އީރާނުގެ ގޭޝްމް ޖަޒީރާ އަށް އެމެރިކާ އިން ހަމަލާދީފި

ހޮރްމޫޒް ކަނޑުއޮޅި ކައިރީގައި އޮންނަ އީރާނުގެ ރަށެއް ކަމަށްވާ ގޭޝްމް އަށް އަންގާރަ ދުވަހު ހަމަލާތަކެއް އަމާޒުވެފައިވާ ކަމަށް އެ ގައުމުގެ ދައުލަތުގެ މީޑިއާއިން ރިޕޯޓްކޮށްފި އެވެ. މި ހަމަލާތަކުގެ ޒިންމާ އީރާނުގެ އޮފިޝަލުން އަޅުވާފައިވަނީ އެމެރިކާގެ ބޮލުގަ އެވެ.

އައިއާރުއައިބީ އިން ރިޕޯޓްކޮށްފައިވާ ގޮތުގައި، ހުރްމުޒްގާންގެ ގަވަރުނަރުގެ އޮފީހުން ބުނެފައިވަނީ، އަންގާރަ ދުވަހުގެ ރޭގަނޑު 19:00 ހާއިރު ގޭޝްމް އައިލެންޑުގެ ސަރަހައްދަކަށް "ދުޝްމަން އެމެރިކާ" އިން ފޮނުވާލި ހަމަލާތަކެއް އަރާފައިވާ ކަމަށެވެ.

އެމެރިކާ އާއި އީރާނާ ދެމެދު އަލުން ކުރިމަތިލުންތައް އިތުރުވެފައިވާ ދަނޑިވަޅެއްގައި، އެ ރަށުން ގޮވުންތަކެއްގެ އަޑު އިވިފައިވާ ކަމަށް ސަރުކާރާ ގުޅުން އޮންނަ ފާރްސް ނިއުސް އެޖެންސީން މީގެ ކުރިން ވަނީ ރިޕޯޓްކޮށްފަ އެވެ.

ފާރްސް ނިއުސް އެޖެންސީން ބުނެފައިވަނީ، ގޭޝްމް އައިލެންޑުން ބާރުގަދަ ގޮވުންތަކެއްގެ އަޑު އިވިފައިވަނީ އެ ދުވަހުގެ އިރުއޮއްސި 18:45 ހާއިރު ކަމަށެވެ. އަދި ފާއިތުވި ދުވަސްތަކުގައި ގޭޝްމްގެ މެސްން ސަރަހައްދަށް އެމެރިކާގެ ފަރާތުން ތަކުރާރުކޮށް ހަމަލާތައް އަމާޒުވެފައިވާ ކަމަށްވެސް އެ އެޖެންސީން ބުނެފައިވެ އެވެ.

މި ހަމަލާތައް ދީފައިވަނީ އެމެރިކާއިން އީރާނަށް އަމާޒުކޮށް ވަރުގަދަ ހަމަލާތަކެއް ދޭން ފަށާފައިވާ ދަނޑިވަޅެއްގަ އެވެ. މީގެ އިތުރުން ޑޮނަލްޑް ޓްރަމްޕް ވަނީ އީރާނާ ދެކޮޅަށް ކަނޑުގެ މަގުން ހުރަސްތައް ކުރިމަތިކުރުވައި "ނޭވަލް ބްލޮކޭޑް" އެއް ގާއިމުކުރައްވާނެ ކަމަށް ވިދާޅުވެފަ އެވެ. މީގެ ރައްދުގައި އީރާނުން ވަނީ ސަރަހައްދީ ގައުމުތަކުގައި ހުރި އެމެރިކާގެ އެކި އަމާޒުތަކަށް ހަމަލާދީފަ އެވެ.

އެމެރިކާގެ އަސްކަރިއްޔާއިން މީގެ ކުރިން ބުނެފައިވަނީ، އީރާނުގެ ބަނދަރުމަތީ ރަށްތައް ކަމަށްވާ ބުޝެހްރް އަދި ބަންދަރު އައްބާސް ހިމެނޭހެން އެ ގައުމުގެ އެކި ސަރަހައްދުތަކަށް ހަމަލާދީފައިވާނެ ކަމަށެވެ. މި ހަމަލާތަކުގެ ބޭނުމަކީ ވިޔަފާރި އުޅަނދުފަހަރަށް ހަމަލާދިނުމަށް އީރާނުން ގެންގުޅޭ ގާބިލުކަން ކުޑަކޮށް، އެކަން ހުއްޓުވުން ކަމަށް އެމެރިކާއިން ބުނެފައިވެ އެވެ.