ޓްރަމްޕް އިރާގު ބޮޑުވަޒީރަށް ވައިޓްހައުސްއިން މަރުހަބާ ވިދާޅުވެއްޖެ
އިރާގުގެ ބޮޑުވަޒީރު އަލީ އަލް-ޒައިދީއާއެކު ބޭއްވި ބައްދަލުވުމުގައި، އެމެރިކާގެ ރައީސް ޑޮނަލްޑް ޓްރަމްޕް ވަނީ ދެ ގައުމުގެ އިގްތިސާދީ ގުޅުން ބަދަހިކޮށް ތެލުގެ ދާއިރާއިން އިންވެސްޓްމަންޓްތައް އިތުރުކުރުމަށް މަޝްވަރާކުރައްވާފައި. މި ބައްދަލުވުމުގައި ބޮޑުވަޒީރު ޒައިދީ ވަނީ އިރާގުގެ ހަތިޔާރު އެޅި ހުރިހާ ޖަމާއަތްތަކެއް ސަރުކާރުގެ ކޮންޓްރޯލްގެ ދަށަށް ގެނެސް، އީރާނަށް ބަރޯސާވުން ކުޑަކުރައްވާނެ ކަމުގެ ޔަގީންކަން ދެއްވާފައި.
އެމެރިކާގެ ރައީސް ޑޮނަލްޑް ޓްރަމްޕް، އިރާގުގެ ބޮޑުވަޒީރު އަލީ އަލް ޒައިދީއާއެކު 2026 ވަނަ އަހަރުގެ ޖުލައި މަހުގެ 14 ވަނަ ދުވަހު ވައިޓް ހައުސްގެ އޯވަލް އޮފީހުގައި ބޭއްވި ދެ ގައުމުގެ ދެމެދުގައިވާ ރަސްމީ ބައްދަލުވުމުގެ ތެރެއިން. | ރޮއިޓާސް
އިރާގުގެ ބޮޑުވަޒީރު އަލީ އަލް-ޒައިދީއަށް، އެމެރިކާގެ ރައީސް ޑޮނަލްޑް ޓްރަމްޕް އަންގާރަ ދުވަހު ވައިޓް ހައުސްއިން މަރުހަބާ ވިދާޅުވެއްޖެއެވެ.
މި ބައްދަލުވުމަކީ އިރާގުގައި އެމެރިކާގެ އިންވެސްޓްމަންޓްތައް އިތުރުކުރުމަށާއި، އީރާނަށް ބަރޯސާވުން ކުޑަކުރުމަށް ބަޣުދާދަށް ވޮޝިންގްޓަނުން ބާރުއަޅަމުންދާ ދަނޑިވަޅެއްގައި، ދެ ގައުމުގެ ގުޅުން ބަދަހިކުރުމަށް ބޭއްވި ބައްދަލުވުމެކެވެ.
އިރާގުގެ ބޮޑުވަޒީރާއެކު އޯވަލް އޮފީހަށް ވަދެވަޑައިގަތުމުގެ ކުރިން ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އެމެރިކާއިން އިރާގުދެކެ ލޯބިވާ ކަމަށެވެ. އަދި ބޮޑުވަޒީރު އަލް-ޒައިދީއަކީ ބޮޑު އިންތިޚާބެއް ކާމިޔާބުކުރައްވާފައިވާ ބޭފުޅެއްކަން ފާހަގަކުރެއްވި އެވެ.
ބައްދަލުވުމަށްފަހު، ދެ ގައުމުގެ ލީޑަރުން ވަނީ އޯވަލް އޮފީހުގައި ތިއްބަވައި ނޫސްވެރިންނާ ވާހަކަދައްކަވާފަ އެވެ. ޓްރަމްޕް ވިދާޅުވީ، ކުރިން ތާވަލުކުރެވިފައި ނެތް ނަމަވެސް، މެންދުރުގެ ފަރިއްކޮޅުގެ ތެރެއިންވެސް މަޝްވަރާތައް ކުރިއަށް ގެންދަވާނެ ކަމަށެވެ.
އިރާގުގެ ބޮޑުވަޒީރަށް ވަރަށް ބޮޑަށް ތައުރީފު ކުރައްވަމުން ޓްރަމްޕް ވިދާޅުވީ، އަލް-ޒައިދީއަކީ ހަމައެކަނި އިރާގުގެ އިތުރުން، މުޅި މެދުއިރުމަތީގެ ވަރުގަދަ ލީޑަރަކަށް ވެވަޑައިގަންނަވާނެ ބޭފުޅެއް ކަމަށެވެ. އަދި އޭނާގެ ނުފޫޒު މުޅި މެދުއިރުމައްޗަށް ފެތުރިގެންދާނެ ކަމަށްވެސް ޓްރަމްޕް ވިދާޅުވި އެވެ.
ބޮޑުވަޒީރު އަލް-ޒައިދީގެ ވާހަކަފުޅުގައި، ވޮޝިންގްޓަނާއި ބަޣުދާދާ ދެމެދު އޮތް ގުޅުން އިތުރަށް ބަދަހިކުރުމަށް ވަރަށް ބޮޑަށް ބޭނުންފުޅުވާ ކަމަށް ވިދާޅުވި އެވެ.
އީރާނާ ގުޅޭގޮތުން ވާހަކަދައްކަވަމުން، ގައުމުގެ ހުރިހާ ހަތިޔާރެއް ސަރުކާރުގެ ފުރިހަމަ ކޮންޓްރޯލްގެ ދަށަށް ގެނައުމަށް ނިންމާފައިވާ ނިންމުމަކީ ބަދަލުކުރެވޭނެ ނިންމުމެއް ނޫން ކަމަށް ބޮޑުވަޒީރު ވިދާޅުވި އެވެ.
މިއީ އެއްވެސް ހާލެއްގައި ދޫދެއްވާނެ ނިންމުމެއް ނޫން ކަމަށް އަލް-ޒައިދީ ވިދާޅުވި އެވެ. އަދި އެމެރިކާ ސިފައިން އިރާގުން ފޭބުމަށް ތާވަލުކޮށްފައިވާ ސެޕްޓެމްބަރު 30 ގެ ފަހުން، އެ ގައުމުގައި އެއްވެސް ހަތިޔާރު އެޅި ޖަމާއަތެއް އޮތުމުގެ ބޭނުމެއް ނެތް ކަމަށްވެސް އޭނާ އިތުރުކުރެއްވި އެވެ.
ޓްރަމްޕް ވިދާޅުވީ އީރާން މިހާރު ވަނީ ބަލިކަށިވެފައި ކަމަށާއި، އެ ސަރަހައްދުގެ އެއްވެސް ގައުމަކަށް ބިރުދައްކައި ނުފޫޒު ފޯރުވުމުގެ ގާބިލުކަން ދެން އެ ގައުމުގައި ނޯންނާނެ ކަމަށެވެ.
ތެލާ ގުޅޭގޮތުން، އޯޕެކް (OPEC) އިން ބަޣުދާދަށް ކަނޑައަޅާފައިވާ ތެޔޮ އުފެއްދުމުގެ ކޯޓާއާ ބެހޭގޮތުން ސުވާލުކުރުމުން، އަލް-ޒައިދީ ވިދާޅުވީ އިރާގުން ބޭނުންވަނީ "އިންސާފުވެރި މިންވަރެއް" ކަމަށެވެ.
ޓްރަމްޕް ވިދާޅުވީ އިރާގުގައި ހުރި ތެލުގެ ސަބަބުން އެ ގައުމަކީ ވަރަށް ބޮޑު ކުރިއެރުމެއް ހޯދިދާނެ ގައުމެއް ކަމަށެވެ. އަދި ދެ ގައުމުގެ ދެމެދުގައި ގިނަ އެއްބަސްވުންތަކެއް ގާއިމުކުރެވި، އޭގެ ސަބަބުން ދެ ގައުމުގައިވެސް ގިނަ ވަޒީފާތަކެއް އުފެދިގެންދާނެ ކަމަށާއި، އިރާގުން ގިނަ އަދަދަކަށް ތެޔޮ ނެގުމުގެ މަސައްކަތް ކުރިއަށްދާނެ ކަމަށް ޓްރަމްޕް ވިދާޅުވި އެވެ.
މީގެ އިތުރުން، އެމެރިކާގެ އެނާޖީ ސެކްރެޓަރީ ވަރަށް އަވަހަށް ބައެއް އެއްބަސްވުންތައް އިއުލާނު ކުރައްވާނެ ކަމަށްވެސް ރައީސް ޓްރަމްޕް ވިދާޅުވި އެވެ.
"ގިނަ އަދަދަކަށް ތެޔޮ އުފައްދަމުން އެބަދޭ، އަދި އެ މަސައްކަތް ކުރަމުންދަނީ އެމެރިކާގެ ކުންފުނިތަކުން، މިހާރު ގިނައީ އެމެރިކާގެ ކުންފުނިތައް. އެމީހުން (އިރާގުން) އެހެން ބަޔަކާއެކު ވިޔަފާރިކުރާކަށް ބޭނުމެއް ނުވޭ؛ އެމީހުން ބޭނުންވަނީ އެމެރިކާއާއެކު ވިޔަފާރިކުރަން، އެއީ ވަރަށް ރަނގަޅު ކަމެއް،" ޓްރަމްޕް ވިދާޅުވި އެވެ.
މަސްދަރު: އަލް އަރަބިއްޔާ
