އީރާނުން ހުރްމުޒް ކަނޑުއޮޅީގައި ދެ ތެޔޮ ޓޭންކަރަކަށް ހަމަލާދީފި
ހުރްމުޒް ކަނޑުއޮޅީގެ ސަލާމަތީ ކަންކަމުގެ ތެރެއަށް އެމެރިކާއިން އަތްބޭނުމުގެ ފުރުސަތު ނުދޭނެ ކަމަށް ބުނެ އީރާނުން އިންޒާރު ދީފި. އެމެރިކާގެ ނުފޫޒާއެކު ބައިނަލްއަގުވާމީ ކަނޑުގެ ގަވާއިދުތަކާ ޚިލާފުވާ އުޅަނދުތަކާ ދެކޮޅަށް ވަރުގަދަ ފިޔަވަޅު އަޅާނެ ކަމަށް އީރާނުގެ އަސްކަރިއްޔާއިން ބުނެފައިވޭ. އެ ސަރަހައްދުގައި އެމެރިކާއިން ހިންގާ ޣައިރު ގާނޫނީ ހަރަކާތްތަކާ ގުޅިގެން ހުރްމުޒް ކަނޑުއޮޅިން ދަތުރުފަތުރު ކުރުން މިހާރު ވަނީ ބަންދުކޮށްފައި.
13 ޖުލައި 2026 ގައި، ހުރްމުޒް ކަނޑުއޮޅި ކައިރިން ބައެއް އުޅަނދުފަހަރު ދަތުރުކުރަނީ. | ޕްރެސްޓީވީ
އެމެރިކާގެ މަޅީގައި ޖެހި، ހުރްމުޒް ކަނޑުއޮޅީގައި މައިން ވަޅުލާފައިވާ ސަރަހައްދަކުން ދަތުރުކުރި ދެ ތެޔޮ ޓޭންކަރަކަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ ކަނޑުގެ ސިފައިން ހަމަލާދީފި ކަމަށް އީރާނުން ބުނެފި އެވެ. އައި.އާރު.ޖީ.ސީ އިން ކަށަވަރުކޮށްދީފައިވާ ގޮތުގައި، މި ދެ ސުޕަ ޓޭންކަރަށް ހަމަލާދީ ހުއްޓުވާފައިވަނީ، ތަކުރާރުކޮށް ދިން އިންޒާރުތަކަށް ބެލުމެއްނެތި، ގަސްތުގައި ނުރައްކާތެރި ސަރަހައްދަކުން ދަތުރުކުރަން އުޅުމުގެ ސަބަބުންނެވެ.
ހޯމަ ދުވަހުގެ ރޭ އައި.އާރު.ޖީ.ސީ އިން ނެރުނު ބަޔާނެއްގައި ބުނެފައިވަނީ، ތަކުރާރުކޮށް ނާކާމިޔާބީއާ ކުރިމަތިލާން ޖެހުނު ނަމަވެސް އެކަމުން އިބުރަތް ހާސިލުނުކުރާ، ކުޑަކުދިން މަރާ އެމެރިކާގެ ސަރުކާރުން، ބައިނަލްއަގުވާމީ ކަނޑުގެ ގަވާއިދުތަކާ ޚިލާފަށް ދަތުރުކުރުމަށް އުޅަނދުފަހަރަށް ބާރުއަޅައި، މަސްލަހަތު ނަގާލަން އަނެއްކާވެސް މަސައްކަތް ކޮށްފައިވާ ކަމަށެވެ.
އެމެރިކާގެ މަކަރުވެރި ރޭވުމުގެ ތެރެއަށް ވަދެ، މި ދެ ޓޭންކަރުން ވަނީ އެ އުޅަނދުފަހަރުގެ ނެވިގޭޝަން ސިސްޓަމްތައް ނިއްވާލާފައި ކަމަށާއި، ހުރްމުޒް ކަނޑުއޮޅީގެ ސެކިއުރިޓީ ކޮންޓްރޯލް ސެންޓަރުން ދިން ގިނަ އިންޒާރުތަކަށް އެ އުޅަނދުތަކުން އިޖާބަދީފައި ނުވާކަމަށްވެސް އެ ބަޔާނުގައި ބުނެފައިވެ އެވެ.
ސަލާމަތީ ގަވާއިދުތަކަށް ބޯލެނބުމުގެ ބަދަލުގައި، ދަތުރުކުރުން މަނާކޮށްފައިވާ އަދި މައިން ވަޅުލާފައިވާ ސަރަހައްދަކުން ދަތުރުކުރުމަށް ނިންމުމަކީ، ބައިނަލްއަގުވާމީ ކަނޑުދަތުރުފަތުރަށް ނުރައްކާވެ، އެ ސަރަހައްދުގެ ސަލާމަތީ އުސޫލުތަކާ ގަސްތުގައި ޚިލާފުވުން ކަމަށް އައި.އާރު.ޖީ.ސީ އިން ބުނެފައިވެއެވެ.
އައި.އާރު.ޖީ.ސީ ގެ ކަނޑުގެ ސިފައިން ބުނި ގޮތުގައި، މި ދެ އުޅަނދަށް ހަމަލާދީ މިހާރު ވަނީ އެ ސަރަހައްދުން ބޭރުކޮށްލާފަ އެވެ.
އައި.އާރު.ޖީ.ސީ އިން އިތުރަށް ބުނެފައިވަނީ، ސަރަހައްދުގެ ރައްޔިތުންގެ ހައްގުތަކަށް އަރައިގަތުމަށް އެތައް ހާސް ކިލޯމީޓަރަކުން ދަތުރުކޮށްފައި އައިސްފައިވާ އަދުއްވުންނަށް އެއްވެސް ސިފައެއްގައި އެހީތެރިވުމާއި، މައިން ވަޅުލާފައިވާ ސަރަހައްދުތަކުން ދަތުރުކުރަން އުޅުމަކީ އޭގެ ސަބަބުން ހިތާމައާއި، ބޮޑެތި ގެއްލުންތަކާއި، ހުރްމުޒް ކަނޑުއޮޅި އަލުން ހުޅުވުން ލަސްވުމުގެ އިތުރުން ދުނިޔޭގެ ހަކަތައިގެ ބާޒާރަށް ބޮޑު ނުރައްކަލެއް ކުރިމަތިވާނެ ކަމެއް ކަމަށެވެ.
މިފަދަ ޒިންމާދާރުކަން ކުޑަ އަމަލުތަކަކީ ސަރަހައްދުގެ ހަމަޖެހުން ނަގާލަން އުޅޭ ފަރާތްތަކުގެ މަސްލަހަތު އޮތް ކަންކަން ކަމަށާއި، އެފަދަ ކަންކަމާ ދެކޮޅަށް ވަރުގަދަ ފިޔަވަޅު އަޅާނެ ކަމަށް އައި.އާރު.ޖީ.ސީ އިން ވަނީ ބުނެފަ އެވެ.
ހޯމަ ދުވަހުގެ ކުރީކޮޅު، އީރާނުގެ އެންމެ މަތީ އަސްކަރީ ކޮމާންޑުން ބުނެފައިވަނީ، ވޮޝިންޓަނަށް ތަކުރާރުކޮށް އިންޒާރު ދިނުމަށްފަހު، ހުރްމުޒް ކަނޑުއޮޅި ބެލެހެއްޓުމުގެ ކަންކަމުގެ ތެރެއަށް އެމެރިކާއިން އަތްބޭނުމުގެ ފުރުސަތު ދުވަހަކުވެސް ނުދޭނެ ކަމަށެވެ.
ޚާތަމް އަލް-އަންބިޔާ ސެންޓްރަލް ހެޑްކުއާޓާސްގެ ތަރުޖަމާނު، ލެފްޓިނެންޓް ކާނަލް އިބްރާހީމް ޒުލްފަގާރީ މިހެން ވިދާޅުވީ، ސްޓްރެޓީޖިކް ގޮތުން މުހިންމު އެ ކަނޑުއޮޅީގެ ކޮންޓްރޯލް އެމެރިކާއަށް ނެގިދާނެ ކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕް ދެއްކެވި ވާހަކަތަކާ ގުޅިގެންނެވެ.
ޒުލްފަގާރީ ވިދާޅުވީ، ކުރިން ދީފައިވާ އިންޒާރުތަކާ އެއްގޮތަށް، އެއްވެސް ހާލަތެއްގައި ހުރްމުޒް ކަނޑުއޮޅީގެ އިދާރީ ކަންކަމުގެ ތެރެއަށް އެމެރިކާއިން ވަނުމުގެ ފުރުސަތު ނުދޭނެ ކަމަށެވެ.
ފެބްރުއަރީ 28 ވަނަ ދުވަހު އެމެރިކާއާއި އިސްރާއީލުން އީރާނާ ދެކޮޅަށް އުދުވާނީ ހަމަލާތަކެއް ދޭން ފެށުމާއެކު، އީރާނުން ވަނީ ދުޝްމަނުންނާއި އެމީހުންގެ ބައިވެރިންނަށް އެ ސަރަހައްދު ބަންދުކޮށްފަ އެވެ.
އޭޕްރިލް 7 ވަނަ ދުވަހު ޑޮނަލްޑް ޓްރަމްޕް އަމިއްލައަށް ހަނގުރާމަ ހުއްޓާލުމުގެ އެއްބަސްވުމެއް އިއުލާން ކުރެއްވި ނަމަވެސް، އީރާނުގެ އުޅަނދުފަހަރާއި ބަނދަރުތައް ބަންދުކުރުމުގެ ޣައިރު ގާނޫނީ އަމަލުތައް ކުރިއަށް ގެންދާނެ ކަމަށް ޓްރަމްޕް ވިދާޅުވުމާ ގުޅިގެން، އީރާނުން ވަނީ ކަނޑުއޮޅީގެ ކޮންޓްރޯލްތައް ކުރިއަށްވުރެ ވަރުގަދަކޮށްފަ އެވެ.
އާދީއްތަ ދުވަހު ޕާޝިއަން ގަލްފް ސްޓްރެއިޓް އޮތޯރިޓީ (ޕީ.ޖީ.އެސް.އޭ) އިން އެކްސްގައި ކުރި ކުރު ބަޔާނެއްގައި ބުނެފައިވަނީ، އެ ސަރަހައްދުގައި އެމެރިކާގެ އަސްކަރިއްޔާއިން ހިންގަމުންދާ "ޣައިރު ގާނޫނީ ހަރަކާތްތަކާ" ގުޅިގެން، ހުރްމުޒް ކަނޑުއޮޅިން ދަތުރުފަތުރު ކުރުން މިހާރު ބަންދުކޮށްފައިވާ ކަމަށެވެ.
އެ ބަޔާނުގައި އިތުރަށް ބުނެފައިވަނީ، އެމެރިކާގެ އަސްކަރީ ބާރުތަކުން އެ ސަރަހައްދުގައި ހިންގަމުންދާ ގާނޫނާ ޚިލާފު ހަރަކާތްތަކުގެ ސަބަބުން، މިވަގުތު ހުރްމުޒް ކަނޑުއޮޅި ހުރަސްކޮށް ދަތުރުކުރުމަކީ ކުރެވޭނެ ކަމެއް ނޫން ކަމަށެވެ.
މަސްދަރު: ޕްރެސް ޓީވީ
