މެޓާގެ އައު އޭއައި ޓޫލް "މިއުސް އިމޭޖް" ބޭނުންކޮށްގެން، އެހެން މީހުންގެ ޕްރޮފައިލްތައް އެ މީހުންނަށް ނޭގި ފޮޓޯ އުފެއްދުމަށް ބޭނުންކުރެވޭ މައްސަލައިގައި ކަންބޮޑުވުން ފާޅުކުރަނީ

މެޓާގެ އައު އޭއައި ޓޫލް ކަމަށްވާ "މިއުސް އިމޭޖް" ބޭނުންކޮށްގެން، އެހެން މީހުންގެ ޕްރޮފައިލްތައް އެ މީހުންނަށް އެނގުމަކާ ނުލައި ފޮޓޯ އުފެއްދުމަށް ބޭނުންކުރެވޭތީ އެ ކުންފުންޏަށް ބޮޑެތި ފާޑުކިޔުންތަކެއް އަމާޒުވާން ފަށައިފި އެވެ.

މިއީ ލިޔެލާ ކުޑަ އިބާރާތްކޮޅަކުން ފޮޓޯ އުފައްދައިދޭ "ޓެކްސްޓް-ޓު-އިމޭޖް" ގިނަ ވަސީލަތްތަކުގެ ތެރެއިން އެއް ވަސީލަތެވެ.

މިއުސް އިމޭޖްގެ ޚިދުމަތް މިހާރު މެޓާ އޭއައި އެޕްލިކޭޝަނާއި ވެބް ބްރައުޒާގެ އިތުރުން، އެމެރިކާގައި ބޭނުންކުރާ ފަރާތްތަކަށް ވަޓްސްއެޕް އަދި އިންސްޓަގްރާމް ސްޓޯރީޒް މެދުވެރިކޮށް ލިބެން ހުރެ އެވެ.

އާންމުކޮށް ހުޅުވާލާފައިވާ (ޕަބްލިކް) އެކައުންޓްތަކުގެ ފޮޓޯތައް މިގޮތަށް ބޭނުންކުރުން ހުއްޓުވުމުގެ އިޚުތިޔާރު ޔޫޒަރުންނަށް އޮންނާނެ ކަމަށް މެޓާއިން ބުނި ނަމަވެސް، ޓެކްނޮލޮޖީގެ ދާއިރާގައި އިންސާފަށް މަސައްކަތްކުރާ ނޮން-ޕްރޮފިޓް ޖަމިއްޔާއެއް ކަމަށްވާ "ފޮކްސްގްލޯވް" ގެ އެޑްވޮކަސީ ޑިރެކްޓަރު ޑޮނަލްޑް ކޭމްޕްބެލް ބީބީސީ އަށް ވިދާޅުވީ، މިއީ ބޮޑު ކާރިސާއަކަށް މަގުފަހިވާނެ ކަމެއްކަން ސާފުކޮށް އެނގެން އޮތް ކަމެއް ކަމަށެވެ.

އޭނާ އިތުރަށް ވިދާޅުވީ، ވޭތުވެދިޔަ އެއް އަހަރު ދުވަހުގެ ތެރޭގައި މީހުންގެ ރުހުމާ ނުލައި އޭއައި ބޭނުންކޮށްގެން ފޮޓޯތަކަށް ބަދަލު ގެނައުމުގެ ސަބަބުން ސޯޝަލް މީޑިއާ ޕްލެޓްފޯމްތަކުގައި ލިބިފައިވާ ގެއްލުންތަކުގެ ގިނަ ހާދިސާތަކެއް ފެނިފައިވާ ކަމަށެވެ.

މިފަދަ ބިރުވެރި ގޮތަކަށް ފޮޓޯތަކަށް ބަދަލު ގެނައުމަށް މަގުފަހިކޮށްދިނުމަކީ ރަނގަޅު ކަމެއް ކަމަށް މާކް ޒަކަބާގަށް ހީވަނީ ކީއްވެގެންކަން ދެނެގަންނަން އުނދަގޫ ކަމަށްވެސް އޭނާ ވިދާޅުވި އެވެ.

އޭއައި ބޭނުންކޮށްގެން އުފައްދާ ފޮޓޯތަކާ މެދު ރެގިއުލޭޓަރުންނާއި ކެމްޕޭން ކުރާ ފަރާތްތަކުން ކަންބޮޑުވުން ފާޅުކުރަމުންދާ މި ދަނޑިވަޅުގައި، މެޓާގެ މި ފީޗާއަށް އޮތް ފާޑުކިޔުންތައް އިތުރުވާނެ ކަމަށް ބެލެވެ އެވެ. މިގޮތުން، އެކްސް (ކުރީގެ ޓްވިޓާ) ގެ "ގްރޮކް" މެދުވެރިކޮށް މީހުންގެ ރުހުމާ ނުލައި އޭއައި ފޮޓޯތައް އުފައްދައި ހިއްސާކުރާ މައްސަލަ އިނގިރޭސިވިލާތުގެ "އޮފްކޮމް" އިން މިހާރުވެސް ދަނީ ތަހުގީގު ކުރަމުންނެވެ.

ޕްރައިވެސީ އިންޓަނޭޝަނަލް އިން ވެސް މި ފީޗާއަށް ފާޑުކިޔަމުން ބީބީސީ އަށް ބުނީ، މިއީ އޭއައި ކުންފުނިތަކުން މީހުންގެ ފޮޓޯތަކާއި މައުލޫމާތަކީ އެ މީހުންގެ ނާޖާއިޒު ފައިދާ ނެގުމަށް އޮތް ވަސީލަތެއްގެ ގޮތުގައި ދެކޭކަމުގެ އެންމެ ފަހުގެ ހެއްކެއް ކަމަށެވެ.

މިކަމާ ގުޅިގެން އެކްސްގައި ޚިޔާލު ފާޅުކުރި މީހަކު ބުނެފައިވަނީ، ސާފު ރުހުމަކާ ނުލައި އާންމު ޔޫޒަރުންގެ ފޮޓޯތައް އޭއައިއިން އުފައްދާ ފޮޓޯތަކުގެ ތެރެއަށް ވެއްދުމަކީ ކޮންމެ ވަގުތަކުވެސް ގޮވައިފާނެ "ޕްރައިވެސީ ލޭންޑްމައިން" އެއް ފަދަ ނުރައްކާތެރި ކަމެއް ކަމަށެވެ.

މެޓާއިން ބުނި ގޮތުގައި، އެކައުންޓުގެ ޕްރައިވެސީ ސެޓިންގްސްއާ ވަކިން ހުންނަ ޚާއްސަ ސެޓިންގްއެއް މެދުވެރިކޮށް، ޕަބްލިކް އެކައުންޓެއް އޮތް ނަމަވެސް މިކަމުން ބަރީއަވުމުގެ (އޮޕްޓް އައުޓް) ފުރުސަތު ޔޫޒަރުންނަށް ލިބޭނެ އެވެ.

މިކަން ކުރުމަށްޓަކައި ޔޫޒަރުން އިންސްޓަގްރާމްގެ ސެޓިންގްސް މެނޫއަށް ގޮސް، "ޝެއަރިންގް އެންޑް ރީޔޫސް" އިޚުތިޔާރުކުރުމަށްފަހު، ޕޯސްޓްތަކާއި ރީލްސްތަކަށް ޚާއްސަކޮށްފައިވާ "އެލޯ ޕީޕަލް ޓު ރީޔޫސް ޔޯ ކޮންޓެންޓް އޮން އިންސްޓަގްރާމް އެންޑް ވިތް އޭއައި ފީޗާސް އެޓް މެޓާ" މި ބައި ނިއްވާލަން ޖެހެ އެވެ.

މި ސެޓިންގްސްތައް ފެންނާނީ ހަމައެކަނި ޕަބްލިކް އެކައުންޓްތަކަށެވެ. އެކައުންޓަކީ ޕްރައިވެޓް އެކައުންޓެއް ނަމަ، އެ އެކައުންޓެއްގެ ފޮޓޯތައް މިގޮތަށް ހިއްސާނުކުރެވޭ ގޮތަށް ކުރިންވެސް އޮންނަނީ ހަމަޖެހިފަ އެވެ.

އިތުރު ފޮޓޯ އުފައްދާ ވަސީލަތެއް

މިހާރުވެސް ބާޒާރުގައި ލިޔުން ބޭނުންކޮށްގެން އޭއައި މެދުވެރިކޮށް ފޮޓޯ އުފައްދާ ގިނަ ވަސީލަތްތަކެއް ހުރުމާއެކު، މެޓާ މި ދާއިރާއަށް މި ވަނީ މިފަދަ ވާދަވެރިކަން ބޮޑު މާހައުލެއްގެ ތެރެއަށެވެ.

ނަމަވެސް، މިކަމަށް އިންސްޓަގްރާމް ބޭނުންކުރުމަކީ މުޅިން އައު އަދި ނުފޫޒުގަދަ ބަދަލެކެވެ.

މި އައު ޚިދުމަތާ ގުޅޭގޮތުން ލިޔެފައިވާ ބްލޮގް ޕޯސްޓެއްގައި މެޓާއިން ބުނެފައިވަނީ، މި ވަސީލަތަކީ އުނދަގޫ އިރުޝާދުތައް ދެނެގަތުމަށް "އެޑްވާންސްޑް ރީޒަނިންގް" ބޭނުންކުރާ ވަސީލަތެއް ކަމަށާއި، މީގެ ސަބަބުން ގިނަ ފޮޓޯތަކެއް އެކުލަވާލައިގެން މަތީ ފެންވަރުގެ އުފެއްދުންތައް ތައްޔާރުކޮށް، ކޮންމެ ތަނެއްގައިވެސް ޑައުންލޯޑްކޮށް ޝެއަރ ކުރެވޭނެ ކަމަށެވެ.

މީގެ އިތުރުން، އައު ޚިޔާލުތައް ހޯދުމަށްޓަކައި ކުރިން ތައްޔާރުކޮށްފައިވާ "ޕްރީސެޓްސް" ތަކާއި އިރުޝާދުތައް ޔޫޒަރުންނަށް އިޚުތިޔާރު ކުރެވޭނެ ކަމަށާއި، ފޮޓޯތަކުގެ މައްޗަށް ސީދާ ކުރެހުންތައް ކުރަހައިގެން ބަދަލު ގެނެވޭނެ ކަމަށްވެސް އެ ކުންފުނިން ބުންޏެވެ.

އާންމު ބޭނުންތަކަށް މި ވަސީލަތް ހިލޭ ލިބުނު ނަމަވެސް، ގިނައިން ބޭނުންކުރާ ފަރާތްތަކަށް ސަބްސްކްރިޕްޝަން ޕްލޭނެއްގެ ދަށުން އިތުރު ފުރުސަތުތައް ލިބޭނެ ކަމަށް މެޓާއިން ބުނެ އެވެ.

މެޓާއިން އިތުރަށް ހާމަކުރި ގޮތުގައި، މިއުސް އިމޭޖްގެ ޚިދުމަތް ވަރަށް އަވަހަށް ފޭސްބުކް އަދި މެސެންޖާގެ އިތުރުން، އިޝްތިހާރު ކުރާ ފަރާތްތަކަށް ބޭނުންކުރެވޭ އެހެން ވަސީލަތެއް މެދުވެރިކޮށްވެސް ލިބޭނެ އެވެ.

މީގެ އިތުރުން، ވީޑިއޯ އުފެއްދޭނެ ފަދަ މިއުސްގެ ވަސީލަތެއް ތައްޔާރުކުރުމުގެ މަސައްކަތް ކުރަމުންދާ ކަމަށްވެސް ރިޕޯޓްތައް ބުނެ އެވެ.