ވޯލްޑް ކަޕް ސެމީ ފައިނަލް: އިންގްލެންޑް އާއި އާޖެންޓީނާ ބައްދަލު ކުރާ މެޗުގައި ސަލާމުކަން ދޭން ޖެހޭ ކުޅުންތެރިން!

ދުނިޔޭގެ ފުޓުބޯޅައިގެ އެންމެ ބޮޑު ވާދަވެރި ކަމެއް އޮންނަ ދެ ޤައުމުގެ ކުރިމަތިލުން ބުދަ ދުވަހުގެ ރޭ އޮންނައިރު، މި މެޗުގައި ތާރީޚުގެ އައު ބާބެއް ލިޔެވިގެން ދާނެ އެވެ. އެމެރިކާގެ އެޓްލާންޓާގައި ކުޅޭ ސެމީ ފައިނަލް މެޗުގައި އިންގްލެންޑް އާއި އާޖެންޓީނާ ބައްދަލު ކުރާއިރު، މިއީ 21 އަހަރު ފަހުން މި ދެ ޤައުމު ބައްދަލު ކުރާ ފުރަތަމަ ފަހަރެވެ. 

މި މެޗުގައި ދުނިޔޭގެ މަޝްހޫރު ގިނަ ކުޅުންތެރިންނާއި، ހުނަރުވެރި ޒުވާން ކުޅުންތެރިން ތަކެއް ވެސް ފެނިގެން ދާނެ އެވެ. އޭގެ ތެރޭގައި އާޖެންޓީނާގެ ކެޕްޓަން ލިއޮނަލް މެސީ އާއި، އިންގްލެންޑުގެ ކެޕްޓަން ހެރީ ކޭން އަދި ޒުވާން ކުޅުންތެރިޔާ ޖޫޑް ބެލިންހަމް ފާހަގަ ކުރެވެ އެވެ. 

ޖޫޑް ބެލިންހަމް

ސްޕެއިންގެ ރެއާލް މެޑްރިޑަށް ކުޅެމުން އަންނަ ބެލިންހަމް އަކީ، މިފަހަރުގެ މުބާރާތުގައި އިންގްލެންޑުގެ އެންމެ މުހިންމު އެއް ކުޅުންތެރިޔާ އެވެ. މުބާރާތުގެ އިންގްލެންޑަށް ސެމީ ފައިނަލް ގެނައީ ބެލިންހަމް ޖެހި ލަނޑާ އެކު އެވެ. ކުއާޓާ ފައިނަލްގައި ނޯވޭއާ ދެކޮޅަށް އޭނާ ލަނޑު ޖެހިއިރު، ގަދަ 16 ގައި މެކްސިކޯއާ ދެކޮޅަށް ވެސް ލަނޑު ޖެހި އެވެ. 

މުބާރާތުގައި ބެލިންހަމް ވަނީ މިހާތަނަށް ހަ ލަނޑު ޖަހައިފަ އެވެ. އަދި އެއް ލަނޑު ޖެހުމަށް އޭނާ ވަނީ އެހީތެރިވެދީފައި އެވެ. މުބާރާތުގެ ހަތަރު މެޗެއްގެ މޮޅު ކުޅުންތެރިޔާގެ މަގާމު އޭނާ ވަނީ ހޯދައިފަ އެވެ. ބެލިންހަމް އަކީ 1986 ވަނަ އަހަރު ޑިއޭގޯ މަރަޑޯނާ އަށް ފަހު، ވޯލްޑް ކަޕްގެ ދެ ނޮކްއައުޓް މެޗުގައި ދެ ލަނޑު ޖެހި ފުރަތަމަ ކުޅުންތެރިޔާ އެވެ.

މުބާރާތުގައި ނޯވޭއާ ދެކޮޅަށް ލަނޑު ޖެހުމަށް ފަހު ބެލިންހަމް އުފާ ފާޅު ކުރަނީ. | ގެޓީ އިމޭޖަސް

ހެރީ ކޭން

އިންގްލެންޑުގެ ކެޕްޓަން ބޭންޑު އަޅައިގެން ކުޅެމުން އަންނަ ކޭން އަކީ، 2018 ވަނަ އަހަރު ރަޝިޔާާގައި އޮތް ވޯލްޑް ކަޕްގެ ރަން ބޫޓު ހޯދި ކުޅުންތެރިޔާ އެވެ. ކޭން ވެސް ވަނީ މިފަހަރުގެ ވޯލްޑް ކަޕްގައި ހަ ލަނޑު ޖަހައި، އެއް ލަނޑު ޖަހަން ފުރުސަތު ތަނަވަސްކޮށްދީފައި އެވެ. މުބާރާތުގައި ކްރޮއޭޝިއާއާ ދެކޮޅަށް ކުޅުނު މެޗުގައި ކޭން ދެ ލަނޑު ޖެހިއިރު، ކޮންގޯއާ ދެކޮޅަށް ކުޅުނު މެޗުގައި ވެސް އޭނާ ލަނޑު ޖެހި އެވެ. 

އިންގްލެންޑުގެ ޤައުމީ ޓީމަށް އެންމެ ގިނަ ލަނޑު ޖަހައިދީފައިވާ ކޭން އަކީ، ސެމީ ފައިނަލްގައި އާޖެންޓީނާ އަށް ކުރިމަތި ވާނެ ބިރެއް ކަމަށް ގިނަ ބަޔަކު އަންނަނީ ދެކެމުންނެވެ. 

އިންގްލެންޑުގެ ކެޕްޓަން ހެރީ ކޭން. | ގެޓީ އިމޭޖަސް

އެންތަނީ ގޯޑަން

ނިއުކާސަލް އަށް ކުޅުމަށް ފަހު، ސްޕެއިންގެ ގަދަ ބާރު ބާސެލޯނާ އަށް ބަދަލުވި ގޯޑަން އަކީ އިންގްލެންޑުގެ ޓީމުގައި ފާހަގަ ކޮށްލެވޭ ކުޅުންތެރިޔެކެވެ. މުބާރާތުގައި އޭނާ ވަނީ މިހާތަނަށް ތިން ލަނޑު ޖަހަން ފުރުސަތު ތަނަވަސްކޮށްދީފައި އެވެ. މުބާރާތުގެ ކުއާޓާ ފައިނަލްގައި ނޯވޭއާ ދެކޮޅަށް ކުޅުނު މެޗުގައި ބެލިންހަމް ޖެހި ފުރަތަމަ ލަނޑަކީ، ގޯޑަން ދިން ފުރުސަތެއްގައި ޖެހި ލަނޑެކެވެ. 

އިންގްލެންޑުގެ އެންތަނީ ގޯޑަން. | ގެޓީ އިމޭޖަސް

ލިއޮނަލް މެސީ

އާޖެންޓީނާގެ ލެޖެންޑް މެސީ އަކީ މި މުބާރާތުގައި ތަފާތު ދައްކަމުން އަންނަ އެއް ކުޅުންތެރިޔާ އެވެ. މިހާތަނަށް އަށް ލަނޑު ޖަހައިގެން އޭނާ އޮތީ މުބާރާތުގެ ރަން ބޫޓުގެ ރޭހުގެ ކުރީގައި އެވެ. މެސީ ވަނީ މިހާތަނަށް ދެ ލަނޑު ޖަހަން ފުރުސަތު ތަނަވަސްކޮށްދީފައި އެވެ. މުބާރާތުގައި އަލްޖީރިއާއާ ދެކޮޅަށް ކުޅުނު މެޗުގައި މެސީ ހެޓްރިކް ހެދިއިރު، އޮސްޓްރިއާ، ޖޯޑަން، ކޭޕް ވާޑް އަދި މިޞްރާ ދެކޮޅަށް ވެސް އޭނާ ލަނޑު ޖެހި އެވެ. 

މިއީ މެސީގެ ކެރިއަރުގައި އޭނާ އިންގްލެންޑްއާ ދެކޮޅަށް ނިކުންނާނެ ފުރަތަމަ ފަހަރެވެ. އަނެއް ކޮޅުން، އާޖެންޓީނާ އިން ތަށި ދިފާއު ކުރުމަށް ކުރަމުން އަންނަ މަސައްކަތުގެ އެންމެ ބޮޑު އުންމީދަކީ ވެސް މެސީ އެވެ. މެސީ އަކީ ވޯލްޑް ކަޕްގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިޔާ އެވެ. 

އާޖެންޓީނާގެ ކެޕްޓަން ލިއޮނަލް މެސީ. | ގެޓީ އިމޭޖަސް

ލައުޓާރޯ މާޓިނޭޒް

އިޓަލީގެ އިންޓަރ މިލާން އަށް ކުޅެމުން އަންނަ މާޓިނޭޒް އަކީ، އާޖެންޓީނާގައި މުހިންމު ކުޅުންތެރިޔެކެވެ. މުބާރާތުގެ ކުއާޓާ ފައިނަލްގައި ސްވިޒަލެންޑްއާ ދެކޮޅަށް ކުޅުނު މެޗުގައި އޭނާ ލަނޑު ޖެހި އެވެ. މުބާރާތުގައި މިހާތަނަށް ޖުމުލަ ދެ ލަނޑު ޖެހިއިރު، އެއް ލަނޑު ޖަހަން ފުރުސަތު ތަނަވަސްކޮށްދީފައިވެ އެވެ. މިހާތަނަށް އާޖެންޓީނާ އިން ކުޅުނު ބޮޑެތި މެޗު ތަކުގައި އޭނާ ރަނގަޅު ކުޅުން ދައްކާފައިވެ އެވެ. 

އާޖެންޓީނާގެ ލައުޓާރޯ މާޓިނޭޒް. | ގެޓީ އިމޭޖަސް

އެލެކްސިސް މެކް އެލިސްޓާ

ލިވަޕޫލް އަށް ކުޅެމުން އަންނަ މެކް އެލިސްޓާ އަކީ 2022 ވަނަ އަހަރުގެ ވޯލްޑް ކަޕް އާޖެންޓީނާ އިން ކާމިޔާބު ކުރި ޓީމުގައި އިސް ރޯލެއް އަދާ ކުރި ކުޅުންތެރިޔެކެވެ. މިފަހަރުގެ މުބާރާތުގައި ގިނަ ބަޔަކު ބޭނުން ވަނީ އޭނާގެ ފަރާތުން، ޤަތަރުގައި އޮތް މުބާރާތުގައި ދެއްކި ފަދަ ކުޅުމެއް ދެއްކުމަށެވެ. ކުއާޓާ ފައިނަލްގައި ސްވިޒަލެންޑްއާ ދެކޮޅަށް އާޖެންޓީނާ އިން ކުޅުނު މެޗުގެ ފުރަތަމަ ލަނޑު ޖެހީ ވެސް އޭނާ އެވެ. 

އިނގިރޭސި ޕްރިމިއާ ލީގުގައި އޭނާ އަށް ލިބިފައިވާ ތަޖުރިބާ، ބުދަ ދުވަހުގެ ރޭ އިންގްލެންޑްއާ ދެކޮޅަށް ކުޅޭއިރު އާޖެންޓީނާ އަށް ވަރަށް މުހިންމު ވާނެ ކަމަށް ބެލެވެ އެވެ. 

އާޖެންޓީނާގެ އެލެކްސިސް މެކް އެލިސްޓާ. | ގެޓީ އިމޭޖަސް