އާޖެންޓީނާ އާއި އިންގްލެންޑު މެޗާ ދިމާކޮށް ސަލާމަތީ ފިޔަވަޅުތައް ވަރުގަދަ ކޮށްފި

ފީފާ ވޯލްޑް ކަޕްގެ ސެމީ ފައިނަލްގައި އިންގްލެންޑް އާއި އާޖެންޓީނާ ބައްދަލު ކުރާ މެޗާ ދިމާކޮށް، އެމެރިކާގެ އެޓްލަންޓާގެ ސަލާމަތީ ފިޔަވަޅުތައް ވަރަށް ބޮޑަށް ވަރުގަދަ ކޮށްފި އެވެ.

ދުނިޔޭގެ ފުޓުބޯޅައިގެ އެންމެ ވާދަވެރި ދެ ޤައުމުގެ ކުރިމަތިލުން އެޓްލަންޓާ ސްޓޭޑިއަމްގައި ކުރިއަށްދާއިރު، މިއީ 1966 ވަނަ އަހަރުގެ ފަހުން ވޯލްޑް ކަޕްގެ ފައިނަލް އަށް ދިޔުމަށް އިންގްލެންޑުން ކުރާ އުންމީދު ގުޅިފައިވާ މެޗެވެ، އަނެއްކޮޅުން، ވޯލްޑް ކަޕްގެ ތަށި ދިފާއު ކުރުމަށް އާޖެންޓީނާ އިން ކުރަމުން އަންނަ މަސައްކަތުގެ އުންމީދީ މެޗެވެ.

އެޓްލަންޓާގެ ފުލުހުން ބުނީ ދެ ޤައުމުގެ ދެ މެދުގައި އޮތް ތާރީޚީ ނުތަނަވަސްކަމަށް ވަރަށް ބޮޑަށް ސަމާލުވެފައިވާ ކަމަށެވެ. 1982 ވަނަ އަހަރު ފޯކްލޭންޑް ހަނގުރާމައިގައި އިނގިރެސިވިލާތާއި އާޖެންޓީނާއާ ދެމެދު ހިނގި 74 ދުވަހުގެ ކުރިމަތިލުން ތަކުގައި އާޖެންޓީނާގެ 649 ސިފައިންނާއި، އިނގިރޭސިވިލާތުގެ 255 ސިފައިންގެ އިތުރުން އާންމުންގެ ތިން މީހުން ވަނީ މަރުވެފައި އެވެ. 

އެޓްލަންޓާގެ ޕޮލިސް ޑިޕާޓްމަންޓް އިން ނެރުނު ބަޔާނުގައި ބުނެފައި ވަނީ ވޯލްޑް ކަޕްގެ ސެމީ ފައިނަލް އަށް އެ ސިޓީ ތައްޔާރު ވަމުން އަންނައިރު، ގިނަ އަދަދެއްގެ މީހުން ޒިޔާރަތް ކުރާނެތީ މުޅި ސިޓީގެ ސަލާމަތީ ކަންކަން ވަރުގަދަ ކޮށްފައިވާ ކަމަށެވެ. މެޗު ކުޅޭ ސްޓޭޑިއަމް އާއި، މުނިފޫހި ފިލުވުމުގެ ސަރަހައްދު ތަކުގެ އިތުރުން، މީހުން ގިނައިން އެއްވާ ތަންތަނުގައި އިތުރު ފުލުހުންނާއި ވަސީލަތްތައް ޤާއިމު ކޮށްފައިވާ ކަމަށް ވެސް އެ އިދާާރާ އިން ބުނެފައިވެ އެވެ. 

މި ފިޔަވަޅު ތަކަކީ ކުށް ކުރުން ހުއްޓުވުމަށާއި، އެންމެހާ ފަރާތް ތަކަށް ރައްކާތެރިކަމާ އެކު މި ތާރީޚީ މެޗު ބަލާލުމުގެ ފުރުސަތު ފަހި ކޮށްދިނުމަށް އަޅާފައިވާ ފިޔަވަޅު ތަކެއް ކަމަށް ފުލުހުން ފާހަގަ ކުރި އެވެ.

މި މެޗުގެ ފޯރި ގަދަވެފައި ވަނީ މުބާރާތުގެ ފަދަ 16 ގައި މިޞްރު އަތުން އާޖެންޓީނާ މޮޅުވި މެޗަށް ފަހު، އެ ޓީމުގެ ކުޅުންތެރިން ފޯކްލޭންޑް ރަށް ތަކާއި، ޑިއޭގޯ މަރަޑޯނާ އަދި ލިއޮނަލް މެސީ އަށް ނިސަބްކޮށް ލަވަ ކިޔާފައިވާ ވީޑިއޯ އާންމުވުމާ ގުޅިގެންނެވެ. 1986 ވަނަ އަހަރުގެ ވޯލްޑް ކަޕްގައި މަރަޑޯނާ ޖެހި މަޝްހޫރު "ހޭންޑް އޮފް ގޯޑް" ލަނޑާ އެކު އިންގްލެންޑު މުބާރާތުން ކެޓިއިރު، މިއީ ކެޕްޓަން މެސީ އޭނާގެ ކެރިއަރުގައި އިންގްލެންޑްއާ ދެކޮޅަށް ކުޅޭ ފުރަތަމަ މެޗެވެ.

މިއީ ވޯލްޑް ކަޕްގެ މެޗެއްގައި 24 އަހަރަށް ފަހު މި ދެ ޤައުމު ބައްދަލު ކުރާ ފުރަތަމަ ފަހަރެވެ. މި ކުރިމަތިލުމާ ގުޅޭ ގޮތުން އާޖެންޓީނާގެ ހަނގުރާމައިގެ ބައިވެރިންގެ ފެޑެރޭޝަން އިން ބުނެފައި ވަނީ، ސިޔާސީ ކަންކަމަށް ވުރެ ބޮޑަށް ސަޕޯޓަރުން ފުޓުބޯޅަ އަށް ސަމާލުކަން ދިނުމަށް އެދޭ ކަމަށެވެ. އެ ފެޑެރޭޝަން އިން ބުނި ގޮތުގައި، ޤައުމުގެ މިލްކުވެރި ކަމުގެ ދިފާއުގައި ކުރާ މަސައްކަތަކީ، ޑިޕްލޮމެސީގެ ތެރެއިން ކުރިއަށް ދާނެ ކަމެއް ކަމަށާއި، ކުޅިވަރުގެ ފޯރި އާއި ޤައުމީ މަސްލަހަތާ ދެމެދު ސާފު ރޮނގެއް ދަމަން ޖެހޭ ކަމަށެވެ. 

އެމެރިކާގައި ތިބި އިންގްލެންޑުގެ ސަޕޯޓަރުންގެ އަޚުލާގަށް ފުލުހުން ތައުރީފު ކޮށްފައި ވީ ނަމަވެސް، އިނގިރޭސިވިލާތުގައި ތިބި ސަޕޯޓަރުންނާ މެދު ސަމާލުވުމަށް ވަނީ އިލްތިމާސް ކޮށްފައި އެވެ. އެންމެ ފަހުން މުބާރާތުގެ ކުއާޓާ ފައިނަލްގައި ނޯވޭއާ ދެކޮޅަށް ކުޅުނު މެޗަށް ފަހު، 500 އަށް ވުރެ ގިނަ ހާދިސާ ހިނގައި، 100 އަށް ވުރެ ގިނަ މީހުން ވަނީ ހައްޔަރު ކޮށްފައި އެވެ. އެހެންވެ، މިފަހަރު ސަލާމަތީ ބާރު ތަކުން ތިބީ ވަރަށް ބޮޑަށް ތައްޔާރު ވެގެންނެވެ.