އިރާނުން މެދުއިރުމަތީ މޯބައިލް ނެޓްވޯކްތައް ހެކްކޮށް އެމެރިކާ ސިފައިން މޮނިޓަރ ކުރަނީ

އިރާނުން މެދުއިރުމަތީގެ މޯބައިލް ނެޓްވޯކްތައް ހެކްކޮށް، އެ ސަރަހައްދުގައި ހަރަކާތްތެރިވާ އެމެރިކާގެ ސިފައިންނާއި ކޮންޓްރެކްޓަރުންގެ ހަރަކާތްތައް މޮނިޓަރުކުރަމުންދާ ކަމަށް ލަންޑަނުގެ ފައިނޭންޝަލް ޓައިމްސް (އެފްޓީ) ނޫހުން ރިޕޯޓްކޮށްފި އެވެ.

އެ ނޫހުން މިކަން ހާމަކޮށްފައިވަނީ "މޯބައިލް ސަވައިލަންސް މޮނިޓަރ" ރިސާޗް ޕްރޮޖެކްޓުން އެއްކޮށްފައިވާ ޓެލެކޮމިއުނިކޭޝަން ޑޭޓާތަކާއި، މި މައުލޫމާތު އެނގޭ ފަރާތްތަކާ ހަވާލާދީ އެވެ.

މި މައުލޫމާތުތަކާ ގުޅިގެން އެމެރިކާގެ ގާނޫނު ހަދާ މަޖިލީހުގެ މެންބަރުން ވަނީ ކަންބޮޑުވުން ފާޅުކުރައްވާފަ އެވެ. ރޯމިންގް ނިޒާމުތަކާއި ސްމާޓްފޯން އިޝްތިހާރުކުރާ ޓެކްނޮލޮޖީގެ ސަބަބުން، އެމެރިކާގެ އަސްކަރިއްޔާއަށް އަމާޒުކޮށް ހަމަލާދިނުމުގެ ފުރުސަތު ބޮޑުވެފައިވާ ކަމަށް މެންބަރުން ވަނީ އިންޒާރު ދެއްވާފަ އެވެ.

މެދުއިރުމަތީގެ ގަލްފް ސަރަހައްދުގެ ގައުމުތަކުގެ އޮފިޝަލުން ތުހުމަތުކުރާ ގޮތުގައި، އިރާނުން ނުވަތަ އެ ގައުމަށް ތާއީދުކުރާ ޖަމާއަތްތަކުން ދަނީ އެ ސަރަހައްދުގެ ފޯން ނެޓްވޯކްތަކާއެކު ހަދާފައިވާ ރޯމިންގް އެއްބަސްވުންތަކުގެ ބޭނުން ނަހަމަގޮތުގައި ހިފައި، އެމެރިކާ ސިފައިން ތިބޭ ތަންތަން ދެނެގަތުމަށް މަސައްކަތް ކުރަމުންނެވެ. މީގެ އިތުރުން، އިރާނާ ގުޅުންހުރި ފަރާތްތަކުން އިރާގުގެ ކުރުދިސްތާން ސަރަހައްދުގައި ހަރަކާތްތެރިވާ މީހުންގެ ފޯނުތައް ޓްރެކްކުރުމަށްޓަކައި، ވިޔަފާރި އުސޫލުން ލިބެން ހުންނަ އިޝްތިހާރުކުރާ ޑޭޓާބޭސްތަކުގެ ބޭނުން ހިފާފައިވާ ކަމަށް، ނަން ހާމަނުކުރުމަށް އެދި އެމެރިކާގެ އޮފިޝަލަކު އެފްޓީ ނޫހަށް މައުލޫމާތު ދީފައިވެ އެވެ.

ސައިބަރ ސެކިއުރިޓީ ބަލަހައްޓާ "ސިޓިޒަން ލެބް" ގެ ސީނިއާ ރިސާޗް ފެލޯ، ގޭރީ މިލާ މި ޑޭޓާތައް ދިރާސާކުރުމަށްފަހު ވިދާޅުވީ، ވަގުތުން ވަގުތަށް މީހުން ތިބޭ ތަންތަނުގެ މައުލޫމާތު މެދުނުކެނޑި ހޯދުމުގެ ފުރިހަމަ ގާބިލުކަން އިރާނަށް ލިބިގެންވާ ކަމަށެވެ.

އޭނާ އިތުރަށް ފާހަގަކުރެއްވި ގޮތުގައި، މެދުއިރުމަތީގެ މޯބައިލް ނެޓްވޯކްތައް ނުވަތަ އެސްއެސް7 (SS7) ޕްރޮޓޮކޯލް މެދުވެރިކޮށް އެމެރިކާގެ ސިފައިންނާއި އޮފިޝަލުން ޓްރެކްކުރުމަށް އިރާނުން މަސައްކަތް ނުކުރާނެ ކަމަށް ދެކިގެން ނުވާނެ އެވެ.