އަރަބި ކަނޑުން ދަތުރުކުރަމުންދިޔަ "ސްޓޯލްޓް މެގްނީޒިއަމް" ނަމަކަށް ކިޔާ ތެޔޮ ޓޭންކަރަކަށް ހަމަލާދީފި
14 ޖުލައި 2026 | އަންގާރަ 10:57އޮމާން ކައިރިން ދަތުރުކުރި "ސްޓޯލްޓް މެގްނީޒިއަމް" ޓޭންކަރަށް ދިން ހަމަލާއެއްގައި އިންޖީނު ރޫމުގައި އަލިފާން ރޯވި ނަމަވެސް، ފަޅުވެރިންނަށް އެއްވެސް އަނިޔާއެއް ނުވެ ވަނީ ސަލާމަތްވެފައި. މީގެ އިތުރުން ހުރްމުޒް ކަނޑުއޮޅިން ދަތުރުކުރި ޔޫއޭއީގެ ދެ އުޅަނދަކަށް އީރާނުން ދިން މިސައިލް ހަމަލާތަކެއްގައި އެކަކު މަރުވެ، އުޅަނދުތަކަށް ބޮޑެތި ގެއްލުންތަކެއް ވަނީ ލިބިފައި.
2026 ޖުލައި 12 ވަނަ ދުވަހު އޭއެފްޕީޓީވީގެ ވީޑިއޯ ފުޓޭޖަކުން ނަގާފައިވާ މި ފޮޓޯއިން ފެންނަނީ، ޔުނައިޓެޑް އެރަބް އެމިރޭޓްސް (ޔޫއޭއީ) ގެ އިރުމަތީ އައްސޭރިފަށުގައިވާ ޚޯރް ފައްކާން ކައިރިން، ހޯރްމޫޒް ސަރަހައްދަށް މުދާ އުފުލާ ބޯޓުފަހަރުތަކެއް ބަނދަރުކޮށްފައިވާ މަންޒަރު. | ގެޓީ އިމޭޖަސް
އޮމާންގެ އައްސޭރިފަށުން އަރަބި ކަނޑުން ދަތުރުކުރަމުންދިޔަ "ސްޓޯލްޓް މެގްނީޒިއަމް" ނަމަކަށް ކިޔާ ތެޔޮ ޓޭންކަރަކަށް ހަމަލާ އެއް އެރުމުގެ ސަބަބުން އެއްޗެއް ގޮވައި، އަންގާރަ ދުވަހު އަލިފާނުގެ ހާދިސާއެއް ހިނގައިފި ކަމަށް އެ އުޅަނދު އޮޕަރޭޓްކުރާ ސްޓޯލްޓް ޓޭންކާސް ކުންފުނިން ބުނެފި އެވެ.
މި ހާދިސާ ހިނގާފައިވަނީ ހޯމަ ދުވަހުގެ ރޭގެ ވަގުތެއްގަޗއެވެ. އެ ކުންފުނިން ނެރުނު ބަޔާނެއްގައި ބުނެފައިވަނީ، މި ގޮވުމާ ގުޅިގެން އެ އުޅަނދުގެ އިންޖީނު ރޫމުގައި އަލިފާން ރޯވެފައިވާ ކަމަށެވެ.
އެ އުޅަނދުގައި ތިބި ހުރިހާ ފަޅުވެރިންގެ ހާލުވެސް ރަނގަޅު ކަމަށާއި، އެންމެން ތިބީ ސަލާމަތުން ކަމަށް އެ ކުންފުނިން ބުނެ އެވެ. އަދި އުޅަނދުގެ ފަޅުވެރިން މިހާރު ދަނީ އަލިފާން ނިއްވުމުގެ މަސައްކަތް ކުރަމުންނެވެ.
ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން ވަނީ އޮމާންގެ ގަލްހާތުގެ އިރުއުތުރުން 40 ނޯޓިކަލް މޭލު ބޭރުން ހާދިސާއެއް ހިނގައިގެން އުޅޭކަމުގެ ރިޕޯޓުކޮށްފަ އެވެ. އެލްއެސްއީޖީގެ ޝިޕިންގ ޑޭޓާތަކުން ދައްކާ ގޮތުގައި، އެއީ ސްޓޯލްޓް މެގްނީޒިއަމް ދަތުރުކުރަމުންދިޔަ ސަރަހައްދެވެ.
މީގެ އިތުރުން ހިނގި އެހެން ހާދިސާއެއްގައި، ޔޫއޭއީގެ "މޮމްބާސާ ބީ" އަދި "އަލް ބަހްޔާ" ނަމަކަށް ކިޔާ ދެ ކްރޫޑް އޮއިލް ޓޭންކަރަކަށް، ހުރްމުޒް ކަނޑުއޮޅިން ދަތުރުކުރަނިކޮށް އީރާނުގެ ކްރޫޒް މިސައިލް ހަމަލާތަކެއް ވަނީ އަމާޒުވެފަ އެވެ. މި ހަމަލާތަކުގެ ސަބަބުން އެ ދެ އުޅަނދަށް ބޮޑެތި ގެއްލުންތަކެއް ލިބިފައިވާއިރު، އެކަކު ވަނީ މަރުވެފަ އެވެ.
މަސްދަރު: ރޮއިޓާސް
