އާޖެންޓީނާ އޮތީ ރަނގަޅު ފޯމެއްގައި، ފައިނަލްގެ އުންމީދު އެބަ އޮތް: ސްކަލޯނީ

ފީފާ ވޯލްޑް ކަޕްގެ ސެމީ ފައިނަލްގައި އިންގްލެންޑްއާ ދެކޮޅަށް ނިކުންނައިރު، ޓީމު އޮތީ ރަނގަޅު ފޯމެއްގައި ކަމަށާއި، ފައިނަލް އަށް ދެވޭނެ ކަމުގެ އުންމީދު އޮތް ކަމަށް އެންމެ ފަހުގެ ޗެމްޕިއަން އާޖެންޓީނާގެ ކޯޗު ލިއޮނަލް ސްކަލޯނީ ބުނެފި އެވެ.

ސްކަލޯނީ މިހެން ބުނެފައި ވަނީ، ބުދަ ދުވަހުގެ ރޭ ދަންވަރު އިންގްލެންޑްއާ ދެކޮޅަށް ކުޅޭ ސެމީ ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. ސްކަލޯނީ ބުނީ ޖެހި ޖެހިގެން ދެ ވަނަ ފަހަރަށް މުބާރާތުގެ ފައިނަލް އަށް ދިޔުމުގެ އުންމީދު އޮތް ކަމަށާއި، ސެމީ ފައިނަލްއާ ހަމައަށް ޓީމު ގެނެސްދިނުމުން ކުޅުންތެރިންނަށް ޝުކުރު އަދާ ކުރާ ކަމަށެވެ. 

މުބާރާތުގެ ސެމީ ފައިނަލްއާ ހަމައަށް އާޖެންޓީނާ އައިސްފައި ވަނީ، ނޮކްއައުޓް ބުރުގެ މެޗު ތަކުން އުނދަގޫ މޮޅެއް ހޯދައިގެންނެވެ. ގަދަ 32 ގައި ކޭޕް ވާޑް އަތުން 3-2 އިން މޮޅުވީއިރު، ގަދަ 16 ގައި މިޞްރު އަތުން ވެސް މޮޅުވެފައި ވަނީ 3-2 އިންނެވެ. އަދި ކުއާޓާ ފައިނަލްގައި ސްވިޒަލެންޑް އަތުން މޮޅުވެފައި ވަނީ 3-2 އިންނެވެ. 

މި ނަތީޖާތަކާ ގުޅޭ ގޮތުން ވާހަކަ ދައްކަމުން ސްކަލޯނީ ބުނީ، ސެމީ ފައިނަލް އަށް އާޖެންޓީނާ އަށް ދެވޭނެ ވާހަކަ މީގެ ދޮޅު މަސް ކުރިން ބުނި ނަމަވެސް، އެކަން އުފަލާ އެކު ޤަބޫލު ކުރާނެ ކަމަށެވެ. އެހެންކަމުން ސެމީ ފައިނަލްއާ ހަމައަށް އާޖެންޓީނާ އަށް އާދެވެނު ގޮތާ މެދު މައްސަލައެއް ނެތް ކަމަަށާއި، ކުޅުންތެރިން ވަރުބަލި ވިޔަސް މިވަގުތު އެކަމާ ކަންބޮޑުވުމެއް ނެތް ކަމަށް ސްކަލޯނީ ބުންޏެވެ.  

އާޖެންޓީނާާ އާއި އިންގްލެންޑްއާ ދެމެދު ސިޔާސީ ގޮތުން ބޮޑު ނުތަނަވަސް ކަމެއް އޮތް ނަމަވެސް، ސްކަލޯނީ ބުނީ އާޖެންޓީނާ ނިކުންނަނީ ފުޓުބޯޅަ މެޗަކަށް ކަމަށެވެ. އަދި މާޒީގައި ހިނގާފައިވާ ހިތާމަވެރި ސިޔާސީ ކަންކަމާއި މެޗާ ގުޅުވަން ބޭނުން ނުވާ ކަމަށް ސްކަލޯނީ ބުންޏެވެ. އާޖެންޓީނާގެ ހަމައެކަނި އަމާޒަކީ ދަނޑު މަތީގައި ރަނގަޅު ކުޅުމެއް ދެއްކުން ކަމަށް ވެސް ސްކަލޯނީ ބުނެފައިވެ އެވެ.

ތޯމަސް ޓުޗެލްގެ އިރުޝާދުގެ ދަށުން ކުޅެމުން އަންނަ އިންގްލެންޑްއާ ގުޅޭ ގޮތުން ވާހަކަ ދައްކަމުން ސްކަލޯނީ ބުނީ، ހެރީ ކޭން އާއި ޖޫޑް ބެލިންހަމް ހުއްޓުވުމަކީ އުނދަގޫ މަސައްކަތަކަށް ވާނެ ކަމަށެވެ. މުބާރާތުގައި އިންގްލެންޑުން ޖެހި 13 ލަނޑު ތެރެއިން، 12 ލަނޑަކީ މި ދެ ކުޅުންތެރިން ހިއްސާ ވެގެން ޖެހި ލަނޑު ތަކެވެ. އެހެންކަމުން މި ދެ ކުޅުންތެރިން ހުއްޓުވުމަށް އާޖެންޓީނާގެ ފޯމޭޝަން އަށް ބަދަލު ގެނައުމަކީ އެކަށީގެންވާ ކަމެއް ކަމަށް ސްކަލޯނީ ވަނީ ބުނެފައި އެވެ. 

2022 ވަނަ އަހަރު ޤަތަރުގައި އޮތް ވޯލްޑް ކަޕް އާޖެންޓީނާ އިން ކާމިޔާބު ކުރިއިރު، ސްކަލޯނީ އާއި އާޖެންޓީނާގެ އަމާޒަކީ މިފަހަރުގެ މުބާރާތް ކާމިޔާބުކޮށް، ތަށި ދިފާއު ކުރުމެވެ. އާޖެންޓީނާ އާއި އިންގްލެންޑު ބައްދަލު ކުރާ މެޗު ފަށާނީ ބުދަ ދުވަހުގެ ރޭ ދަންވަރު ރާއްޖެ ގަޑިން 12 ޖަހާއިރު އެވެ.