ސައިޕްރަސްގެ ބޯޓަށް އީރާނުން ދިން ހަމަލާއާ ގުޅިގެން، އިންޑިއާގެ ފަޅުވެރިއަކު ގެއްލިގެން ހޯދަނީ
ހުރްމުޒް ކަނޑުއޮޅިން ދަތުރުކުރި ސައިޕްރަސްގެ "ޖީއެފްއެސް ގެލެކްސީ" ބޯޓަށް އީރާނުން ދިން ހަމަލާއަކާ ގުޅިގެން، އިންޑިއާގެ ފަޅުވެރިއަކު ގެއްލިގެން ހޯދަން ފަށައިފި. މި ހާދިސާގައި ބޯޓުން ފޭބި 23 ފަޅުވެރިއަކު އޮމާންގެ އަސްކަރިއްޔާއިން ސަލާމަތްކޮށްފައިވާއިރު، އީރާނުން ބުނަނީ ހަމަލާދިނީ ބޯޓުން ކަނޑުދަތުރުފަތުރުގެ ގަވާއިދުތަކާ ޚިލާފުވުމުން ކަމަށް.
ހުރްމުޒް ކަނޑުއޮޅިން ދަތުރުކުރަން އުޅުމުގެ ތެރޭގައި، ނުބައި މަގަކުން ދެވުމުގެ ސަބަބުން ދެކުނު ކޮރެއާގެ ކޮންޓޭނަރު އުފުލާ ބޯޓެއް ފަރަށް އަރާފައި. | ގެޓީ އިމޭޖަސް
ސައިޕްރަސްގެ ދިދަ ޖަހާފައިވާ ކޮންޓެއިނަރު އުފުލާ ބޯޓަކަށް ހޯމަދުވަހު ހުރްމުޒް ކަނޑުއޮޅިން ހަމަލާދިނުމާ ގުޅިގެން، އެ ބޯޓުގައި މަސައްކަތްކުރާ އިންޑިއާގެ ފަޅުވެރިއަކު ގެއްލިފައިވާ ކަމަށާއި އޭނާ ހޯދުމުގެ މަސައްކަތް ކުރަމުންދާ ކަމަށް ސައިޕްރަސްގެ މިނިސްޓްރީ އޮފް ޝިޕިންގްއިން ހޯމަދުވަހު ބުނެފި އެވެ.
ސައިޕްރަސްގެ ކަމާބެހޭ ފަރާތްތަކުން ބުނި ގޮތުގައި "ޖީއެފްއެސް ގެލެކްސީ" ނަމަކަށް ކިޔާ މި އުޅަނދަށް ހަމަލާދީފައިވަނީ އާދީއްތަ ދުވަހުގެ ހެނދުނުގެ ވަގުތެއްގައި އެ ސަރަހައްދުން ދަތުރުކުރަމުން ދަނިކޮށްނެވެ.
މި ހަމަލާއާ ގުޅިގެން ބޯޓުގައި ތިބި ފަޅުވެރިން ކުޑަ ބޯޓެއްގައި (ލައިފް ބޯޓު) އުޅަނދު ދޫކޮށް ގޮސްފައިވާ ކަމަށާއި، އޭގެ ތެރެއިން 23 ފަޅުވެރިއަކު އޮމާންގެ ކަނޑުގެ ސިފައިން ސަލާމަތްކޮށްފައިވާ ކަމަށް ސައިޕްރަސްގެ ޑެޕިއުޓީ މިނިސްޓްރީ އޮފް ޝިޕިންގްއިން މައުލޫމާތުދެ އެވެ.
ސައިޕްރަސްގެ ޑިޕާޓްމަންޓް އޮފް މާޗަންޓް ޝިޕިންގް (ޑީއެމްއެސް) އިން ހާމަކުރި ގޮތުގައި، މި ހާދިސާގައި ގެއްލިގެން ހޯދަމުންދަނީ އެ ބޯޓުގެ ތާޑް އިންޖިނިއަރުގެ މަގާމުގައި ހުރި އިންޑިއާގެ ރައްޔިތެކެވެ.
"މިހާރު އެ އުޅަނދު ދަނީ ޔޫއޭއީގެ ރައްކާތެރި ސަރަހައްދަކަށް ކައިރިކުރުމަށްޓަކައި ކަނޑުބޯޓެއްގެ އެހީގައި ކަފުޖަހައިގެން. އަދި އެ ބޯޓު ކަފުޖަހައިގެން ގެންދާ ޓީމުން ދަނީ ގެއްލުނު ފަޅުވެރިޔާ ހޯދުމުގެ މަސައްކަތް ވަރަށް ހަރަކާތްތެރިކަމާއެކު ކުރަމުން،" ރޮއިޓާސް ނިއުސް އެޖެންސީއަށް ފޮނުވި އީމެއިލެއްގައި ސައިޕްރަސް ސަރުކާރުން ބުނެފައިވެއެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ފައުޖުތަކުން ސައިޕްރަސްގެ ދިދަ ޖަހާފައިވާ މި ކޮންޓެއިނަރު ބޯޓަށް ހަމަލާދިނުމާ ގުޅިގެން، އެމެރިކާގެ އަސްކަރިއްޔާއިން ވަނީ އީރާނަށް އަމާޒުކޮށް އާ ހަމަލާތަކެއް ދޭން ފަށާފަ އެވެ.
އީރާނުގެ އައިއާރުޖީސީގެ ކަނޑުގެ ސިފައިން ބުނި ގޮތުގައި، އެ ބޯޓަށް ހަމަލާދީ ހުއްޓުވީ ބޯޓުގެ މުވާސަލާތީ ނިޒާމުތައް ނިއްވާލައި، ކަނޑުދަތުރުފަތުރުގެ ސަލާމަތަށް ނުރައްކާވާ ގޮތަށް އަމަލުކުރުމުންނެވެ. އަދި އެ އުޅަނދާއި އިތުރު ބައެއް އުޅަނދުތައް، ހުއްދަ ނެތް މަގަކުން ދަތުރުކުރަން އުޅުމުން އެކަން އިސްލާހުކުރުމަށް އިންޒާރު ދިނުމުންވެސް އެކަމަށް އިޖާބަދީފައި ނުވާ ކަމަށް އީރާނުން ބުނެ އެވެ.
މަސްދަރު: ރޮއިޓާސް
