ބަހްރައިންގައި ހުންނަ އެމެރިކާގެ ފަސް ވަނަ ނޭވީ ފްލީޓަށް ހަމަލާ ދީފައިވާ ކަމަށް އީރާން އިން ބުނެފި

ބަހްރައިންގައި ހުންނަ އެމެރިކާގެ ފަސް ވަނަ ނޭވީ ފްލީޓަށް މިސައިލް އާއި ޑްރޯން ބޭނުން ކޮށްގެން ހަމަލާ ދީފައިވާ ކަމަށް، އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފި އެވެ. 

އައިއާރުޖީސީ އިން ނެރުނު ބަޔާނެއްގައި ބުނެފައި ވަނީ، މި ހަމަލާ ތަކުގައި އެ ބޭސްގައި ހުންނަ ތެޔޮ ރައްކާ ކުރާ ތަންތަނަށް ބޮޑެތި ގެއްލުން ތަކެއް ލިބިފައިވާ ކަމަށާއި، އެ ތަންތަނުގައި އަލިފާން ރޯވެފައިވާ ކަމަށެވެ. މި ހަމަލާ ތަކުގައި ޕެޓްރިއޮޓް ރާޑަރު ސިސްޓަމް އަކަށް ހަމަލާދީ، ހަލާކު ކޮށްލާފައިވާ ކަމަށް ވެސް އައިއާރުޖީސީ އިން ބުނެފައިވެ އެވެ. 

މީގެ އިތުރުން އެ ފްލީޓުގެ އެއާ ކޮންޓްރޯލް ރާޑަރާއި، ސީ އާމް އާލީ އިންޒާރު ރާޑަރު ސިސްޓަމް އަށް ވެސް ހަމަލާ ދީފައިވާ ކަމަށް އައިއާރުޖީސީ އިން ވަނީ ބުނެފައި އެވެ. އަދި މީގެ އިތުރުން ކަނޑު ދަތުރު ކުރާ ބޯޓު ތަކުގެ ކޮންޓްރޯލް އަދި މޮނިޓަރިން ސެންޓަރަށް ވެސް ހަމަލާ ދީފައިވާ ކަމަށް ބުނެފައިވެ އެވެ. 

އައިއާރުޖީސީގެ ބަޔާނުގައި ބުނެފައި ވަނީ މި ހަމަލާ ތަކަކީ ބަދަލު ހިފުމުގެ އޮޕަރޭޝަނެއްގެ ގޮތުގައި ހިންގާ ހަމަލާ ތަކެއް ކަމަށް ބުނެފައި އެވެ. އަދި މި އޮޕަރޭޝަންގެ ދަށުން ހަމަލާ ދިނުން މިހާާރު ވެސް ކުރިއަށް ގެންދާ ކަމަށް ބުނެފައިވެ އެވެ. 

ބަހްރައިންގައި ހުންނަ އެމެރިކާގެ ފަސް ވަނަ ނޭވީ ފްލީޓް އަކީ، މެދު އިރުމަތީގެ ސަރަހައްދުގައި އެމެރިކާގެ ނޭވީ އޮޕަރޭޝަންތައް ހިންގުމަށް މުހިންމު ދައުރެއް އަދާ ކުރާ މަރުކަޒެކެވެ. މި ފްލީޓް އިން ޕާޝިއަން ގަލްފް އާއި، ރަތް ކަޑު އަދި އިންޑިއަން ކަނޑުގެ ސަރަހައްދު ތަކުގައި ހަރަކާތްތެރިވެ އެވެ. 

އީރާންގެ މި ހަމަލާތަކާ ގުޅިގެން އެމެރިކާ އިން މިހާތަނަށް ރަސްމީކޮށް އެއްޗެއް ބުނެފައި ނުވެ އެވެ. އަދި މި ހަމަލާ ތަކުގައި އެމެރިކާގެ މަރުކަޒަށް ލިބުނު ގެއްލުން ތަކުގެ މިންވަރު ވެސް ސާފެއް ނުވެ އެވެ.

މެދު އިރުމަތީގެ ސަރަހައްދުގައި އީރާން އާއި އެމެރިކާއާ ދެމެދު އޮތް ނުތަނަވަސްކަން މިހާރު ވަނީ ބޮޑުވެފައި އެވެ. ޚާއްސަކޮށް މިދިޔަ ދުވަސް ތަކުގައި ދެ ޤައުމުން ގިނަ ހަމަލާ ތަކެއް ބަދަލު ކޮށްފައިވާއިރު، ޙާލަތު އިތުރަށް ގޯސް ވެދާނެ ކަމުގެ ބިރު ވަނީ ބޮޑުވެފައި އެވެ.