ސްކޫލް ނިމުމާ އެކު މަލާލާ ޓްވިޓަރ ބޭނުންކުރަން ފަށައިފި

އަންހެންކުދިންގެ ހައްގުތަކަށް ވަކާލާތުކުރަމުންދާ ޕާކިސްތާނުގެ މަލާލާ ޔޫސުފްޒާއީ ސްކޫލް ނިންމުމަށް ފަހު ޓްވިޓަރ އެކައުންޓް ހުޅުވައި އަންހެން ކުދިންގެ ތައުލީމަށް އެހީތެރިވުމަށް ގޮވާލައިފިއެވެ.

އުމުރުން 19 އަހަރުގެ މަލާލާ ސްކޫލް ނިންމި ދުވަހު ފުރަތަމަ ކުރި ޓްވީޓްގައި ބުނެފައި ވަނީ އެ ވަގުތު ކޮޅަކީ "ހިތިފޮނި" ވަގުތުކޮޅެއް ކަމަށެވެ.

މަލާލާ ބުނީ އޭނާގެ ފިކުރު ހުއްޓިފައި ވަނީ އޭނާއަށް ލިބުނު ފަދަ ފުރުސަތެއް ލިބިފައިނުވާ އެތައް މިލިއަން އަންހެންކުދިންނަށް ކަމަށެވެ.

އަންހެން ކުދިންގެ ތައުލީމާ ބެހޭ ގޮތުން ބްލޮގެއްގައި މަލާލާ ލިޔަން ފެށި އިރު އޭނާގެ އުމުރަކީ އެންމެ 11އަހަރެވެ.

ނަމަވެސް އެއީ އޮކްޓޯބަރ 2012 ގައި އޭނާ ސްކޫލް ބަހަށް އަރަނިކޮށް ހަމަލާދިނުމުގެ ކުރިއެވެ.

ތާލިބާނުން ދިން ބަޑީގެ ހަމަލާ އަމާޒުވީ މަލާލާގެ ބޮލަށެވެ

މަލާލާ ކުރަމުން ދިއަ މަސައްކަތްތަކަ ގުޅިގެން އުމުރުން 15 އަހަރުގައި އޭނާ ވަނީ ދުނިޔޭ ފަލަ ސުރުޚީތަކުން ޖާގަހޯދާފައެވެ.

މަލާލާއަށް ދިން ހަމަލާއަށް ފަހު އޭނާގެ ފުރާނަ ސަލާމަތްކުރުމަށް އަވަސް ފަރުވާދިނުމަށް އިނގިރޭސިވިލާތަށް ގެންދެވުނެވެ. އޭގެ ފަހުން އޭނާ ރަނގަޅުވުމަށް ފަހު މިއަދާ ހަމައަށް ވެސް ތައުލީމް ހާސިލްކޮށްފައި ވަނީ އިނގިރޭސިވިލާތުންނެވެ.

ފުރާވަރުގެ އެތައް މިލިއަން ކުދިންނެކޭ އެއްފަދައިން ހުކުރު ދުވަހުގެ މެންދުރުފަހު ޓްވިޓަރއާ ގުޅިފައިވާއިރު އޭނާގެ ޓްވިޓަރ ހޭންޑްލް އަކީ Malala@ އެވެ.

އަންހެންކުދިންގެ ތައުލީމަށް ކުރާ މަސައްކަތުގައި އޭނާއަށް އެހީވުމަށް ގޮވާލާފައިވާއިރު އަންނަ ހޫނު މޫސުމުގައި ދުނިޔޭގެ އެކިކަންކޮޅުތަކުގައި އެފަދަ ކެމްޕޭނެއް ކުރިޔަށް ގެންދާނެ ކަމަށް މަލާލާ ވަނީ ހާމަކޮށްފައެވެ.

ވަކި ޝަރުތުތަކަކާއެކު އިނގިރޭސި ވިލާތުގެ އެންމެ މަތީ ޔުނިވާސިޓީގައި ކިޔެވުމުގެ ފުރުސަތު މަލާލާއަށް ލިބިފައިވާ ކަމަށް މި އަހަރުގެ ކުރީކޮޅު ވަނީ ޚަބަރުތައް ފެތުރިފައެވެ.