ހުރްމުޒް ކަނޑުއޮޅިން ދަތުރުކުރި ދެ އުޅަނދަކަށް އީރާނުން އިންޒާރުގެ ބަޑި ޖަހައިފި

ސްޓްރެއިޓް އޮފް ހުރްމުޒް ނުވަތަ ހުރްމުޒް ކަނޑުއޮޅީގެ ކޮންޓްރޯލް ހޯދުމަށް ތެހެރާނާއި ވޮޝިންޓަނާ ދެމެދު ކުރިމަތިލުންތަކެއް ހިނގަމުންދަނިކޮށް، އެ ސަރަހައްދުން ދަތުރުކުރަން އުޅުނު ދެ އުޅަނދަކަށް އަމާޒުކޮށް އީރާނުން ހޯމަ ދުވަހު "އިންޒާރުގެ ހަމަލާތަކެއް" ދީފި ކަމަށް އެ ގައުމުގެ ދައުލަތުގެ މީޑިއާއިން ރިޕޯޓްކޮށްފި އެވެ.

ހުރްމުޒް ކަނޑުއޮޅި ކައިރީގައި ހުރެ ދައުލަތުގެ ޓީވީއަށް މައުލޫމާތު ދިން ރިޕޯޓަރަކު ބުނި ގޮތުގައި، ގަވާއިދާ ހިލާފަށް އެ ކަނޑުއޮޅި ހުރަސްކުރަން އުޅުނު ދެ އުޅަނދަކަށް އަމާޒުކޮށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ ކަނޑުގެ ސިފައިން ވަނީ މިއަދު ހެނދުނު އިންޒާރުގެ ބަޑީގެ ހަމަލާތަކެއް ދީ އެ އުޅަނދުތައް ހުއްޓުވާފަ އެވެ.

ދުނިޔޭގެ އިގްތިސާދަށް މުހިންމު މި ކަނޑުއޮޅީގެ ކޮންޓްރޯލާ މެދު އެމެރިކާ އާއި އީރާނާ ދެމެދު އަނެއްކާވެސް ހަމަލާތަކެއް ބަދަލުކުރެވިފައިވާއިރު، އީރާނުން ބުނަމުންދަނީ އާދީއްތަ ދުވަހުން ފެށިގެން ހުރްމުޒް ކަނޑުއޮޅި ބަންދުކޮށްފައިވާ ކަމަށެވެ. ނަމަވެސް އެމެރިކާއިން ބުނަމުންދަނީ އެ ސަރަހައްދު އަދިވެސް އޮތީ ދަތުރުފަތުރަށް ހުޅުވާލެވިފައި ކަމަށެވެ.

ދުނިޔެއަށް ބޭނުންވާ ތެލާއި ގޭސް ސަޕްލައި ކުރުމުގައި މުހިންމު ދައުރެއް އަދާކުރާ މި ކަނޑުއޮޅި ވެފައިވަނީ ދެ ގައުމުގެ ދެމެދުގައި އޮތް ބޮޑު ދެބަސްވުމަކަށެވެ. މެދުއިރުމަތީގެ ހަނގުރާމަ ހުއްޓާލުމަށް މިދިޔަ މަހު އެއްބަސްވުމަކަށް އާދެވުނު ނަމަވެސް، މި ސަރަހައްދުގައި ދެ ގައުމުގެ މެދުގައި ތަކުރާރުކޮށް ދަނީ ހަމަލާތައް ބަދަލުކުރަމުންނެވެ.