އީރާންގެ މިސައިލް އާއި ޑްރޯން އުފައްދާ މަރުކަޒު ތަކަށް ވަރުގަދަ ހަމަލާ ތަކެއް ދީފައިވާ ކަމަށް އެމެރިކާާ އިން ބުނެފި
ސެންޓްކޮމް އިން ހާމަ ކޮށްފައިވާ ގޮތުގައި، ފަސް ގަޑިއިރަށް ދެމިގެން ދިޔަ މި އަސްކަރީ އޮޕަރޭޝަންގައި އީރާންގެ އެކި ސަރަހައްދު ތަކުގައި ހުރި އަސްކަރީ މަރުކަޒު ތަކަށް ވަނީ ކާމިޔާބު ހަމަލާ ތަކެއް ދީފައި. މީގެ ތެރޭގައި ބުޝެހްރު، ޗާބަހާރު، ޖާސްކް، ކޮނާރަކް، އަބޫ މޫސާ އަދި ބަނދަރު އައްބާސްގައި ހުރި އަސްކަރީ އަމާޒުތައް ހިމެނޭ ކަމަށް އެމެރިކާގެ އަސްކަރިއްޔާ އިން ބުނެފައިވޭ.
އީރާން އަށް އަމާޒުކޮށް އެމެރިކާ އިން ހަމަލާއެއް ފޮނުވާ މަންޒަރު. | ރޮއިޓާސް
އީރާނުގެ އައްސޭރިފަށުގެ ދިފާއީ ނިޒާމު ތަކާއި، މިސައިލް އާއި ޑްރޯން އުފައްދާ މަރުކަޒު ތަކަށް އަމާޒުކޮށް ވަރުގަދަ ހަމަލާ ތަކެއް ދީފައި ވާނެ ކަމަށް އެމެރިކާގެ އަސްކަރިއްޔާގެ ސެންޓްރަލް ކޮމާންޑް (ސެންޓްކޮމް) އިން ބުނެފި އެވެ.
މި ހަމަލާ ތަކަކީ އީރާން އިން ބައިނަލްއަގުވާމީ ކަނޑު ދަތުރު ފަތުރަށް ހުރަސް އަޅައި، ދެމުންދާ ހަމަލާތައް ހުއްޓުވުމުގެ މަގްސަދުގައި ދިން ހަމަލާ ތަކެއް ކަމަށް އެމެރިކާ އިން ބުނެ އެވެ.
ސެންޓްކޮމް އިން ހާމަ ކޮށްފައިވާ ގޮތުގައި، ފަސް ގަޑިއިރަށް ދެމިގެން ދިޔަ މި އަސްކަރީ އޮޕަރޭޝަންގައި އީރާންގެ އެކި ސަރަހައްދު ތަކުގައި ހުރި އަސްކަރީ މަރުކަޒު ތަކަށް ވަނީ ކާމިޔާބު ހަމަލާ ތަކެއް ދީފައި އެވެ. މީގެ ތެރޭގައި ބުޝެހްރު، ޗާބަހާރު، ޖާސްކް، ކޮނާރަކް، އަބޫ މޫސާ އަދި ބަނދަރު އައްބާސްގައި ހުރި އަސްކަރީ އަމާޒުތައް ހިމެނޭ ކަމަށް އެމެރިކާގެ އަސްކަރިއްޔާ އިން ބުނެފައިވެ އެވެ.
މި ހަމަލާ ތަކުގައި އެމެރިކާގެ ސިފައިން ބޭނުން ކޮށްފައި ވަނީ އަމާޒަށް ސީދާކޮށް ވާސިލްވާ "ޕްރެސިޝަން މިއުނިޝަން" ނުވަތަ ޒަމާނީ ހަތިޔާރު ތަކެވެ. މި ހަމަލާތައް އަމާޒު ކޮށްފައި ވަނީ އީރާންގެ އައްސޭރިފަށުގެ ދިފާއީ ނިޒާމު ތަކަށާއި، މިސައިލް އާއި ޑްރޯން ރައްކާކުރާ ތަންތަނުގެ އިތުރުން، އީރާންގެ ކަނޑުގެ އަސްކަރީ ގާބިލުކަން ހުރި މަރުކަޒު ތަކަށެވެ.
މިކަމުގެ މައިގަނޑު ބޭނުމަކީ ވިޔަފާރި އުޅަނދު ފަހަރަށް ހަމަލާ ދިނުމަށް އީރާން އިން ގެންގުޅޭ ގާބިލުކަން ކުޑަކޮށް، ބަލި ކޮށްލުން ކަމަށް ސެންޓްކޮމް އިން ނެރުނު ބަޔާނުގައި ވަނީ ބުނެފައި އެވެ.
މީގެ އިތުރުން ސެންޓްކޮމް އިން ބުނެފައި ވަނީ، އީރާން އަށް އަމާޒުކޮށް ދިން ހަމަލާ ތަކުގެ ފަހު ބުރު އަންގާރަ ދުވަހުގެ ހެނދުނު ނިންމާލާފައިވާ ކަމަށެވެ. އެމެރިކާ އިން ސިފަ ކުރާ ގޮތުގައި މި އޮޕަރޭޝަން އަކީ ސަރަހައްދީ ރައްކާތެރިކަން ދެމެހެއްޓުމަށް އެޅި ފިޔަވަޅެކެވެ.
މީގެ އިތުރުން، މެދު އިރުމަތީގެ މަސްލަހަތު ގޯސްވަމުންދާ މި ދަނޑިވަޅުގައި، އެ ސަރަހައްދުގެ އެކި ގައުމު ތަކުގައި އެމެރިކާގެ 50،000 އަށް ވުރެ ގިނަ ސިފައިން މިހާރު ވެސް ގާއިމުވެ ތިބި ކަމަށް ސެންޓްކޮމްގެ ބަޔާނުގައި ފާހަގަ ކޮށްފައިވެ އެވެ. މިއީ ސަރަހައްދީ ހަމަޖެހުން ގާއިމު ކުރުމާއި، އެމެރިކާގެ މަސްލަހަތުތައް ހިމާޔަތް ކުރުމަށް ބައި ތިއްބާފައިވާ ސިފައިން ކަމަށް އެ ގައުމުން ބުނެ އެވެ.
މަސްދަރު: އަލް ޖަޒީރާ
