ފަހަތުން އަރައި އިންގްލެންޑު ކަޓުވާލައި، ތަށި ދިފާއު ކުރަން އާޖެންޓީނާ ފައިނަލް އަަށް
މެޗުގައި އިންގްލެންޑް އިން ދެ ލަނޑު ޖަހާފައި ވަނިކޮށް، އާޖެންޓީނާ އިން ވަނީ ފަހަތުން އަރައި ދެ ލަނޑު ޖަހާފައި.
މެޗުގައި ލަނޑު ޖެހުމަށް ފަހު އާޖެންޓީނާގެ ފެނާންޑޭޒް އުފާ ފާޅު ކުރަނީ. | ރޮއިޓާސް
ފީފާ ވޯލްޑް ކަޕްގެ ސެމީ ފައިނަލްގައި ފަހަތުން އަރައި އިންގްލެންޑު ބަލިކޮށް، އެންމެ ފަހުގެ ޗެމްޕިއަން އާޖެންޓީނާ އިން މުބާރާތުގެ ފައިނަލްގެ ޖާގަ ހޯދައިފި އެވެ.
ބުދަ ދުވަހުގެ ރޭ ދަންވަރު ކުޅުނު މެޗު އާޖެންޓީނާ އިން ކާމިޔާބު ކުރީ 2-1 އިންނެވެ. މެޗުގައި އިންގްލެންޑް އިން ލަނޑު ޖަހައި ލީޑު ނަގާފައި ވަނިކޮށް، އާޖެންޓީނާ އިން ވަނީ ފަަހަތުން އަރައި ދެ ލަނޑު ޖަހައިފަ އެވެ.
މެޗުގެ ދެ ވަނަ ހާފު ފަށައިގެން 10 ވަނަ މިނެޓުގައި އިންގްލެންޑް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އެންތަނީ ގޯޑަން އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މޯގަން ރޮޖާސް އެވެ.
އިންގްލެންޑް އިން ލީޑު ނެގި ފަހުން އާޖެންޓީނާ އިން ވަނީ ވަރަށް ބޮޑަށް ކުރިއަށް ޖެހިގެން ލަނޑު ޖަހަން މަސައްކަތް ކޮަށްފައި އެވެ. މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް އާޖެންޓީނާ އަށް ނަތީޖާ ހަމަހަމަ ކޮށްދިނީ އެންޒޯ ފެނާންޑޭޒް އެވެ. އެއީ ކެޕްޓަން ލިއޮނަލް މެސީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.
އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އާޖެންޓީނާ އަށް ލީޑު ނަގައިދިނީ ލައުޓާރޯ މާޓިނޭޒް އެވެ. އެ ލަނޑު ޖަހަން މާޓިނޭޒް އަށް ވެސް ފުރުސަތު ތަނަވަސްކޮށްދިނީ މެސީ އެވެ.
މުބާރާތުގެ ފައިނަލްގައި އާޖެންޓީނާ ނިކުންނާނީ ސްޕެއިންއާ ދެކޮޅަށެވެ.
