އިރާނުން ހުރްމުޒް ކަނޑުއޮޅިން ދަތުރުކުރި ދެ އުޅަނދަކަށް އިންޒާރުގެ ބަޑި ޖަހައިފި

އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން، ފާއިތުވި 24 ގަޑިއިރު ތެރޭގައި ހުއްދަނެތި ހުރްމުޒް ކަނޑުއޮޅިން ދަތުރުކުރަން އުޅުނު ދެ އުޅަނދަކަށް އިންޒާރުގެ ބަޑި ޖަހައިފި އެވެ.

ކަނޑުދަތުރުފަތުރާ ބެހޭ މައުލޫމާތު އެއްކުރާ ކްލެޕަރ ކުންފުނީގެ ތަފާސްހިސާބުތަކުން ދައްކާ ގޮތުގައި، އަންގާރަ ދުވަހު އެ ކަނޑުއޮޅި ހުރަސްކުރި 11 އުޅަނދުގެ ތެރެއިން ނުވަ އުޅަނދެއް ދަތުރުކޮށްފައިވަނީ އިރާނުގެ ކަނޑުގެ ސަރަހައްދާ ގާތުން އޮންނަ މަގުންނެވެ.

މި އުޅަނދުތަކަކީ މައިގަނޑު ގޮތެއްގައި ސާފުނުކުރާ ތެލާއި، ތެލުގެ އުފެއްދުންތަކާއި، ދިޔާ ގޭހާއި، މެތަނޯލް އަދި ދަގަނޑު  އުފުލާ އުޅަނދުތަކެކެވެ. އަދި މި އުޅަނދުތަކަކީ އިރާނުގެ ކަނޑުގެ ވިޔަފާރިއާ ގުޅުންހުރި އުޅަނދުތަކެއްކަން ފާހަގަކުރެވެ އެވެ.

ކްލެޕަރއިން ހާމަކުރި ގޮތުގައި، އިސްތިރާތީޖީ ގޮތުން މުހިންމު އެ ކަނޑުއޮޅި ހުރަސްކުރާ ގިނަ އުޅަނދުތައް މިހާރު ބޭނުންކުރަމުންދަނީ ތެހެރާނުން ކަނޑައަޅާފައިވާ މަގުތަކެވެ.

އައި.އާރް.ޖީ.ސީ އިން މި ފިޔަވަޅު އަޅާފައި މިވަނީ، ތެހެރާނާއި ވޮޝިންގޓަނާ ދެމެދު އިސްލާމްއާބާދުގައި ސޮއިކުރި ފަހުމުނާމާ (އެމް.އޯ.ޔޫ) އަށް ފަހު ފާއިތުވި ތިން ހަފުތާ ތެރޭގައި، އިރާނަށް ނިސްބަތްނުވާ 200 އަށްވުރެ ގިނަ އުޅަނދު ޕާޝިއަން ގަލްފް ސްޓްރެއިޓް އޮތޯރިޓީ (ޕީ.ޖީ.އެސް.އޭ) އާ ގުޅިގެން އެ ކަނޑުއޮޅި ހުރަސްކޮށްފައިވާ ކަމަށް އެ އޮތޯރިޓީން ރިޕޯޓުކޮށްފައިވާ ދަނޑިވަޅެއްގަ އެވެ.

ޕީ.ޖީ.އެސް.އޭ އަކީ ފެބްރުއަރީ މަހުގެ ފަހުކޮޅު އިރާނާ ދެކޮޅަށް އެމެރިކާ އާއި އިސްރާއީލުން ފެށި ހަނގުރާމައާ ގުޅިގެން، ކަނޑުއޮޅި އާއި އެ ސަރަހައްދުގެ ދަތުރުފަތުރުގެ ކަންކަން އިތުރަށް ހަރުދަނާކޮށް ބެލެހެއްޓުމަށް އިރާނުން އުފެއްދި އިދާރާއެކެވެ.

މި ހާދިސާތައް ހިނގާފައިވަނީ ޖޫން 17 ގައި ސޮއިކުރި ފަހުމުނާމާއާ އެމެރިކާއިން ތަކުރާރުކޮށް ޚިލާފުވަމުންދާތީ މަސްރަހު ނުތަނަވަސްވެފައިވާ ދަނޑިވަޅެއްގަ އެވެ.

ޖުލައި މަހުގެ 7 ވަނަ ދުވަހު، ހުރްމުޒް ކަނޑުއޮޅިން ދަތުރުކުރި ވިޔަފާރި އުޅަނދުތަކަކަށް ހަމަލާދިން ކަމަށް ބުނެ، އެމެރިކާއިން ވަނީ އިރާނުގެ ތެޔޮ ވިއްކުމަށް ދީފައިވާ ހުއްދަ ބާތިލުކޮށް، އިރާނުގެ އަސްކަރީ މަރުކަޒުތަކަށް ވައިގެ މަގުން ހަމަލާދީފަ އެވެ.

އޭގެ ފަހުން އެމެރިކާއިން ވަނީ އިރާނުގެ ސަރަހައްދުތަކަށް އެތައް ފަހަރަކު ހަމަލާދީފަ އެވެ. އަދި ޖުލައި 8 ވަނަ ދުވަހު އަންކާރާގައި ބޭއްވި ނޭޓޯގެ ސަމިޓުގައި ރައީސް ޑޮނަލްޑް ޓްރަމްޕް ވަނީ ހަމަލާބަދަލުކުރުން ހުއްޓާލުމުގެ އެއްބަސްވުން "ނިމުމަކަށް އަތުވެއްޖެ" ކަމަށް އިއުލާންކުރައްވާފަ އެވެ.

އެހެންނަމަވެސް، ދާއިމީ ސުލްހައިގެ އެއްބަސްވުމަކަށް އައުމަށްޓަކައި އެމެރިކާގެ މަންދޫބުން އިރާނާއެކު މަޝްވަރާތައް ކުރިއަށްގެންދާނެ ކަމަށް ޓްރަމްޕް ވިދާޅުވި އެވެ.

އިރާނުގެ އޮފިޝަލުން ވަނީ އެމެރިކާއިން ރޭވުންތެރިކަމާއެކު ފަހުމުނާމާއާ ޚިލާފުވަމުންދާ ކަމަށް ތުހުމަތުކޮށްފަ އެވެ. އދ. އަށް ކަނޑައަޅާފައި ހުންނަވާ އިރާނުގެ މަންދޫބު ވިދާޅުވި ގޮތުގައި، އެމެރިކާއިން ވަނީ އެ އެއްބަސްވުމާ މަދުވެގެން 42 ފަހަރު ބޮޑެތި ކަންކަމުގައި ޚިލާފުވެފަ އެވެ.

އިރާނުގެ ފޮރިން މިނިސްޓްރީން ވަނީ އެމެރިކާގެ ހަމަލާތަކަކީ، އަސްކަރީ އޮޕަރޭޝަންތައް ހުއްޓާލުމަށް ބާރުއަޅާ ފަހުމުނާމާގެ ފުރަތަމަ މާއްދާއާ ކަނޑައެޅިގެން ޚިލާފު އަމަލުތަކެއްގެ ގޮތުގައި ސިފަކޮށްފަ އެވެ.

އެމެރިކާއިން އެއްބަސްވުމާ ޚިލާފުވުމާ ގުޅިގެން، ތެހެރާނުން ވަނީ އެ ފަހުމުނާމާގެ ބައެއް މާއްދާތަކަށް އަމަލުކުރުން ހުއްޓާލާފައިވާ ކަމަށް ބުނެފަ އެވެ. އަދި އެމެރިކާއިން އެ އެއްބަސްވުން "މުޅިން ނައްތާލާފައިވާ" ކަމަށްވެސް އިރާނުން ބުނެ އެވެ.

އިރާނުގެ ޕާލަމެންޓުން މިހާރު ދަނީ ހުރްމުޒް ކަނޑުއޮޅީގެ ކޮންޓްރޯލް ރަސްމީކޮށް އިރާނުގެ ދަށަށް ގެނައުމަށް ބޭނުންވާ ގާނޫނުތައް މުރާޖައާ ކުރަމުންނެވެ.

ހުށަހެޅިފައިވާ މި ގާނޫނުގެ ދަށުން، އެ އިސްތިރާތީޖީ ކަނޑުއޮޅި ބެލެހެއްޓުމާއި ހިންގުމުގެ އޮނިގަނޑެއް އެކުލަވާލެވޭނެ އެވެ. މިއީ އެމެރިކާގެ ފިއްތުންތަކާއެކުވެސް، އެ ކަނޑުއޮޅީގެ ބާރުވެރިކަން ދެމެހެއްޓުމަށް އިރާނުން ހިފާފައިވާ އަޒުމް ހާމަކޮށްދޭ ކަމެކެވެ.