ވަޓްސްއެޕް އިން ފޯނު ނަންބަރުގެ ބަދަލުގައި ޔޫޒަރނޭމް ބޭނުންކުރެވޭ ގޮތް ހަދަން ނިންމައިފި

ވަޓްސްއެޕް ބޭނުންކުރާ ތިން ބިލިއަނަށްވުރެ ގިނަ މީހުންނަށް، ފޯނު ނަންބަރުގެ ބަދަލުގައި ޔޫޒަރނޭމް ބޭނުންކުރެވޭ ގޮތް ހެދުމަށް އެ ކުންފުނިން ނިންމައިފި އެވެ. މިއީ އެ އެޕްލިކޭޝަން ބޭނުންކުރާ މީހުންގެ އަމިއްލަ މިނިވަންކަމާއި ރައްކާތެރިކަން ނުވަތަ ޕްރައިވެސީ ކަށަވަރުކުރުމަށް އެޅޭ މުހިންމު ފިޔަވަޅެކެވެ.

މެޓާ ކުންފުނީގެ ދަށުން ހިންގާ ވަޓްސްއެޕުން ހޯމަ ދުވަހު ބުނި ގޮތުގައި، މިއަހަރުގެ ފަހުކޮޅު މި ޚިދުމަތް ރަސްމީކޮށް ތައާރަފުކުރުމުގެ ކުރިން، ޔޫޒަރނޭމްތައް ރިޒާވްކުރުމުގެ ފުރުސަތު މިހާރު ވަނީ ހުޅުވާލާފަ އެވެ. މި ބަދަލާއެކު، މީހުންނަށް އެކަކު އަނެކަކު ހޯދުމަށާއި ގުޅުމަށް ފޯނު ނަންބަރުގެ ބަދަލުގައި ޔޫޒަރނޭމް ބޭނުންކުރެވޭނެ އެވެ.

ވަޓްސްއެޕުން ހާމަކުރި ގޮތުގައި، މިއީ ޕްރައިވެސީއަށް އިސްކަންދީގެން ފަރުމާކޮށްފައިވާ ފީޗާއެކެވެ. މިގޮތުން ޔޫޒަރނޭމްތައް ފެންނާނެ އާންމު ޑައިރެކްޓަރީއެއް ނޯންނާނެ ކަމަށާއި، އަދި ޔޫޒަރނޭމް ޖަހާއިރު އަމިއްލައަށް ފުރިހަމަވާ "އޮޓޯކޮމްޕްލީޓް" ސަޖެސްޝަންތައްވެސް ނުފެންނާނެ ކަމަށް އެ ކުންފުނިން ބުނެ އެވެ. އެހެންކަމުން، މީހަކަށް ފުރަތަމަ ފަހަރަށް މެސެޖެއް ކުރަން ބޭނުންނަމަ، އެމީހެއްގެ ސީދާ ޔޫޒަރނޭމް އެނގެން ޖެހޭނެ އެވެ.

ސްމާޓްފޯނާއި، ޓެބްލެޓް އަދި ކޮމްޕިއުޓަރުތަކުގައި ބޭނުންކުރާ ވަޓްސްއެޕަކީ "އެންޑް-ޓު-އެންޑް އެންކްރިޕްޓް" ކޮށްފައިވާ، ރައްކާތެރިކަމާއެކު މުއާމަލާތް ކުރެވޭ ވަސީލަތެކެވެ. ނަމަވެސް، މިހާތަނަށް ވަޓްސްއެޕްގައި މީހަކަށް މެސެޖު ކުރެވެނީ އެމީހެއްގެ ފޯނު ނަންބަރު އެނގިގެންނެވެ.

ވަޓްސްއެޕުން އާންމުކުރި ބްލޮގް ޕޯސްޓެއްގައި ބުނެފައިވަނީ، ކުރިއަށް އޮތް މަސްތަކުގެ ތެރޭގައި ފޯނު ނަންބަރު ހާމަނުކޮށް، ހަމައެކަނި ޔޫޒަރނޭމް މެދުވެރިކޮށް މީހުންނަށް ގުޅޭނެ ގޮތް ހަމަޖެހިގެންދާނެ ކަމަށެވެ. ނަމަވެސް މިކަން ފެށޭނެ ސީދާ ތާރީޚެއް އެ ކުންފުނިން ހާމައެއް ނުކުރެ އެވެ.

ވަޓްސްއެޕްގެ ވައިސް ޕްރެޒިޑެންޓް އޮފް ޕްރޮޑަކްޓް، އެލިސް ނިއުޓަން-ރެކްސް ނޫސްވެރިންނަށް މައުލޫމާތު ދެއްވަމުން ވިދާޅުވީ، މިއީ ޕްރައިވެސީއަށްޓަކައި ގެނެވޭ ވަރަށް މުހިންމު ބަދަލެއް ކަމަށެވެ.

އޭނާ އިތުރަށް ވިދާޅުވީ، މީހަކަށް ފުރަތަމަ ފަހަރަށް މެސެޖެއް ފޮނުވަން ބޭނުންވާނަމަ، އެމީހެއްގެ ސީދާ ޔޫޒަރނޭމް އެނގެން ޖެހޭނެ ކަމަށެވެ.

މިހާރު ވަޓްސްއެޕްގައި ހުންނަ ޕްރައިވެސީ ސެޓިންގްސްތަކުން ކުރެވޭ ކަމަކީ ވަކިވަކި މީހުން ބްލޮކްކުރުމާއި، ނުދަންނަ ނަންބަރުތަކުން އަންނަ ކޯލްތައް ސައިލެންޓް ކޮށްލުމެވެ.

މީގެ އިތުރުން، މިހާރުވެސް ޕްރޮފައިލް ނަމެއް އިތުރުކުރުމުގެ ފުރުސަތު އޮވެ އެވެ. ނަމަވެސް އެ ނަން ފެންނަނީ ފޯނުގައި ނަންބަރު ސޭވްކޮށްފައި ނުވާ މީހުންނަށް، ގްރޫޕް ޗެޓްތަކުގައި އެކަންޏެވެ.

ޔޫޒަރނޭމް ހޯދުމުގެ ވާދަވެރިކަން

އެމެރިކާގެ ރައްޔިތުން އަދިވެސް ވަޓްސްއެޕަށްވުރެ ބޮޑަށް އާންމު ޓެކްސްޓް މެސެޖު ބޭނުންކުރި ނަމަވެސް، ޔޫރަޕާއި އޭޝިއާގެ އިތުރުން ދުނިޔޭގެ ބޮޑު ބައެއްގައި ވަޓްސްއެޕަކީ ވަރަށް މަގުބޫލު އެޕްލިކޭޝަނެކެވެ. ކުރު އަދި ހިތްގައިމު ޔޫޒަރނޭމްތަކަކީ ގިނަ ބަޔަކު ބޭނުންވާނެ އެއްޗަކަށް ވާތީ، ރީތި ނަންތައް ހޯދުމަށް ބޮޑު ވާދަވެރިކަމެއް އުފެދޭނެ ކަމަށް ބެލެވެ އެވެ.

"އަޅުގަނޑު ގަބޫލުކުރާ ގޮތުގައި ވަރަށް ގިނަ ބަޔަކު ޔޫޒަރނޭމް ހޯދަން މަސައްކަތް ކުރާނެ. އެހެންވެ އަޅުގަނޑުމެން މި ނިންމީ މާ ކުރިން ޔޫޒަރނޭމް ރިޒާވްކުރުމުގެ ފުރުސަތު ހުޅުވާލަން،" ނިއުޓަން-ރެކްސް ވިދާޅުވި އެވެ.

މެޓާގެ އެހެން މަންސަތައް ކަމަށްވާ އިންސްޓަގްރާމް އަދި ފޭސްބުކްގައި މިހާރުވެސް އެކައުންޓް އޮންނަ ކުންފުނިތަކާއި، ޖަމިއްޔާތަކާއި އަދި ކޮންޓެންޓް އުފައްދާ ފަރާތްތަކަށް، އެ ފަރާތްތަކުން މިހާރު ބޭނުންކުރާ ޔޫޒަރނޭމް ވަޓްސްއެޕުން ހޯދުމުގެ ފުރުސަތު ލިބޭނެ އެވެ.

ވަޓްސްއެޕްގެ ޔޫޒަރނޭމްތަކުގައި ހުންނަން ޖެހޭނީ 3 އަކުރާއި 35 އަކުރާ ދެމެދުގެ މިންވަރެކެވެ. އެހެން މީހެއްގެ ނަމުގައި ހެދިގެން އުޅުން ނުވަތަ އިމްޕާސަނޭޝަން ހުއްޓުވުމަށްޓަކައި، މަޝްހޫރު މީހުންނާއި، ދައުލަތުގެ އިސް ފަރާތްތަކާއި އަދި ސަރުކާރުގެ އިދާރާތަކަށް ޚާއްސަ ޔޫޒަރނޭމްތައް ވަޓްސްއެޕުން ހިފަހައްޓާނެ އެވެ.