ޔޫއެސް ނޭވީގެ "ބްލޫ އެންޖެލްސް" ޖެޓުތަކުން ފްލޮރިޑާގެ ބީޗެއްގައި ބޮޑު ބިރުވެރިކަމެއް

އެމެރިކާގެ ފްލޮރިޑާގެ ބީޗެއްގައި ވަރަށް ތިރިން ޔޫއެސް ނޭވީގެ "ބްލޫ އެންޖެލްސް" ޖެޓުތައް އުދުހުމުގެ ސަބަބުން، އެ ސަރަހައްދުގެ ގޮނޑުދޮށުގައި ހުރި ޓެންޓުތަކާއި، ގޮނޑި އަދި ކުޑަތައް ވައިގެ ތެރެއަށް ބުރައިގެންގޮސް ބޮޑު ބިރު ވެރިކަމެއް އުފެދިއްޖެ އެވެ.

"ބްލޫ އެންޖެލްސް" ގެ ޖެޓެއް، ބުދަ ދުވަހު ފްލޮރިޑާގެ ބީޗެއްގެ ވަރަށް ތިރިން އުދުހުން | ރޮއިޓާސް

ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، އާންމުންގެ ބޯމަތިން ބާރު ސްޕީޑުގައި ޖެޓުތައް ދިޔަ ވަގުތު، އޭގެ އިންޖީނުގެ އަޑުގަދަކަމުންނާއި އުފެދުނު ވައިގެ ބާރުކަމުގެ ސަބަބުން ގޮނޑުދޮށުގައި ތިބި މީހުން ތިބީ ކަންބޮޑުވެ، ހައިރާންވެފަ އެވެ.

ޕެންސަކޯލާ ބީޗް އެއާ ޝޯގެ ބައެއްގެ ގޮތުގައި ކޮންމެ އަހަރަކު ބާއްވާ "ބްރެކްފަސްޓް ވިތު ދަ ބްލޫސް" ފްލައިއޯވަރ ހަރަކާތުގެ ތެރެއިން، ބުދަ ދުވަހު ޔޫއެސް ނޭވީގެ މި ޚާއްސަ ޖެޓުތައް ގޮނޑުދޮށާ ނުރައްކާތެރި މިންވަރަކަށް ތިރިން އުދުހުމުން، އެތަނުގައި ތިބި މީހުންގެ މެދުގައި ބޮޑު ބިރުވެރިކަމެއް އުފެދުނު ކަމަށް ރިޕޯޓުކޮށްފައިވެ އެވެ. 

ނެލިސް އެއަރ ފޯސް ބޭސްގައި އެމެރިކާގެ އެއަރ ފޯސް ތަންޑަރބާރޑްސްއާ ގުޅިގެން ކުރިއަށްގެންދިޔަ ތަމްރީނުތަކެއްގެ ތެރެއިން ބްލޫ އެންޖެލްސް ބޯޓުތައް އުދުހެނީ | ގެޓީ އިމޭޖަސް

ސޯޝަލް މީޑިއާގައި އާންމުކޮށްފައިވާ ވީޑިއޯތަކުން ފެންނަ ގޮތުގައި، ޖެޓުގެ އިންޖީނުން އުފެދުނު ބާރުގަދަ ވައިގެ ސަބަބުން ޓެންޓުތަކާއި، ބީޗް ގޮނޑި އަދި ކުޑަތައް ކޮންޓްރޯލެއް ނެތި ވައިގެ ތެރޭގައި އެނބުރެމުން ދިޔަ އެވެ. އަދި މިގޮތަށް ވިއްސައިގެން ދިޔަ ބައެއް ތަކެތި އެ ސަރަހައްދުގައި ތިބި ބައެއް މީހުންގެ ގައިގައި ޖެހިފައިވާ ކަމަށްވެސް ރިޕޯޓުތައް ބުނެ އެވެ.

މި ހާދިސާގައި އެއްވެސް މީހަކަށް އަނިޔާއެއް ލިބިފައިވާކަން ނުވަތަ ނޫންކަން މިހާތަނަށް ސާފުވެފައެއް ނުވެ އެވެ.

މި ހާދިސާގެ ސަބަބުން ބޮޑު ހަލަބޮލިކަމެއް އުފެދުނު ނަމަވެސް، ގޮނޑުދޮށަށް ގޮސް ތިބި ބައެއް މީހުން ބުނެފައިވަނީ މިއީ ގައުމީ ރޫހު ދައްކުވައިދިން، ދުވަހަކު ވެސް ހަނދާނުން ފޮހެވިގެން ނުދާނެ ފަދަ މަންޒަރެއް ކަމަށެވެ.