުރެ ގިނަ ފައިސާ ފްރީޒްކޮށްފައިވާ ކަމަށެވެ.

އެމެރިކާގެ ޑިފެންސް ސެކްރެޓަރީ ޕީޓް ހެގްސެތު އަންގާރަ ދުވަހު ޕެންޓަގަންގައި އިރާގުގެ ބޮޑުވަޒީރު އަލީ އަލް-ޒައިދީއާ ބައްދަލުކުރައްވައި، ބަޣުދާދާއެކު ބާއްވާ ގުޅުން އިތުރަށް ބަދަހިކުރުމަށް ވޮޝިންޓަނުން ބޭނުންވާ ޝަރުތުތައް ވަނީ ހުށަހަޅުއްވާފަ އެވެ.

އެ ބައްދަލުވުމަށްފަހު އެކްސްގައި ކުރެއްވި ޕޯސްޓެއްގައި ހެގްސެތު ވިދާޅުވީ، އިރާގުން އެ ގައުމުގެ ސިޔާދަތު ދަމަހައްޓަންޖެހޭ ކަމަށާއި، އީރާނަށް ތާއީދުކުރާ ހަތިޔާރުއެޅި ޖަމާއަތްތައް ހުއްޓުވަން ކަމަށެވެ. އެމެރިކާއާއި އިސްރާއީލުން އީރާނާ ދެކޮޅަށް ކުރާ ހަނގުރާމައިގެ ތެރެއިން، އެމެރިކާގެ ސިފައިންނަށް ތަކުރާރުކޮށް ހަމަލާދެނީ އެ ޖަމާއަތްތަކުން ކަމަށް އޭނާ ތުހުމަތުކުރެއްވި އެވެ.

އދ. އަށް އީރާނުން ކަނޑައަޅާފައި ހުންނަ ދާއިމީ މަންދޫބު އާމިރު ސައީދު އިރަވާނީ ބުދަ ދުވަހު އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒްއަށް ފޮނުއްވި ސިޓީއެއްގައި ވިދާޅުވީ، "އެމެރިކާއަކީ އަނިޔާ ލިބޭ ފަރާތެއް ނޫން ކަމަށާއި، އެއީ އިސްވެ ހަމަލާދޭ ފަރާތް" ކަމަށެވެ.

އިރްނާ ނިއުސް އެޖެންސީން ރިޕޯޓްކޮށްފައިވާ ގޮތުގައި، އިރަވާނީ ލިޔުއްވާފައިވަނީ ތެހެރާނާއެކު ފަހުމުނާމާގައި ސޮއިކުރިތާ "ވަރަށް ކުރު މުއްދަތެއްގެ ތެރޭގައި"، ވޮޝިންޓަނުން އެ ގައުމުގެ ވައުދުތައް ފުއްދުމަށް ތަކުރާރުކޮށް އިންކާރުކޮށްފައިވާ ކަމަށާއި، އެ އެއްބަސްވުން ތަންފީޒުކުރުމަށް ގަސްދުގައި ހުރަސްއަޅާފައިވާ ކަމަށެވެ.