އީރާން އަށް ވަރުގަދަ ހަމަލާ ތަކެއް ދޭނެ ކަމުގެ އިންޒާރު ނަތަންޔާހޫ ދެއްވައިފި

އިސްރާއީލް އަށް އައު ހަމަލާ ތަކެއް ދިނުމަށް އީރާން އިން ތައްޔާރު ވެއްޖެ ނަމަ، އެ ޤައުމަށް އަމާޒުކޮށް ވަރުގަދަ ހަމަލާ ތަކެއް ދޭނެ ކަމުގެ އިންޒާރު އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ދެއްވައިފި އެވެ. 

އަންގާރަ ދުވަހު އިސްރާއީލްގެ ދެކުނުގެ ޑިމޯނާ ސިޓީގައި ބޭއްވި ކޮންފަރެންސެއްގައި ވާހަކަ ދައްކަވަމުން ނަތަންޔާހޫ ވިދާޅުވީ، އިސްރާއީލް އަށް ހަމަލާ ދިނުމަށް ފަހު އީރާން އަށް ހަމަޖެހިގެން ނޯވެވޭނެކަން އެ ޤައުމުގެ ލީޑަރުންނަށް ވަރަށް ސާފުކޮށް އިނގެން ވާނެ ކަމަށެވެ. 

އިސްރާއީލުގެ ނިއުކްލިއާ ހަތިޔާރު ރައްކާ ކުރެވިފައިވާ ތަނެއްގެ ގޮތުގައި ފާހަގަ ކުރެވޭ ޑިމޯނާގައި ވާހަކަ ދައްކަވަމުން ނަތަންޔާހޫ ވިދާޅުވީ، ކޮންމެ ވެސް ބަޔަކު އިސްރާއީލް އަށް ހަމަލާ ދިނުމުން، އިސްރާއީލް އިން ރައްދުގައި ހަމަލާ ނުދީ ތިބި ދުވަސްތައް މާޒީވެފައިވާ ކަމަށެވެ. 

އިސްރާއީލުގެ އެންމެ ގާތް އެކުވެރިޔާ އެމެރިކާއާ އެކުވެގެން، މިއަހަރުގެ ކުރީ ކޮޅު އީރާން އަށް ދިން ހަމަލާ ތަކަށް ވުރެ މާ ވަރުގަދަ ހަމަލާއެއް އަންނަ އަހަރު ދިނުމަށް ތައްޔާރަށް ތިބި ކަމަށް ވެސް ނަތަންޔާހޫ ވިދާޅުވި އެވެ. ނަތަންޔާހޫގެ އޮފީހުން ނެރުނު ވީޑިއޯއެއްގައި ނަތަންޔާހޫ ވިދާޅުވީ، ކުރީގެ ހަމަލާތައް އަލުން ދެ ވަނަ ފަހަރަށް ދޭނެ ކަމަށް ހިތަށް އަރުވައިގެން ނުވާނެ ކަމަށެވެ. 

ކުރިން ދިން ހަމަލާތައް ވެސް ވަރަށް ވަރުގަދަ ކަމަށާއި، ނަމަވެސް ކުރިއަށް އޮތް ތަނުގައި ދޭ ހަމަލާތައް އެއަށްވުރެ ވަރުގަދަ ވާނެ ކަމަށް އޭނާ ވިދާޅުވި އެވެ. އަދި އެއީ މުޅިން އެހެން ބާވަތެއްގެ ހަމަލާ ތަކެއް ކަމަށް ވެސް ނަތަންޔާހޫ ވަނީ ވިދާޅުވެފައި އެވެ. 

ނަތަންޔާހޫ މި އިންޒާރު ދެއްވީ، އެމެރިކާ އިން އީރާން އަށް އައު ހަމަލާ ތަކެއް ދެމުން އަންނަ ދަނޑިވަޅެއްގައި އެވެ. އަދި އީރާންގެ ބަނދަރު ތަކަށް ހުރަސް އަޅާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވާފައި ވަނިކޮށެވެ. އެމެރިކާ އާއި އީރާން އިން އަންނަނީ މިދިޔަ ދުވަސް ތަކުގައި ހަމަލާތައް ބަދަލު ކުރަމުންނެވެ.

މިއަހަރުގެ ފެބްރުވަރީ މަހުގެ ތެރޭގައި އެމެރިކާ އާއި އިސްރާއީލް އެކުވެގެން އީރާން އަށް ހަމަލާ ދޭން ފެށުމުން، އޭގެ ރައްދުގައި އީރާން އިން ވެސް ވަރުގަދަ ހަމަލާ ތަކެއް ދީފައިވެ އެވެ. އެ ހަމަލާ ތަކުގައި އިސްރާއީލްގެ އެކި ސަރަހައްދު ތަަކަށް ވަނީ ބޮޑެތި ގެއްލުން ތަކެއް ލިބިފައި އެވެ.