ހުރްމުޒް ކަނޑުއޮޅިން ފީ އެއް ނަގާނެ ކަމަށް ޓްރަމްޕް ވިދާޅުވުމާ ގުޅިގެން އދ. ގެ ޝިޕިން އޭޖެންސީ އިން އެކަމާ ދެކޮޅުކަން ހާމަކޮށްފި
13 ޖުލައި 2026 | ހޯމަ 17:31ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުން 20 އިންސައްތައިގެ ފީއެއް ނަގާނެކަމަށް ޑޮނަލްޑް ޓްރަމްޕް ވިދާޅުވުމާ ގުޅިގެން، އެކަމުގެ ތަފުސީލު ހޯދުމުގެ މަސައްކަތް އދ. ގެ ކަނޑުދަތުރުފަތުރާ ބެހޭ އިދާރާ (އައިއެމްއޯ) އިން ފަށައިފި. ބައިނަލްއަގުވާމީ ކަނޑުއޮޅިތަކުން ދަތުރުކުރާ އުޅަނދުފަހަރުން މަޖުބޫރު ފީއެއް ނެގުމަށް ބާރުދޭ ގާނޫނީ އުސޫލެއް ނޯންނާނެ ކަމަށް ބުނެ އެ އިދާރާއިން ވަނީ ކަންބޮޑުވުން ފާޅުކޮށްފައި.
އިންޓަރނޭޝަނަލް މެރިޓައިމް އޯގަނައިޒޭޝަން (އައި.އެމް.އޯ) ގެ މައި މަރުކަޒު | ގެޓީ އިމޭޖަސް
އީރާނާ ދެކޮޅަށް އެމެރިކާއިން އަލުން ކަނޑުގެ ބްލޮކޭޑެއް ނުވަތަ ދަތުރުފަތުރު ހުރަސްއެޅުމުގެ ފިޔަވަޅުތައް އަޅަން ނިންމައި، ހުރްމުޒް ކަނޑުއޮޅިން ދަތުރުކުރާ ހުރިހާ މުދާ އުފުލާ އުޅަނދުފަހަރުން 20 އިންސައްތައިގެ ފީއެއް ނަގާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެން، އެކަމުގެ އިތުރު ތަފުސީލަށް އިންތިޒާރު ކުރަމުންދާ ކަމަށް އދ. ގެ ކަނޑުދަތުރުފަތުރާ ބެހޭ އިދާރާއިން ހޯމަ ދުވަހު ބުނެފި އެވެ.
އދ. ގެ އިންޓަނޭޝަނަލް މެރިޓައިމް އޯގަނައިޒޭޝަން (އައި.އެމް.އޯ) ގެ ތަރުޖަމާނަކު ވިދާޅުވީ، ރައީސް ޓްރަމްޕް ސޯޝަލް މީޑިއާގައި ކުރެއްވި އެ ޕޯސްޓް އެ އިދާރާގެ ސަމާލުކަމަށް އައިސްފައިވާ ކަމަށާއި، އެކަމާ ގުޅޭ އިތުރު ތަފުސީލު ހޯދުމުގެ މަސައްކަތް ކުރަމުންދާ ކަމަށެވެ.
އައި.އެމް.އޯ އިން އިތުރަށް ބުނީ، ބައިނަލްއަގުވާމީ ކަނޑުދަތުރުފަތުރަށް ބޭނުންކުރާ ކަނޑުއޮޅިތަކުން ދަތުރުކުރާ އުޅަނދުފަހަރުން ފީ ނެގުމާ ދެކޮޅަށް އެ އިދާރާއިން އަބަދުވެސް ސާބިތުކަމާއެކު ވަކާލާތު ކުރަމުންދާ ކަމަށެވެ. އަދި ހަމައެކަނި ކަނޑުއޮޅިއެއް ހުރަސްކޮށް ދަތުރުކުރާތީ، މަޖުބޫރު ޓޯލް ނުވަތަ ފީއެއް ނެގުމަށް ބާރުދޭ އެއްވެސް ގާނޫނީ އުސޫލެއް ނޯންނާނެ ކަމަށްވެސް އެ އިދާރާއިން .
ޓްރަމްޕްގެ "ޓްރޫތް ސޯޝަލް" ޕްލެޓްފޯމްގައި ކުރެއްވި ޕޯސްޓެއްގައި، ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުން 20 އިންސައްތައިގެ ފީ ނެގުމުގެ މަސައްކަތް ވަގުތުން ފަށާނެ ކަމަށް ވިދާޅުވި ނަމަވެސް، އެކަން ކުރާނެ ގޮތުގެ އެއްވެސް ތަފުސީލެއް ދެއްވާފައެއް ނުވެ އެވެ.
