އިރާގުގައި ހުންނަ އެމެރިކާގެ ކޮންސިއުލޭޓް ކައިރީގައި ބާރުގަދަ ގޮވުންތަކެއް

އިރާގުގެ އުތުރުގައި އޮންނަ ކުރުދިސްތާން ސަރަޙައްދުގެ ވެރިރަށް އުރުބީލް ގައި ހުންނަ އެމެރިކާގެ ކޮންސިއުލޭޓް ކައިރިން ބުދަ ދުވަހު ބާރުގަދަ ގޮވުންތަކެއްގެ އަޑު އިވިއްޖެ އެވެ.

މެދުއިރުމަތީގެ ހަނގުރާމައިގެ ތެރޭގައި ތަކުރާރުކޮށް ޑްރޯން އަދި ރޮކެޓް ހަމަލާތައް އަމާޒުވެފައިވާ އެމެރިކާގެ ކޮންސިއުލޭޓް ހިމެނޭ ސަރަޙައްދުގެ އެއަރ ޑިފެންސް ސިސްޓަމްތައް ނުވަތަ ވައިގެ ދިފާޢީ ނިޒާމުތައް މި ހާދިސާއާ ގުޅިގެން ވަނީ ހަރަކާތްތެރިވާން ފަށާފަ އެވެ.

އޭއެފްޕީގެ ނޫސްވެރިން ރިޕޯޓްކޮށްފައިވާ ގޮތުގައި، އުރުބީލް ގެ އުޑުމަތީގައި ބައެއް ޑްރޯންތައް އުދުހެމުން ދަނިކޮށް ފެނިފައިވެ އެވެ. އަދި އެއަރ ޑިފެންސް ސިސްޓަމުން އެ ޑްރޯންތަކަށް ހަމަލާދީ ވައްޓާލުމާއެކު ބާރުގަދަ ގޮވުންތަކެއްގެ އަޑު އިވި، އެ ސަރަޙައްދުން ދުން އަރަމުންދާ މަންޒަރު ފެނިފައިވާ ކަމަށްވެސް ނޫސްވެރިން ބުނެފައިވެ އެވެ.

މި ހަމަލާތަކުގެ ޒިންމާ މިހާތަނަށް އެއްވެސް ޖަމާޢަތަކުން އުފުލާފައެއް ނުވެ އެވެ.

މި ގޮވުންތައް އިވިފައިވަނީ އިރާގުގެ ބޮޑުވަޒީރު ޢަލީ އަލް-ޒައިދީ އެމެރިކާއަށް ކުރައްވާ އެއް ހަފުތާގެ ރަސްމީ ދަތުރުފުޅުގައި ވޮޝިންގޓަނަށް ވަޑައިގެން، ރައީސް ޑޮނަލްޑް ޓްރަމްޕާ ބައްދަލުކުރައްވަމުން ގެންދަވާ ދަނޑިވަޅެއްގަ އެވެ.

މީގެ އިތުރުން، މި ހަމަލާތައް ކުރިމަތިވެފައިވަނީ އެމެރިކާއާއި އީރާނާ ދެމެދު އަސްކަރީ ކުރިމަތިލުންތައް އަލުން އިތުރުވެ، މަސްރަޙު ގޯސްވެފައިވާ ދުވަސްވަރެއްގަ އެވެ.

މެދުއިރުމަތީގެ ހަނގުރާމައިގެ ތެރޭގައި، އެމެރިކާގެ ސިފައިންނާއި ބޭރުގެ ގިނަ އަދަދެއްގެ ތެޔޮ ކުންފުނިތައް ހަރަކާތްތެރިވާ ކުރުދިސްތާން ސަރަޙައްދަކީ ޑްރޯން ހަމަލާތަކުގެ މައިގަނޑު އަމާޒެކެވެ. މި ހަމަލާތައް ގިނައިން ދީފައިވަނީ އީރާނަށް ތާއީދުކުރާ އިރާގުގެ ހަތިޔާރު އެޅި ޖަމާޢަތްތަކުންނެވެ.

އީރާނުގެ ވެރިރަށް ތެހެރާނަށް ތާއީދުކޮށް، އެ ޖަމާޢަތްތަކުން ވަނީ އިރާގުގައި ހުންނަ އެމެރިކާގެ މަރުކަޒުތަކަށް 600 އަށްވުރެ ގިނަ ފަހަރު ހަމަލާދީފަ އެވެ.

ހަނގުރާމަ ފެށުނީއްސުރެ، އަދި މިދިޔަ އޭޕްރިލް މަހު ފެށުނު ނާޒުކު ހަނގުރާމަ ހުއްޓާލުމުގެ އެއްބަސްވުމަށް ފަހުވެސް، އީރާނުން ދަނީ އިރާގުގެ ކުރުދިސްތާނުގައި ކޭމްޕްތަކާއި މަރުކަޒުތައް ގާއިމުކޮށްފައިވާ އީރާނުގެ ކުރުދީ ހަނގުރާމަވެރި ޖަމާޢަތްތަކަށް ތަކުރާރުކޮށް ހަމަލާދެމުންނެވެ.