މެސީ ބާއްވާނީ އެނދުމަތީގައި، އިންގްލެންޑު ފައިނަލް އަށް ދާނެ: ޖޯ ކޯލް

 ފީފާ ވޯލްޑް ކަޕްގެ ސެމީ ފައިނަލްގައި އާޖެންޓީނާ އާއި އިންގްލެންޑު ބައްދަލު ކުރާއިރު، އިންގްލެންޑް އިން މުބާރާތުގެ ފައިނަލް އަށް ދަތުރު ކުރާނެ ކަމަށް ޖޯ ކޯލް ބުނެފި އެވެ.

ޗެލްސީ އާއި ލިވަޕޫލްގެ އިތުރުން، އިންގްލެންޑުގެ ޤައުމީ ޓީމަށް ވެސް ކުޅެފައިވާ ކޯލް ބުނީ، އިންގްލެންޑް އިން މުބާރާތުގެ ފައިނަލްގެ ޖާގަ ހޯދާނެ ކަމަށާއި، އެއީ އޭނާ އަަށް 100 އިންސައްތަ ޔަޤީން ކަމެއް ކަމަށެވެ. ސެމީ ފައިނަލްގައި އާޖެންޓީނާއާ ދެކޮޅަށް އިންގްލެންޑް ނިކުންނާނީ، 60 އަހަރުވީ ދިގު އިންތިޒާރަށް ނިމުމެއް ގެނައުމަށެވެ.

އާޖެންޓީނާއާ ގުޅޭ ގޮތުން ވާހަކަ ދައްކަމުން ކޯލް ބުނީ، އިންގްލެންޑް އިން އާޖެންޓީނާ ހުއްޓުވާނެ ކަމަަށެވެ. އަދި އާޖެންޓީނާގެ ކެޕްޓަން ލިއޮނަލް މެސީ ހުއްޓުވާނެ ގޮތް އިންގްލެންޑަށް އިނގޭނެ ކަމަށާއި، އިންގްލެންޑް އިން އެކަން ކުރާނެ ކަމަށް ކޯލް ބުންޏެވެ. އެއާ އެކު ކޯލް ބުނީ، މެސީ ބާއްވާނީ އެނދުމަތީގައި ކަމަށާއި، އިންގްލެންޑު ދާނީ ފައިނަލް އަށް ކަމަށެވެ. ކޯލް ވަނީ ތަކުރާރުކޮށް އެހެން ބުނެފައި އެވެ.

އާޖެންޓީނާ އަކީ މުބާރާތުގެ އެންމެ ފަހުގެ ޗެމްޕިއަނުންނަށްވާ އިރު، އާޖެންޓީނާގެ ވަރުގަދަ ކަމާއި، އެ ޓީމުގެ ހިތްވަރު އިންގްލެންޑަށް ހުއްޓުވޭނެ ކަމަށް ކޯލް ބުންޏެވެ. އޭނާގެ ކަށިން ވެސް އެކަން އިޙުސާސް ކުރެވޭ ކަމަށާއި، އާޖެންޓީނާ އަށް ވުރެ އިންގްލެންޑު ހުރިހާ ގޮތަކުން ވެސް ރަނގަޅު ކަމަށް ކޯލް ވަނީ ފާހަގަ ކޮށްފައި އެވެ.

އިންގްލެންޑުގެ ތާރީޚުގައި ވެސް އެ ޓީމުން ވޯލްޑް ކަޕްގެ ފައިނަލްގައި ކުޅެފައި ވަނީ އެންމެ ފަހަރެއްގައި އެވެ. އެއީ 1966 ވަނަ އަހަރު އެވެ. އެ ފަހަރު އިންގްލެންޑް އިން ވަނީ ވޯލްޑް ކަޕް ކާމިޔާބު ކޮށްފައި އެވެ. އޭގެ ފަހުން މުބާރާތުގައި އިންގްލެންޑް އަށް އެންމެ ދުރަށް ވެސް ދެވެނީ ސެމީ ފަައިނަލްއާ ހަމައަށެވެ. މިއީ އޭގެ ފަހުން އިންގްލެންޑް އިން ވޯލްޑް ކަޕްގެ ސެމީ ފައިނަލްގައި ކުޅޭނެ ތިން ވަނަ ފަހަރެވެ.

އެންމެ ފަހުން 2018 ވަނަ އަހަރު ރަޝިޔާގައި އޮތް މުބާރާތުގެ ސެމީ ފައިނަލްގައި އިންގްލެންޑު ވަނީ ކުޅެފައި އެވެ. ނަމަވެސް ސެމީ ފައިނަލްގައި ކްރޮއޭޝިއާ އަތުން ބަލިވީއިރު، އިންގްލެންޑް އަށް އެ ފަހަރު ލިބުނީ ހަތަރު ވަނަ އެވެ.