އީރާނަށް ދޭ ހަމަލާތައް ވަރުގަދަ ކުރަން ޓްރަމްޕް ސިޗުއޭޝަން ރޫމު ގައި ބައްދަލުވުމެއް ބާއްވައިފި
15 ޖުލައި 2026 | ބުދަ 09:48އީރާނުގެ އެތެރޭގެ މުހިންމު އަމާޒުތަކަށް ވަރުގަދަ ހަމަލާތަކެއް ދިނުމަށް ރައީސް ޓްރަމްޕާއި ގައުމީ ސަލާމަތާ ބެހޭ އިސް ޓީމުން މަޝްވަރާކޮށްފިއެވެ. މި ރޭވުންތަކުގެ ބޭނުމަކީ ހުރްމުޒް ކަނޑުއޮޅި ހުޅުވާލުމަށް ބާރުއަޅައި، އީރާނުގެ އަސްކަރީ ގާބިލުކަން ކުޑަކުރުމެވެ. މީގެ އިތުރުން، އީރާނުގެ ބަނދަރުތައް ބަންދުކުރުމުގެ އޮޕަރޭޝަނެއް އެމެރިކާގެ ކަނޑުގެ ސިފައިން މިހާރު ވަނީ ފަށާފައެވެ.
އެމެރިކާގެ ރައީސް ޑޮނަލްޑް ޓްރަމްޕާއި، ވައިޓް ހައުސްގެ ޗީފް އޮފް ސްޓާފް ސޫޒީ ވައިލްސް އާއި، ޖޮއިންޓް ޗީފްސް އޮފް ސްޓާފްގެ ޗެއާމަން ޑެން ކޭން އާއި، ނައިބު ރައީސް ޖޭޑީ ވޭންސްގެ އިތުރުން ސެކްރެޓަރީ އޮފް ސްޓޭޓް މާކޯ ރޫބިއޯ، 2025 ޖޫން 21 ވީ ދުވަހު ވައިޓް ހައުސްގެ ސިޗުއޭޝަން ރޫމްގައި ތިއްބަވައިގެން، އީރާނުގެ ނިއުކްލިއާ މަރުކަޒަކަށް އަމާޒުކޮށް ދިން ހަމަލާތަކުގެ މިޝަން ކުރިއަށްދާ ގޮތް ބައްލަވަނީ | ގެޓީ އިމޭޖަސް
އީރާނާ ދެކޮޅަށް މިހާރު ހިންގަމުންދާ އަސްކަރީ ހަރަކާތްތަކަށްވުރެ ފުޅާ ދާއިރާއެއްގައި ވަރުގަދަ ހަމަލާތަކެއް ދިނުމުގެ ރޭވުންތަކާ ގުޅޭގޮތުން، އެމެރިކާގެ ރައީސް ޑޮނަލްޑް ޓްރަމްޕް އަންގާރަ ދުވަހު ވައިޓް ހައުސްގެ ސިޗުއޭޝަން ރޫމްގައި ބައްދަލުވުމެއް ބާއްވަވާފައިވާ ކަމަށް، އެ މަޝްވަރާތަކުގެ މައުލޫމާތު ހުރި ތިން މަސްދަރަކާ ހަވާލާދީ އެކްސިއޯސް އިން ރިޕޯޓްކޮށްފި އެވެ.
އެ ރިޕޯޓުގައިވާ ގޮތުން، މި މަޝްވަރާތައް ބިނާވެފައިވަނީ އީރާނުގެ އެތެރޭގައި ހުރި މުހިންމު ސްޓްރެޓީޖިކް އަމާޒުތަކަށް ހަމަލާދިނުމާ ގުޅޭގޮތުންނެވެ. މިއީ ހުރްމުޒް ކަނޑުއޮޅި އަލުން ހުޅުވާލުމަށާއި، އީރާނުގެ ނިއުކްލިއާ ޕްރޮގްރާމާ ގުޅޭގޮތުން އެމެރިކާއިން ހުށަހަޅާފައިވާ ޝަރުތުތަކަށް ތެހެރާނުން އެއްބަސްވުމަށް މަޖުބޫރުކުރުވުމުގެ ގޮތުން، ޓްރަމްޕް ސަރުކާރުން އަސްކަރީ ފިއްތުންތައް އިތުރުކުރުމަށް ކުރަމުންދާ މަސައްކަތެކެވެ.
މި ބައްދަލުވުން ބާއްވާފައިވަނީ، ހުރްމުޒް ކަނޑުއޮޅި ހިމެނޭ ސަރަހައްދަށާއި އީރާނުގެ ދެކުނު އައްސޭރިފަށަށް އަމާޒުކޮށް އެމެރިކާގެ އަސްކަރިއްޔާއިން މެދުނުކެނޑި ހަމަލާދެމުންދާތާ ހަތަރުވަނަ ދުވަހު އެވެ.
އެމެރިކާގެ އޮފިޝަލުން އެކްސިއޯސްއަށް މައުލޫމާތު ދެއްވި ގޮތުގައި، މި ހަމަލާތައް މައިގަނޑު ގޮތެއްގައި އަމާޒުކޮށްފައިވަނީ އީރާނުގެ ވައިގެ ދިފާއީ ނިޒާމުތަކަށާއި، ރާޑަރު ސިސްޓަމްތަކަށާއި، މަނަވަރުތަކަށް ހަމަލާދޭ މިސައިލް އުދުއްސާ މަރުކަޒުތަކުގެ އިތުރުން ޑްރޯން ފޮނުވާލާ ތަންތަނަށެވެ. މީގެ ބޭނުމަކީ ކަނޑުއޮޅިން ދަތުރުކުރާ އުޅަނދުފަހަރަށް ހަމަލާދިނުމަށް އީރާނަށް އޮތް ގާބިލުކަން ބޮޑުތަނުން ކުޑަކުރުމެވެ.
އެ ރިޕޯޓުގައިވާ ގޮތުން، ހަމަ އެވަގުތު އީރާނުން ދަނީ އުރުދުން، ކުވެއިތު އަދި ބަހްރޭންގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް މިސައިލާއި ޑްރޯން ހަމަލާތައް ދެމުންނެވެ.
މީގެ އިތުރުން، އީރާނުގެ ބަނދަރުތައް ބަންދުކުރުމަށް އެމެރިކާގެ ކަނޑުގެ ސިފައިން ހިންގާ "ނޭވަލް ބްލޮކޭޑް" ނުވަތަ ކަނޑުގެ މަގު ބަންދުކުރުމުގެ އޮޕަރޭޝަން ވެސް އަންގާރަ ދުވަހުގެ މެންދުރުފަހު ވަނީ ފަށާފަ އެވެ.
އެމެރިކާގެ ސެންޓްރަލް ކޮމާންޑްގެ ވެރިޔާ އެޑްމިރަލް ބްރެޑް ކޫޕާ ވިދާޅުވީ، ވޭތުވެދިޔަ ހަފުތާގެ ތެރޭގައި އީރާނުން ގަސްދުގައި އެ ސަރަހައްދުގެ އާންމުންނަށް އަމާޒުކޮށް ހަމަލާދީފައިވާ ކަމަށެވެ. އެގޮތުން ވިޔަފާރިކުރާ ހަތް އުޅަނދަކަށް ހަމަލާދީ، އުޅަނދުފަހަރުގެ ފަޅުވެރިންގެ ތެރެއިން 12 އެއްހާ މީހުން މަރުވެ، ޒަޚަމްވެ ނުވަތަ ގެއްލިފައިވާ ކަމަށް އޭނާ ވިދާޅުވި އެވެ.
މި ހަމަލާތައް ކުރިއަށްދިޔަ ނަމަވެސް، ވޭތުވެދިޔަ ހަފުތާގެ ތެރޭގައި ހުރްމުޒް ކަނޑުއޮޅިން ގާތްގަނޑަކަށް 300 އެއްހާ އުޅަނދު ދަތުރުކުރުމުގައި އެމެރިކާގެ އަސްކަރިއްޔާއިން އެހީތެރިކަން ފޯރުކޮށްދީފައިވާ ކަމަށް އޮފިޝަލުން އެކްސިއޯސްއަށް މައުލޫމާތު ދީފައިވެ އެވެ.
އެކްސިއޯސްއިން ރިޕޯޓްކޮށްފައިވާ ގޮތުގައި، ސިޗުއޭޝަން ރޫމްގައި ބޭއްވި މި ބައްދަލުވުމުގައި ރައީސް ޓްރަމްޕްގެ އަރިހުގައި ގައުމީ ސަލާމަތާ ބެހޭ ޓީމުގެ އިސް ބޭފުޅުން ބައިވެރިވެވަޑައިގެންނެވި އެވެ. އޭގެ ތެރޭގައި ނައިބު ރައީސް ޖޭޑީ ވެންސް، ސެކްރެޓަރީ އޮފް ސްޓޭޓް މާކޯ ރޫބިއޯ، ޑިފެންސް ސެކްރެޓަރީ ޕީޓް ހެގްސެތު، ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޑެން ކޭން، ސީއައިއޭގެ ޑިރެކްޓަރު ޖޯން ރެޓްކްލިފް އަދި ވައިޓް ހައުސްގެ އެންވޯއީ ސްޓީވް ވިޓްކޮފް ހިމެނިވަޑައިގަންނަވަ އެވެ.
މަސްދަރުތަކުން ބުނާ ގޮތުގައި، މި މަޝްވަރާތައް މައިގަނޑު ގޮތެއްގައި ބިނާކޮށްފައިވަނީ ކަނޑުއޮޅި ސަރަހައްދުގައި މިހާރު ހިންގާ އޮޕަރޭޝަންތަކުގެ އިތުރުން، އީރާނުގެ އެތެރޭގައި ހުރި މުހިންމު ތަންތަނަށް ބޮޑެތި ގެއްލުންތަކެއް ލިބޭނެ ފަދަ ވަރުގަދަ ހަމަލާތަކެއް ދިނުމުގެ ރޭވުންތަކަށެވެ.
