ބަހުރޭނުން އީރާނުގެ ވައިގެ ހަމަލާތައް ނާކާމިޔާބުކޮށްލައިފި

ވައިގެ މަގުން އީރާނުން ބަހްރައިނަށް ދިން ބައެއް ހަމަލާތައް ނާކާމިޔާބުކޮށްލާފައިވާ ކަމަށް ބަހްރައިނަން އަންގާރަ ދުވަހު ބުނެފި އެވެ. މި ހަމަލާތައް ދީފައިވަނީ މުހިންމު ކަނޑުގެ ސަރަހައްދެއް ކަމަށްވާ ހުރްމުޒް ކަނޑުއޮޅީގެ މައްސަލައިގައި އެމެރިކާއާއި އީރާނާ ދެމެދު އޮތް ނުތަނަވަސްކަން ބޮޑުވެ، ކުރިމަތިލުންތައް އިތުރުވެފައިވާ ދަނޑިވަޅެއްގަ އެވެ.

ބަހްރައިންގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، އަންގާރަ ދުވަހުގެ ހެނދުނުގެ ވަގުތެއްގައި އީރާނުން ދިން ނުރައްކާތެރި ވައިގެ ހަމަލާތަކެއް އެ ގައުމުގެ އެއަރ ޑިފެންސް ސިސްޓަމްތަކުން ހުއްޓުވައި، ނައްތާލާފައިވާ ކަމަށެވެ. މީގެ އިތުރުން، އީރާނުން އާންމު ރައްޔިތުންނަށް އަމާޒުކޮށް ހަމަލާދޭ ކަމަށްވެސް ބަހްރައިންގެ އަސްކަރިއްޔާއިން ވަނީ ތުހުމަތުކޮށްފަ އެވެ.

އީރާނުން ބުނެފައިވާ ގޮތުގައި ބަހްރައިނަށް ހަމަލާދީފައިވަނީ، އެމެރިކާއިން އީރާނުގެ ސަރަހައްދުތަކަށް ދިން ހަމަލާތަކުގެ ބަދަލު ހިފުމުގެ ގޮތުންނެވެ. އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން މީގެ ކުރިން ބުނެފައިވަނީ ބަހްރައިނަށް އަމާޒުކޮށް މިސައިލާއި ޑްރޯން ހަމަލާތަކެއް ދީފައިވާނެ ކަމަށެވެ.

އޭއެފްޕީގެ ނޫސްވެރިއަކު ރިޕޯޓްކޮށްފައިވާ ގޮތުގައި، ފަތިހުން ފެށިގެން ތިންވަނަ ފަހަރަށް ނުރައްކަލުގެ ރަނގަބީލު (ސައިރަން) އެޅުމަށްފަހު، ބަހްރައިންގެ ވެރިރަށް މަނާމާގައި ބާރުގަދަ ގޮވުންތަކެއްގެ އަޑު ވަނީ އިވިފަ އެވެ.

ބަހްރައިންގެ ޑިފެންސް މިނިސްޓްރީން އެކްސްގައި ކުރި ޕޯސްޓެއްގައި ބުނެފައިވަނީ، ނުރައްކަލުގެ ރަނގަބީލު އަޅާފައިވާތީ، ހުރިހާ ރައްޔިތުންނާއި އެ ގައުމުގައި ދިރިއުޅޭ މީހުން ކެތްތެރިކަން އިސްކޮށް، އެންމެ ގާތުގައި ހުރި ރައްކާތެރި ތަންތަނަށް ދިއުމަށް އިލްތިމާސްކުރާ ކަމަށެވެ.