1998 ވަނަ އަހަރު ބެކަމް އަށް ދެއްކި ފަދަ ރަތް ކާޑެއް މިފަހަރު ވެސް ދައްކައިފާނެ، އެ ހިތްދަތި ހަނދާން އަދިވެސް އެބަ ހުރި: ޝިއަރާ

1998 ވަނަ އަހަރުގެ ފީފާ ވޯލްޑް ކަޕްގައި އާޖެންޓީނާ އަތުން ބަލިވެ ކެޓި ހިތްދަތި ހަނދާން އަދިވެސް އެބަ ހުރި ކަމަށާއި، އިންގްލެންޑަށް ތާރީޚު ބަދަލު ކުރެވޭނެ ކަމަށް އެ ޓީމުގެ ކުރީގެ ކެޕްޓަން އެލަން ޝިއަރާ ބުނެފި އެވެ.

އެފަހަރުގެ މުބާރާތުގެ ގަދަ 16 ގައި އާޖެންޓީނާ އިން ވަނީ ޕެނަލްޓީ ޖަހައިގެން އިންގްލެންޑު ކަޓުވާލައިފަ އެވެ. އޭރު އިންގްލެންޑުގެ ކެޕްޓަން އަކަށް ހުރީ ޝިއަރާ އެވެ. އޭނާ ބުނީ ބުދަ ދުވަހުގެ ރޭ އާޖެންޓީނާ ބަލިކޮށް، ފުޓުބޯޅައިގެ ތާރީޚުން ދާއިމީ ޖާގައެއް ހޯދުމުގެ ފުރުސަތު އިންގްލެންޑަށް އޮތް ކަަމަށް ޤަބޫލު ކުރާ ކަމަށެވެ. 

އެ މެޗުގެ ހަނދާންތައް އައު ކުރަމުން ޝިއަރާ ބުނީ، މެޗަށް ފަހު ދެ ޓީމު ބަހަށް އެރުމަށް މަޑު ކޮށްގެން ތިބިއިރު އާޖެންޓީނާގެ ކުޅުންތެރިން އުފާ ފާޅު ކުރަމުން ދިޔަ މަންޒަރު އަދިވެސް އޭނާގެ ލޯ މަތީން ފެންނަ ކަމަށެވެ. އޭނާ ބުނި ގޮތުގައި އެއީ ވަރަށް ވަރުގަދަ ޓީމެއް އޮތް އަހަރެއް ކަމުން، އެ މުބާރާތުގައި ކާމިޔާބީއާ ހަމައަށް ނުދެވުމަކީ ލިބުނު ވަރަށް ބޮޑު މާޔޫސް ކަމެކެވެ.

މިފަހަރުގެ ސެމީ ފައިނަލްއާ ގުޅޭ ގޮތުން ޝިއަރާ ބުނީ، މިއީ ދުނިޔޭގެ އެންމެ މޮޅު ކުޅުންތެރިޔާގެ ގޮތުގައި ގިނަ ބަޔަކު ގަބޫލުކުރާ ލިއޮނަލް މެސީއާ ދެކޮޅަށް އިންގްލެންޑް ކުޅޭ ފުރަތަމަ ފަހަރު ކަމަށެވެ. އެކަމަށް އިޝާރާތް ކުރަމުން ޝިއަރާ ބުނީ، މެސީ ހުއްޓުވުމަށްޓަކައި އިންގްލެންޑުން އެއް ކުޅުންތެރިޔަކަށް ވުރެ، ގިނަ ކުޅުންތެރިން ބޭނުން ކުރަން ޖެހޭނެ ކަމަށެވެ. 

މެޗުގެ ތެރެއިން ކުރިމަތިވެދާނެ ގޮންޖެހުން ތަކަށް އިޝާރާތްކޮށް ޝިއަރާ ބުނީ، 1998 ވަނަ އަހަރު ޑޭވިޑް ބެކަމް އަށް ދެއްކި ރަތް ކާޑު ފަދަ ހާދިސާއެއް މި މެޗުގައި ވެސް ފެނުމަކީ އެކަށީގެންވާ ކަމެއް ކަމަށެވެ. މިފަހަރުގެ މުބާރާތުގައި ރެފްރީންނާއި، ވީޑިއޯ އެސިސްޓެންޓް ރެފްރީ (ވީއޭއާރު)ގެ ނިންމުންތަކާ މެދު ކަންބޮޑުވުން އެބަ އޮތް ކަމަށާއި، ޚާއްސަކޮށް އާޖެންޓީނާ އާއި މިޞްރު ބައްދަލުކުރި މެޗުގައި ފެނުނު ފަދަ އާދަޔާ ހިލާފު ނިންމުން ތަކެއް މި މެޗުގައި ފެނިގެން ނުދާނެ ކަމަށް އުންމީދު ކުރާ ކަމަށް އޭނާ ބުންޏެވެ. އެހެންކަމުން ކުޅުންތެރިން ކެތްތެރިކަން އިސް ކުރުމަކީ މުހިންމު ކަމެއް ކަމަށް އޭނާ ފާހަގަ ކުރި އެވެ.

އާޖެންޓީނާ އަކީ އެންމެ ފަހުގެ ޗެމްޕިއަނުން ކަމަށް ވިޔަސް، މީގެ ހަތަރު އަހަރު ކުރިއާ އަޅާ ބަލާއިރު އެޓީމު މިހާރު އެހާ ވަރުގަދަ ނޫން ކަމަށް ޝިއަރާ ގަބޫލު ކުރެ އެވެ. ނަމަވެސް، އެ ޓީމަކީ ނަތީޖާ ނެރުމަށް ކުޅަދާނަ، ތަޖުރިބާކާރު ޓީމެއްކަން އޭނާ ފާހަގަ ކުރި އެވެ. އަނެއް ކޮޅުން، އިންގްލެންޑުގެ ހެރީ ކޭން އާއި ޖޫޑް ބެލިންހަމް ފަދަ ކުޅުންތެރިން ތިބީ ވަރަށް ރަނގަޅު ފޯމެއްގައި ކަމަށާއި، މެޗުގެ ނަތީޖާ ނެރުމުގައި މި ދެ ކުޅުންތެރިންގެ ދައުރު ބޮޑު ވާނެ ކަމަށް އޭނާ ވަނީ ބުނެފައި އެވެ. 

މެޗުގެ ނަތީޖާއާ މެދު ޝިއަރާ ބުނީ، އިންގްލެންޑުން އާޖެންޓީނާ ބަލިކުރާނެ ކަމަށް އޭނާ ގަބޫލުކުރާ ކަމަށެވެ. ނަމަވެސް، މިއީ ފަސޭހަ މެޗަކަށް ނުވާނެ ކަމަށާއި، މުޅި މެޗު ނިމެންދެން ސަޕޯޓަރުން ތިބެން ޖެހޭނީ ވަރަށް ބޮޑު ހާސް ކަމެއްގެ ތެރޭގައި ކަމަށް އޭނާ ބުންޏެވެ.

ޝިއަރާގެ ނަސޭހަތަކީ 28 އަހަރު ފަހުން ވެސް އޭނާ ފަދައިން "މިހެން ވިނަމަ" ނުވަތަ "އެހެން ވިނަމަ" އޭ ބުނެ ހިތާމަ ކުރަން ނުޖެހޭނެ ފަދަ ނަތީޖާއެއް އިންގްލެންޑުގެ ކުޅުންތެރިން ނެރުމެވެ.