އީރާނާ ދެކޮޅަށް ކުރަމުންދާ ހަނގުރާމަ އަލުން ފަށައިފިކަން ރައީސް ޓްރަމްޕް ކޮންގްރެސް އަށް ރަސްމީކޮށް އަންގަވައިފި

އީރާނާ ދެކޮޅަށް ކުރަމުންދާ ހަނގުރާމައިގެ އަމަލުތައް ޖުލައި މަހުގެ 7 ވަނަ ދުވަހުން ފެށިގެން އަލުން ފަށާފައިވާކަން ބަޔާންކޮށް، އެމެރިކާގެ ރައީސް ޑޮނަލްޑް ޓްރަމްޕް އެގައުމުގެ ގާނޫނު ހަދާ މަޖިލިސް (ކޮންގްރެސް) އަށް ރަސްމީކޮށް އަންގަވައިފިއެވެ. ޓްރަމްޕްގެ ސަރުކާރުން ދެކޭގޮތުގައި މި އެންގުމާއެކު، ކޮންގްރެސްގެ ހުއްދައަކާ ނުލައި ކުރިއަށް އޮތް 60 ދުވަހުގެ ތެރޭގައި އެ ސަރަހައްދުގައި އަސްކަރީ ބާރުގެ ބޭނުންކުރުމުގެ ފުރުސަތު ސަރުކާރަށް ލިބިގެންދާނެ އެވެ.

މިދިޔަ ހޯމަ ދުވަހު ރޮއިޓާސްއަށް ފެނިފައިވާ، ޖުލައި 10 ވަނަ ދުވަހުގެ ތާރީޚު ޖަހާފައިވާ މި ސިޓީގައި ޓްރަމްޕް ވިދާޅުވެފައިވަނީ، އެމެރިކާގެ ރައްޔިތުންނާއި، ގައުމީ ސަލާމަތާއި، އަދި ޚާރިޖީ ސިޔާސަތުގެ މަސްލަހަތު ހިމާޔަތްކުރުމަށްޓަކައި އޭނާގެ މައްޗަށް މަތިކޮށްފައިވާ ޒިންމާގެ ދަށުން މި އަސްކަރީ ފިޔަވަޅު އެޅުމަށް އަމުރުކުރެއްވީ ކަމަށެވެ.

މި ސިޓީގައި ޓްރަމްޕް ވަނީ އޭނާ އެޅުއްވި ފިޔަވަޅުތަކުގެ ތަފްސީލު ހިމަނުއްވާފަ އެވެ. އޭގެ ތެރޭގައި އޭޕްރީލް 7 ވަނަ ދުވަހު ދެ ހަފުތާގެ މުއްދަތަށް ހަމަލާ ބަދަލުކުރުން ހުއްޓާލުމަށް އަމުރުކުރެއްވުމާއި، ފަހުން އެ މުއްދަތު އިތުރުކުރެއްވުމުގެ އިތުރުން، މައްސަލައަށް ޑިޕްލޮމެޓިކް ހައްލެއް ހޯދުމަށް އޭނާގެ ސަރުކާރުން ކުރި މަސައްކަތްތައް ހިމެނެ އެވެ.

އިސްރާއީލާ ގުޅިގެން އެމެރިކާއިން އީރާނަށް ހަމަލާދޭން ފަށާފައިވަނީ މިއަހަރުގެ ފެބްރުއަރީ މަހުގެ 28 ވަނަ ދުވަހު އެވެ.

ޖޫން 17 ވަނަ ދުވަހު އީރާނާއެކު ސޮއިކުރެއްވި ފަހުމުނާމާއާ ބެހޭގޮތުން ވާހަކަދައްކަވަމުން ޓްރަމްޕް ވިދާޅުވީ، ހުރްމުޒް ކަނޑުއޮޅިން ދަތުރުކުރާ މުދާ އުފުލާ އުޅަނދުފަހަރަށް ހަމަލާދީ އީރާނުން އެ އެއްބަސްވުމާ ޚިލާފުވެފައިވާ ކަމަށެވެ. އަދި އެކަމުގެ ސަބަބުން އީރާނަށް އަލުން ހަމަލާދިނުމަށް އަމުރުކުރަން ޖެހުނީ ކަމަށް އޭނާ ވިދާޅުވި އެވެ.

މި ކުރިމަތިލުންތައް ވަރުގަދަވަމުންދާ ދަނޑިވަޅެއްގައި، ހޯމަ ދުވަހު ޓްރަމްޕް ވިދާޅުވީ ގަލްފް ސަރަހައްދުގައި އީރާނުގެ އުޅަނދުފަހަރު ހުއްޓުވުމަށް ހިންގާ ބްލޮކޭޑް އެމެރިކާއިން އަލުން ފަށާފައިވާ ކަމަށާއި، ހުރްމުޒް ކަނޑުއޮޅި ބަންދުވިޔަ ނުދީ ހުޅުވާފައި ބޭއްވުމަށް މަސައްކަތް ކުރާނެ ކަމަށެވެ.

އެމެރިކާގެ ގާނޫނު އަސާސީ ބުނާގޮތުން ހަނގުރާމަ އިއުލާންކުރުމުގެ ބާރު ލިބިގެންވަނީ ހަމައެކަނި ކޮންގްރެސްއަށެވެ. ނަމަވެސް، ގައުމުގެ ސަލާމަތް ރައްކާތެރިކުރުމަށްޓަކައި، ގާނޫނު ހަދާ މަޖިލީހުގެ ހުއްދައަކާ ނުލައި ކުރު މުއްދަތުގެ އަސްކަރީ ހަރަކާތްތައް ހިންގުމުގެ ހައްގު އެމެރިކާގެ ރައީސުންނަށް ލިބިގެންވާ ކަމަށް އެގައުމުގެ ރައީސުން ޒަމާނުއްސުރެ ދައުވާ ކުރައްވަ އެވެ.

ވޯ ޕަވަރސް އެކްޓް

"ވޯ ޕަވަރސް އެކްޓް" ނުވަތަ ހަނގުރާމައިގެ ބާރުތަކާ ބެހޭ ގާނޫނު ބުނާގޮތުން، ހަނގުރާމައިގެ އަމަލެއް ފަށާތާ 48 ގަޑިއިރު ނުވަނީސް ރައީސް އެކަން ކޮންގްރެސްއަށް އަންގަންވާނެ އެވެ. އަދި ކޮންގްރެސްގެ ހުއްދައާ ނުލައި ފަށާ އަސްކަރީ ހަރަކާތްތައް 60 ދުވަހުގެ ތެރޭގައި ނިންމަންޖެހޭނެ ކަމަށްވެސް އެ ގާނޫނުގައި ބަޔާންކޮށްފައިވެ އެވެ.

އީރާނުގެ މައްސަލައިގައި ފުރަތަމަ 60 ދުވަހުގެ މުއްދަތު ހަމަވީ މެއި މަހުގެ 1 ވަނަ ދުވަހަށެވެ. ނަމަވެސް، ރިޕަބްލިކަން ޕާޓީއަށް ނިސްބަތްވާ ރައީސް ޓްރަމްޕް ވިދާޅުވީ، ހަމަލާ ބަދަލުކުރުން ހުއްޓާލުމުގެ އެއްބަސްވުމާއެކު ހަނގުރާމައިގެ އަމަލުތައް ނިމުމަކަށް އައިސްފައިވާ ކަމަށް އޭނާ އިއުލާންކުރައްވާފައިވާތީ، އެ މުއްދަތު މިހާރު ނުހިނގާނެ ކަމަށެވެ. ޓްރަމްޕް މިހެން ވިދާޅުވި ނަމަވެސް، އެމެރިކާގެ ސިފައިން އީރާނުގެ ބަނދަރުތައް ބަންދުކޮށް، ހަމަލާތައް ދެމުންދިޔަކަން ފާހަގަކުރެވެ އެވެ.

މިހާރު ކުރިއަށްދާ ހަނގުރާމައާ ދެކޮޅު ޑިމޮކްރެޓުންނާއި ރިޕަބްލިކަން ޕާޓީގެ ބައެއް މެންބަރުން ބުނަމުންދަނީ، ސަރުކާރުން ގާނޫނު މާނަކުރަމުންދަނީ ނުބައިކޮށް ކަމަށެވެ.

ނަން ހާމަނުކުރުމަށް އެދި ހައުސް އޮފް ރެޕްރެޒެންޓެޓިވްސްގެ ޑިމޮކްރެޓިކް ޕާޓީގެ އިސް ބޭފުޅަކު ވިދާޅުވީ، ހަތަރު ހަފުތާއާއި ހަ ހަފުތާއާ ދެމެދުގެ މުއްދަތަކަށް ދެމިގެންދާނެ ކަމަށް ރައީސް ވިދާޅުވި ހަނގުރާމަ، އެތައް މަހަކަށް ދެމިގެން ގޮސްފައިވާއިރު، އެކަން ނުހިނގާ ކަމަށް ހަމައެކަނި ރައީސް ބޭނުންފުޅުވާ ގޮތަށް ނިންމަވައި ނުލެއްވޭނެ ކަމަށެވެ.

މީގެ އިތުރުން، ކޮންގްރެސްގެ ދެ މަޖިލީހުގައިވެސް ރިޕަބްލިކަން ޕާޓީގެ އަޣުލަބިއްޔަތު ކުޑަ ތަފާތަކުން އޮތް ނަމަވެސް، އީރާނާއެކު ކުރާ ހަނގުރާމައިން އެމެރިކާގެ ސިފައިން ބޭލުމަށް ގޮވާލާ ގަރާރެއް ސެނެޓާއި ހައުސް އޮފް ރެޕްރެޒެންޓެޓިވްސްއިން މިދިޔަ މަހު ވަނީ ފާސްކޮށްފަ އެވެ.

މި ވޯޓުން ހާމަވެގެންދިޔައީ، އެތައް މަހަކަށް ދެމިގެން ގޮސްފައިވާ މި ހަނގުރާމައާ މެދު މެންބަރުންގެ މެދުގައި އޮތް ކަންބޮޑުވުން އިތުރުވަމުންދާ މިންވަރެވެ.

މި ވޯޓަށްފަހު ޓްރަމްޕް ވަނީ ވަރަށް ބޮޑަށް ކޯފާވެ، އެ ގަރާރަށް ތާއީދުކޮށް ވޯޓު ދިން މެންބަރުންނަކީ އީރާނަށް "ހިތްހަމަޖެހުން" ހޯދައިދީ، އޭނާގެ މަސައްކަތަށް "އުނދަގޫ" ކުރާ ބައެއްގެ ގޮތުގައި ސިފަކުރައްވައި އެ ބޭފުޅުންނަށް ފާޑުވިދާޅުވެފަ އެވެ.