މޮޅު ކުޅުންތެރިޔަކަށް މެސީ ވީ ސަބަބެއް އޮތީމާ، އަދި ވެސް ކުޅެނީ އެންމެ މަތީ ފެންވަރުގައި: ކޭން
16 ޖުލައި 2026 | ބުރާސްފަތި 06:24މެެޗުގައި މެސީ ދެއްކި ކުޅުމަށް ތައުރީފު ކުރަމުން ކޭން ބުނީ، އިންގްލެންޑުން ކުޅެމުން ދިޔައީ ދުނިޔޭގައި ހުރި އެންމެ މޮޅު ފުޓުބޯޅަ ކުޅުންތެރިޔާ ހުރި ޓީމާ ދެކޮޅަށް ކަމަށް. ނަމަވެސް، އިންގްލެންޑަށް މެޗު ގެއްލުނީ އެ ޓީމަށް ހެދުނު ގޯސް ތަކެއްގެ ސަބަބުން ކަމަށް ކޭން ވެސް ވަނީ ބުނެފައި.
ފީފާ ވޯލްޑް ކަޕްގެ ސެމީ ފައިނަލްގައި އިންގްލެންޑާއި އާޖެންޓީނާ ބައްދަލު ކުރި މެޗަށް ފަހު ކޭން އާއި މެސީ ވާހަކަ ދައްކަނީ. | ގެޓީ އިމޭޖަސް
އިންގްލެންޑުގެ ކެޕްޓަން ހެރީ ކޭން، އާޖެންޓީނާގެ ކެޕްޓަން ލިއޮނަލް މެސީ އަށް ވަރަށް ބޮޑަށް ތައުރީފު ކޮށްފި އެވެ.
ފީފާ ވޯލްޑް ކަޕްގެ ސެމީ ފައިނަލްގައި އާޖެންޓީނާ އަތުން ބަލިވި މެޗަށް ފަހު ވާހަކަ ދައްކަމުން ކޭން ބުނީ، މެސީ އަދި ވެސް އަންނަނީ އެންމެ މަތީ ފެންވަރުގައި ކުޅެމުން ކަމަށެވެ.
މެޗުގެ ބޮޑު ބައެއްގައި އިންގްލެންޑް އިން މެސީއާ ވަރަށް ރަނގަޅަށް ކުރިމަތިލި ކަމަށާއި، ނަމަވެސް ދުނިޔޭގެ އެންމެ ނުރައްކާތެރި ކުޅުންތެރިޔާ އަށް ބޯޅަ ލިބުމުން ކަންކަން ބަދަލު ކޮށްލެވޭ ކަމަށް ކޭން ބުންޏެވެ. އެއާ އެކު ކޭން ބުނީ، ހަގީގަތުގައި ވެސް އެންމެ މޮޅު ކުޅުންތެރިންގެ ތެރޭގައި މެސީ ހިމެނެނީ ސަބަބެއް އޮތީމަ ކަމަށާއި، މިއަދު އަނެއްކާ ވެސް މެސީ އެކަން ސާބިތު ކޮށްދީފައިވާ ކަމަށެވެ.
މެެޗުގައި މެސީ ދެއްކި ކުޅުމަށް ތައުރީފު ކުރަމުން ކޭން ބުނީ، އިންގްލެންޑުން ކުޅެމުން ދިޔައީ ދުނިޔޭގައި ހުރި އެންމެ މޮޅު ފުޓުބޯޅަ ކުޅުންތެރިޔާ ހުރި ޓީމާ ދެކޮޅަށް ކަމަށެވެ. ނަމަވެސް، އިންގްލެންޑަށް މެޗު ގެއްލުނީ އެ ޓީމަށް ހެދުނު ގޯސް ތަކެއްގެ ސަބަބުން ކަމަށް ކޭން ވެސް ވަނީ ބުނެފައި އެވެ.
އިންގްލެންޑްއާ ދެކޮޅަށް ކުޅުނު މެޗުގައި ކޭން އާއި ގޯޑަން ކައިރިން ބޯޅަ ހިފައިގެން މެސީ ކުރިއަށް ދަނީ. | ގެޓީ އިމޭޖަސް
އިންގްލެންޑުގެ ކެޕްޓަން ހެރީ ކޭން ދެއްކި ވާހަކަ.
ސްކައި ސްޕޯޓްސް އަށް ދިން އިންޓަވިޔުގައި ކޭން ބުނީ، މެޗުން ބަލިވުމުން ވަރަށް ބޮޑަށް ހިތާމަ ކުރާ ކަމަށެވެ. އޭނާ ބުނީ ކުޅުންތެރިންނާއި، ކޯޗިން އޮފިޝަލުން ވެސް ތިބީ ވަރަށް ބޮޑަށް ދެރަވެފައި ކަމަށެވެ. މެޗުގެ ބޮޑު ބައިގައި އިންގްލެންޑް އިން ރަނގަޅު ކުޅުމެއް ދެއްކި ކަމަށް އޭނާ ބުންޏެވެ.
ނަަމަވެސް، އެއް ލަނޑުގެ ލީޑު ލިބުނު ފަހުން އިންގްލެންޑަށް ދެއްކުނީ އެންމެ އެކަށީގެންވާ ކުޅުން ނޫން ކަމަށް ކޭން ވަނީ ބުނެފައި އެވެ. އަދި އެއީ މި ފެންވަރުގައި ކާމިޔާބު ހޯދަން ބޭނުންވާ ވަރުގެ ކުޅުމެއް ނޫން ކަމަށް ވެސް އޭނާ ވަނީ ބުނެފައި އެވެ. މުބާރާތުގެ ސެމީ ފައިނަލްއާ ހަމައަށް އައުމަށް ވަރަށް ބުރަ މަސައްކަތް ކުރަން ޖެހުނު ކަމަށް ކޭން ވަނީ ބުނެފައި އެވެ.
މީގެ އިތުރުން ކޭން ވަނީ އޭނާގެ ރިޓަޔާމަންޓްއާ ގުޅޭ ގޮތުން ވެސް ވާހަކަ ދައްކައިފަ އެވެ. އެގޮތުން ކޭން ބުނީ އެކަމުގައި ބުނާނެ ވަކި އެއްޗެއް އޭނާ އަށް ނޭނގޭ ކަމަށެވެ. ނަމަވެސް، ދެން ވޯލްޑް ކަޕެއް އޮންނާނީ ހަތަރު އަހަރު ފަހުން ކަމަށާއި، ހަތަރު އަހަރަކީ ވަރަށް ގިނަ ދުވަސް ކަމަށް އޭނާ ބުންޏެވެ. އެހެން ނަމަވެސް، އުމުރުން ދުވަސްވި ނަމަވެސް މެސީ ދައްކަމުން އަންނަނީ ވެސް ފާހަގަ ކޮށްލެވޭ ކުޅުމެއް ކަމަށް ފާހަގަކޮށް ކޭން ބުނީ، އޭނާ އަދި ވަކި ނިންމުމެއް ނުނިންމާ ކަމަށެވެ.
