ހުރްމުޒް ކަނޑު އޮޅީގެ ސަލާމަތާ ގުޅޭ ބިލެއް އީރާންގެ ޤާނޫނު ހަދާ މަޖިލީހަށް ހުށަހަޅައިފި

ހުރްމުޒް ކަނޑު އޮޅީގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި އެކުލަވާލާފައިވާ ބިލެއް އީރާންގެ ޤާނޫނު ހަދާ މަޖިލީހަށް ރަސްމީކޮށް ހުށަހަޅާފައިވާ ކަމަށް އެ ޤައުމުގެ ޤާނޫނު ހަދާ މަޖިލީހުގެ ނެޝަނަލް ސެކިއުރިޓީ ކޮމެޓީގެ މުގައްރިރު އިބްރާހީމް އަޒީޒީ ވިދާޅުވެއްޖެ އެވެ. 

އިބްރާހީމް އަޒީޒީ އެކްސްގައި ކުރެއްވި ޕޯސްޓެއްގައި ވިދާޅުވީ، "ސްޓްރެޓީޖިކް އެކްޝަން ފޯ ދަ ސެކިއުރިޓީ އެންޑް ސަސްޓެއިނަބަލް ޕްރޮގްރެސް އޮފް ދަ ސްޓްރެއިޓް އޮފް ހުރްމުޒް އެންޑް ދަ ޕާޝިއަން ގަލްފް" ގެ ނަމުގައި ތައްޔާރު ކޮށްފައިވާ ބިލު މަޖިލީހަށް ހުށަހަޅާފައި ވަނީ ހޯމަ ދުވަހުގެ ރޭގެ ވަގުތެއްގައި ކަމަށެވެ. މި ބިލު ހުށަހެޅި ވަގުތަކީ އެމެރިކާގެ ޑްރޯން ތަކެއް އީރާން އިން ވައްޓާލި ވަގުތާ ދިމާވި ވަގުތެއް ކަމަށް ވެސް އޭނާ ފާހަގަ ކުރެއްވި އެވެ.

އަޒީޒީ ވިދާޅުވީ އީރާން އިން ކަނޑަ އަޅާފައިވާ ރަތް ރޮނގުތައް، ނުވަތަ އުސޫލުތައް ދިފާއު ކުރުމުގައި އެ ގައުމުން ސާބިތުކަމާ އެކު ދެމި އޮންނާނެ ކަމަށެވެ. ވަކިން ހާއްސަކޮށް ހުރްމުޒް ކަނޑު އޮޅި ބެލެހެއްޓުމާއި، އެ ސަރަހައްދުގެ ކަންކަން މެނޭޖު ކުރުމުގައި އީރާން އިން އެއްވެސް ދޫ ދިނުމެއް ނުދޭނެ ކަމަށް އޭނާ ވިދާޅުވި އެވެ.

މީގެ އިތުރުން އޭނާ ވިދާޅުވީ މި ބިލަކީ އެ ސަރަހައްދުގެ ސަލާމަތީ ކަންކަން ވަރުގަދަ ކުރުމަށް އެޅި ފުރަތަމަ ފިޔަވަޅު ކަމަށާއި، ކުރިއަށް އޮތް ތަނުގައި މީގެ އިތުރު ފިޔަވަޅުތައް އަޅަމުންދާނެ ކަމަށެވެ. މި ބިލުގެ މަގުސަދަކީ ހުރްމުޒް ކަނޑު އޮޅި އާއި، ޕާޝިއަން ގަލްފުގެ ސަލާމަތީ ކަންކަން ހަރުދަނާ އުސޫލެއްގެ ދަށުން ބެލެހެއްޓުން ކަމަށް އީރާންގެ ޤާނޫނު ހަދާ މަޖިލީހުން މައުލޫމާތު ދީފައިވެ އެވެ. 

ހުރްމުޒް ކަނޑު އޮޅި އަކީ ދުނިޔޭގެ ތެލުގެ ވިޔަފާރީގައި އެންމެ މުހިންމު އެއް ސަރަހައްދަށް ވާއިރު، މި ސަރަހައްދުގެ ސަލާމަތީ ކަންކަމާ ގުޅޭ ގޮތުން އީރާން އިން މިފަދަ ބިލެއް ހުށަހެޅުމަކީ ބައިނަލްއަގުވާމީ މައިދާނުގައި ސަމާލުކަން ހުއްޓިފައިވާ ކަމެކެވެ.

މި ބިލުގެ ސަބަބުން އެ ސަރަހައްދުން ދަތުރު ކުރާ އުޅަނދު ފަހަރާއި، ސަލާމަތީ ކަންކަމަށް އަންނާނެ ބަދަލުތަކާ މެދު މަސްރަހު ދިރާސާކުރާ ފަރާތް ތަކުން އަންނަނީ ސުވާލު އުފައްދަމުންނެވެ.