ވޯލްޑް ކަޕްގެ ފައިނަލް މެޗުގެ ހާފް ޓައިމް 25 މިނެޓަށް ދިގު ދެމިގެން ދާނެ
މި ޝޯގައި ދުނިޔޭގެ މަޝްހޫރު ލަވަ ކިޔުންތެރިން ކަމަށްވާ މެޑޯނާ، ޝަކީރާ އަދި ދެކުނު ކޮރެއާގެ މަޝްހޫރު ބޭންޑް ބީޓީއެސް ފެނިގެންދާނެ. ފީފާގެ އޮފިޝަލުންނާ ހަވާލާދީ ރިޕޯޓުތައް ބުނާ ގޮތުން، ހާފް ޓައިމްގެ ވަގުތު 20 މިނެޓަށް ދިގު ކުރުމަށް މަޝްވަރާ ކުރެވެމުންދާއިރު، އާންމުކޮށް އޮންނަ 15 މިނެޓުގެ ބްރޭކަށް ފަހު އިތުރު 11 މިނެޓުގެ ޝޯއެއް ކުރިއަށް ގެންދިއުމަކީ ވެސް އޮތް ފުރުސަތެއް.
ފީފާ ވޯލްޑް ކަޕްގެ 2026ގައި ބެލްޖިއަމް އާއި ސްޕެއިން ކުޅުނު މެޗުގެ ކުރިން، މެޗު ފެށުމަށް ތައްޔާރުވުމުގެ ތެރެއިން. | ގެޓީ އިމޭޖަސް
މިހާރު ކުރިއަށްދާ ފީފާ ވޯލްޑް ކަޕްގެ ފައިނަލް މެޗުގެ ހާފް ޓައިމް ބްރޭކް 20 މިނެޓާއި، 25 މިނެޓުގެ ވަގުތަކަށް ދެމިގެން ދާނެ ކަމަށް ބެލެވެން ފަށައިފި އެވެ.
އެމެރިކާގެ ނިއު ޔޯކްގެ ނިއު ޖާޒީ ސްޓޭޑިއަމްގައި ކުޅޭ މިފަހަރުގެ ފައިނަލް މެޗުގެ ހާފް ޓައިމްގެ ވަގުތުގައި މަޝްހޫރު "ސުޕަ ވޯލް" ޝޯތަކާ އެއްފަދަ 11 މިނެޓުގެ މިޔުޒިކީ ހަރަކާތް ތަކެއް ކުރިއަށް ގެންދިޔުމަށް ވަނީ ނިންމައިފަ އެވެ.
މި ޝޯގައި ދުނިޔޭގެ މަޝްހޫރު ލަވަ ކިޔުންތެރިން ކަމަށްވާ މެޑޯނާ، ޝަކީރާ އަދި ދެކުނު ކޮރެއާގެ މަޝްހޫރު ބޭންޑް ބީޓީއެސް ފެނިގެންދާނެ އެވެ. ފީފާގެ އޮފިޝަލުންނާ ހަވާލާދީ ރިޕޯޓުތައް ބުނާ ގޮތުން، ހާފް ޓައިމްގެ ވަގުތު 20 މިނެޓަށް ދިގު ކުރުމަށް މަޝްވަރާ ކުރެވެމުންދާއިރު، އާންމުކޮށް އޮންނަ 15 މިނެޓުގެ ބްރޭކަށް ފަހު އިތުރު 11 މިނެޓުގެ ޝޯއެއް ކުރިއަށް ގެންދިއުމަކީ ވެސް އޮތް ފުރުސަތެކެވެ.
ނަމަވެސް، ފުޓުބޯޅައިގެ ގަވާއިދުތައް ކަނޑަ އަޅާ އިންޓަނޭޝަނަލް ފުޓުބޯޅަ އެސޯސިއޭޝަން ބޯޑު (އައިފެބް)ގެ އުސޫލުތައް ބުނާ ގޮތުން، މެޗެއްގެ ހާފް ޓައިމްގެ ވަގުތު 15 މިނެޓަށް ވުރެ އިތުރު ވެގެން ނުވާނެ އެވެ.
މިދިޔަ އަހަރު ނިއު ޖާޒީގައި ބޭއްވި ފީފާ ކުލަބު ވޯލްޑް ކަޕްގެ ފައިނަލްގައި ވެސް ކޯލްޑްޕްލޭ، ޖޭ ބަލްވިން، ޑޯޖާ ކެޓް، ޓެމްސް އަދި އެމަނުއަލް ކެލީގެ ހުށަހެޅުން ތަކާ އެކު ހާފް ޓައިމްގެ ވަގުތު ވަނީ 24 މިނެޓަށް ދިގުވެފައި އެވެ. މިފަހަރުގެ ފައިނަލް މެޗުގެ ހުށަހެޅުންތައް ކޯލްޑްޕްލޭގެ ކްރިސް މާޓިން ކިއުރޭޓް ކުރާއިރު، މިދިޔަ ހަފުތާގައި ޖަސްޓިން ބީބާ ވެސް ވަނީ މި ލިސްޓަށް އިތުރު ކޮށްފައި އެވެ. މީގެ އިތުރުން ބާނާ ބޯއި، ގުސްޓާވޯ ޑުޑަމެލް އަދި ޕީއެސް22 ކޯރަސް ވެސް މި ޝޯގައި ބައިވެރިވާނެ އެވެ.
ވޯލްޑް ކަޕްގެ ފައިނަލް މެޗު ފެށުމަށް ހަމަޖެހިފައި ވަނީ އެމެރިކާާގެ ގަޑިން މެންދުރު ފަހު 15:00ގައި އެވެ. އެއީ ރާއްޖެ ގަޑިން ދަންވަރު 12 ޖަހާއިރު އެވެ. މެޗުގެ ކުރިން ބާއްވާ ރަސްމިއްޔާތު 13:30 ގައި ފަށާނެ ކަމަށް ބެލެވެ އެވެ. މި ރަސްމިއްޔާތުގައި ޓޮމް ކްރޫޒް، ލޯރާ ޕައުސިނީ، ނިކޯލް ޝާޒިންގާ، ރޮބީ ވިލިއަމްސް އަދި އައިޝޯ ސްޕީޑް ފަދަ ތަރިން ފެނިގެންދާނެ އެވެ. އަދި އެމެރިކާގެ ގައުމީ ސަލާމް ކިޔާނީ މަޝްހޫރު ލަވަ ކިޔުންތެރިޔާ ޖެނިފާ ހަޑްސަން އެވެ.
