ސްޕެއިންގެ ތަރި ލަމީން ޔަމާލްގެ ގެއަށް ވަގުން ވަންނަން އުޅެފި

ސްޕެއިންގެ ތަރި ލަމީން ޔަމާލް، ވޯލްޑް ކަޕްގެ ފައިނަލަށް އެ ގައުމު ދަތުރުކޮށްދިނުމަށް އެހީތެރިވެދިންތާ މާގިނަ އިރުތަކެއް ނުވަނީސް، ބުދަ ދުވަހު ބާސެލޯނާގައި ހުންނަ އޭނާގެ ގެއަށް ވަގުން ވަންނަން އުޅެފި ކަމަށް ފުލުހުންނާއި މީޑިއާތަކުން ރިޕޯޓްކޮށްފި އެވެ.

ފުލުހުންގެ ތަރުޖަމާނަކު އޭއެފްޕީ ނިއުސް އެޖެންސީއަށް މައުލޫމާތު ދެއްވަމުން ވިދާޅުވީ، ބާސެލޯނާގެ އަވަށެއް ކަމަށްވާ "އެސްޕްލޫގޭސް ޑި ލޮބްރެގަޓް" ގައި ހުންނަ ގެއަކަށް ވަގުން ވަންނަން މަސައްކަތް ކޮށްފައިވާ ކަމަށެވެ.

އަމިއްލަ ފަރުދުންގެ ސިއްރުތައް ހިމާޔަތްކުރުމުގެ ގޮތުން ފުލުހުން އެއީ ކާކުގެ ގެއެއްކަން ހާމަކުރަން އިންކާރު ކުރި ނަމަވެސް، ބާސެލޯނާގެ ނޫހެއް ކަމަށްވާ "ލަ ވަންގާޑިއާ" އިން ބުނެފައިވަނީ އެއީ ސްޕެއިންގެ އުމުރުން 19 އަހަރުގެ ފޯވާޑް ލަމީން ޔަމާލްގެ ގެ ކަމަށެވެ.

މޫނު ނިވާކޮށްގެން ތިބި ދެ މީހަކު އެ ގޭގެ ފާރުމަތިން އަރަން އުޅެނިކޮށް، ގޭގެ ސެކިއުރިޓީ ގާޑުންނަށް ފެނުމުން އެ މީހުން ފިލާފައިވާ ކަމަށް "ލަ ވަންގާޑިއާ" ނޫހުން ރިޕޯޓްކޮށްފައިވެ އެވެ.

އެ ނޫހުން އިތުރަށް ބުނެފައިވާ ގޮތުގައި ޔަމާލް ދިރިއުޅޭ މި ގެއަކީ ކުރިން ބާސެލޯނާގެ މަޝްހޫރު ކުޅުންތެރިޔާ ޖެރާޑް ޕީކޭ އާއި އޭނާގެ ކުރީގެ ބައިވެރިޔާ، ކޮލަމްބިއާގެ ލަވަކިޔުންތެރިޔާ ޝަކީރާ އެކުގައި ދިރިއުޅުނު ގެ ކަމަށްވާތީ، މިއީ ގިނަ ބަޔަކަށް އެނގޭ މަޝްހޫރު ގެއެކެވެ.

ބުދަ ދުވަހުގެ ފަތިހުގެ ވަގުތެއްގައި މި ހާދިސާ ހިނގާފައިވަނީ، އެމެރިކާގެ ޓެކްސަސްގައި ކުޅުނު ވޯލްޑް ކަޕް ސެމީ ފައިނަލް މެޗުގައި 2-0 ގެ ނަތީޖާއަކުން ފްރާންސް ބަލިކޮށް، ސްޕެއިން ފައިނަލަށް ދަތުރުކުރިތާ ކުޑަވަގުތުކޮޅެއްގެ ތެރޭގަ އެވެ.

މި މެޗުގެ ފުރަތަމަ ހާފުގައި ސްޕެއިންއަށް ލިބުނު ޕެނަލްޓީއަކީ ޔަމާލް ކުރި މަސައްކަތުން ހޯދައިދިން ޕެނަލްޓީއެކެވެ. މި ޕެނަލްޓީ ކާމިޔާބުކޮށް ސްޕެއިންއަށް ލީޑު ނަގައިދިނީ މިކޭލް އޮޔަރްޒަބާލް އެވެ.

މެޑްރިޑަށް ބަލާއިރު، ކަރީމް ބެންޒީމާ އާއި ރޮޑްރީގޯ އަދި ޑެނީ ކަވަހާލް ފަދަ މަޝްހޫރު ފުޓްބޯޅަ ތަރިންގެ ގެތަކަށް ވެސް ފާއިތުވި އަހަރުތަކުގައި ވަގުން ވަދެ ވައްކަން ކޮށްފައިވާކަން ފާހަގަކުރެވެ އެވެ.